الحمدلله على كل حال زوجي بذمه الله

بسم الله الرحمن الرحيم
السلام عليكم و رحمه الله وبركاته
بقلوب مؤمنه بقضاء الله و قدره تلقيت خبر وفاة زوجي ابو عيالي اليوم العصر الموافق الاثنين 27 شعبان
بفضفض لكم شوي و اقولكم عن قصه الوفاة
بيوم السبت كنت راجعه من الرياض مع اهله عندنا زواج وصليتنا الوقت متاخر قلت له نام و ارتاح عندك دوام قال لا بستناك
يوم وصلت البيت اخذني بحظنه و قال انا مشتاق لك ولا حطيت في بالي اي شي سبحان الله جلسنا نسولف بهدوء و روقان
وقالي يا ندى انا راظي عنك و انتي زوجه صالحه وكل حريم الدنيا ما يجون شي عندك بوقتها انا انبسطت فكرتها غزل عادي بين اي زوجين
ما حطيت في بالي انها عبارات وداع الحمدلله على كل حال وبنفس اليوم العصر كان مع ابوه رجل مسن ظعف عقله و طلعه و مشاه و عشاه وجلس معه لين نام
وقبل نسافر الرياض رايح و جالس مع امه الحمدلله واصل رحمه كله
يوم الاحد كنت عند اهلي و رجعت البيت وهو نايم جيت ونمت جنبه ما حس فيني للاسف وهذي اخر لحظه بكون فيها مع زوجي صحى للدوام ولا حسيت فيه للاسف و الحمدلله على كل حال
وشكثر متمنيه اني صحيت و سلمت عليه قبل يطلع لكن ربي ماكتب صحيت من النوم الظهر في يوم الاثنين وكنت صايمه عندي قضاء لاني ولدت ابني البكر في رمضان الي فات
وما قدرت اقضيهم من بدري سبحان الله حملت على طول بعد الولاده وتعبت بالوحم امي عندها عزومه على الغدا و ابي اروح دقيت عليه اكثر من مرا ما رد سبحان الله ولا حطيت في بالي شي
رحت وقلت ان شاءلله انه ما يخالف ولا يمنع وستمريت ادق وانا في بيت اهلي ولارد
جا وقت صلاة العصر دخلت اصلي صارت ربكه بسيطه في البيت امي و ابوي و اخواني صعدوا فوق و خلو الظيوف وهذا شي مو عادي عندنا
جوالي متاكده اني مخليته على الطاوله ما حصلته بهذا الوقت شي قالي ياندى زوجك توفى لا تسالوني كيف ولله ما ادري بس عرفت
صعدت ل اهلي الغرفه حصلتهم مجتمعين و باين عليهم اثار البكي اول ما دخلت قالو لي اجلسي انا هنا اجزمت بس باقي عندي امل
قالو زوجك سوا حادث وهو تعبان شوي و اخوك راح يكلم حماك يتطمن على صحته دخل اخوي قلت له من الاخر توفى قال الحمدلله على كل حال
ما ادري من وين جاني الصبر الحمدلله و الشكر قلت انا لله و انا اليه رجعون لا حول ولا قوة الى بالله اللهم اجرني بمصيبتي و اخلف علي خيرا منها في ابني و الي في بطني
قالي اخوي انتي على وضو صح قلت اي قال قومي صلي ركعتين لرب العالمين و قمت و صليت الحمدلله اني صبرت في اللحظه الاولى ربي يكتبنا من الصابرين
بعدها بدو المقربين يعزون و يجون البيت و ام زوجي الله يرحمه و يجزاها كل خير و يربط على قلبها و يلهمها الصبر و السلوان جت لعندي و تعنت تسلم علي وتتطمن
وتعزيني بولدها
الحمدلله على كل حال الدفن بكره العصر اتمنى تذكرونه بدعوه انو ربي يثبته عند السؤال و يغفرله و يرحمه
مات و باقي حامل بولده الثاني
ربي اربط على قلبي و قلب امه و عوظنا خير في ابنائه و جمعنا به في الفردوس الاعلى