الحمدلله ولدت وهذي قصة ولادتي ...

كيفكم ياحوائيات وكيف الكروشات الله يهونها عليكم وتولدون بالسلامه ...
الحمدلله ولدت وجبت بنوته تالا مع اختها تولين
يوم الثلاثاء 17/6/1433هـ
واليكم قصة ولادتي :
يوم الاحد الفجر صحيت اصلي الفجر حسيت بتعب ثقل في بطني وزي الم الدورة بس طنشت لاني توني داخله التاسع والدكتور قال لي اني راح اخذ 28 يوم من التاسع عشان كذا طنشت وصليت ورجعت بنام ولما حطيت راسي على فراشي الا جاني الالم اقوى من اللي قبل هنا بديت اشك قلت باشوف الالم يتكرر والا لا اذا تكرر يعني طلق يعني ولادة وانتظرت شوي الا رجع الالم بعد نص ساعه تقريبا هنا بدا ت رجولي تتصااافق في بعض وحسيت دموعي تنزل مادري فرحة اني خلاص بوالد والا رهبة منن الولادة وخوف من اللي بيصير
بديت احسب مرة ثانيه وتكرر الالم مرة ثانيه وكان على دوام زوجي بس ماقلتله شي خليته يروح الدوام وانا قمت ورحت للحمام الله يكرمكم لقيت شوية دم خفيف هنا تاكدت اني باولد وانا اروح انظف البيت ورتبته وجهزت اغراضي وشنطتي كانت جاهزة ولما خلصت الا اختفى الالم ماعاد حسيته ابد وبدات الهواجيس وش صار والالم كان طلق والا ايش والا طلق بارد قريت في النت والاغلب كان طلق بارد خفت كثير من الطلق الصناعي لاني شفت اختي كيف تعذبت فيه وهي ولدت قبلي بشهرين مسكت نفسي وقررت اني مااروح المستشفى الا اذا تعبت مررررة وفعلا كان الطلق باااارد يجي كل بعد 3 ساعات وكتمت على الموضوع ماعلمت الا زوجي ولاعلمت احد عشان مااحد يقلق ولا احد يضغط علي واروح المستشفى لاني خفت من الطلق الصناعي بشكل كبير
كملت يوم الاحد وانا اتالم كل بعد 3 ساعات يجيني الم يمغصني ويوم الاثنين كمان بس بدا يزيد شوي وكنت اكل رطب كل بعد ساعتين اخذ صحن وبدا يزيد كل بعد ساعتين وصبرت كله خوف من الطلق الصناعي كل ماقلت باروح المستشفى اتذكر اختي واتراجع ولما جاء الليل صار الالم يجيني كل ساعه ونص ونمت ولما جات الساعه 3 ونص الفجر صحيت من شدة الالم وقمت من النوم مفزوعه وجلست احسب للالم طلع نص ساعه بين الم والم واذن الفجر وصليت ورحت جهزت شنطة بنتي تولين وتروشت وسويت قشر واخذت قارورة وحطيت فيها مر وماء مغلي وصحيت زوجي وكلمت اختي ساكنه معي في نفس العمارة واعطيتها تولين واغراضها ورحت المستشفى وكان الالم يجيني كل بعد 10 دقايق بس ولما ركبت السيارة حسيت برعب فضيع تعوذت من ابليس وبديت اقر سورة الزلزلة والمعوذات واية الكرسي وبعض اذكار الولادة واخذت المسبحة حقت زوجي وجلست استغفر المهم واحنا في الطريق جاني الم الم الله لا يوريكم عرفت اني باولد وقلت لزوجي اسرع ووصلت المستشفى الساعه 7 وربع ودخلت الطواري في المستشفى العسكري وكان كل ماجاني الالم استغفر بصوت عالي ودخلوني عند الدكتورة تكشف علي وكانت المفاجاة ان الرحم مفتوح 9 سم انفجعت بغيت اولد في السيارة الدكتورة ماخلتني اتكلم الا جايبين سرير وشرشف اخضر مرعب وغطوني وعلى كشك الولادة وصارت ضجه وحدة تركب المغذيه ووحدة تسحب دم ووحدة تركب التخطيط وهنا خفت شوي ولما كشفت مرة ثانيه لقته 8 من خوفي انغلق خفت يعطوني طلق صناعي وصرت استغفر واستغفر وبدات الالام تزيد وبدات اصواتي ترتفع شوي الا جابت الاكسجين وعطتني كان باين عليها انها شوي شريرة المهم لما جات الساعه 8 بدات ساعة الصفر وبدات ادفع وماكنت اعرف وش نوع الجنين وهو اللي خلاني اتحمس ولدت بسرعة الحمدلله وجلست اسال وش جبت وهي تنافخ على ماما شوي مافيه كلام وسكت خفت منها وبعد تقريبا دقايق قالتلي بنت ولا اعطتنيها اخذتها على طول على سريرها وجلست شوي وبدات تسوي الخياطه وبدات الماساة بخت شوي بنج بالبخاخ ولا دقتني ابرة ولا شي وكل ماغرزت لابرة كانها تغرزها في قلبي لا وتقول ماما لاتقول مافيه بنج فيه بنج تالمت الم الله يكتب الاجر وبعد ماخلصت غطتني واعطتني بنتي ولما شفتها نسيت كل الالام واخذت جوالي وبشرت زوجي وبشرت امي وجلست ساعه اقنعها اني ولدت وطمنت اختي اللي معها بنتي وجلست يمكن ساعه بعدين جتني وقالت قومي تروشي عشان نوديك غرفتك واخذت بنتي.. امي قالتلي لاتتروشين بعد الولادة بس غسلي جسمك من تحت واخذت المرة اللي سويتها وغسلت جسمي بعدين غسلت بالمرة ولبست المشد ولبست ملابسي ونقلتني الغرفة وكانت الساعه 10 تقريبا وتخيلو التعذيب مااعطوني مسكن ولا اكل ولاشي وبدا المغص اللي اقوى من الطلق وتذكرت القشر اللي سويته واخذته وشربته خفف المغص ولله الحمد وجلست في المستشفى يوم وطلعت والحمدلله
وهذي قصتي ادعولي بالصحه والعافيه