الحمد لله والشكر لله.انكتب لي عمر ثاني.ورجعت لوليدي وهذا قصتي..

السلام عليكم
يارب لك الحمد والشكر كما يليق بوجهك وعظيم سلطانك....
هذا موضوعي الاول..
http://forum.hawaaworld.com/showthread.php?t=2573098

وهذا الموضوع عن كيف سبحان الله الاستخاره
http://forum.hawaaworld.com/showthread.php?t=2615286
يمكن بعضكم قرا موضوعي عن الاستخاره والموانع اللي تمنعني من زياره المستشفى بعد كل صلاه استخاره...
المهم سبحان الله دبر لي زوجي واسطه بمدينه الملك فهد الطبيه...
وبعدها صليت استخاره وحصل سوء تفاهم ونقاش بينه وبين زوجي
فقلت لزوجي خلينا نشوف مستشفى الملك عبدالعزيز..دق زوجي وخذا موعد عند الدكتوره منال بخاري الله يسعدها
ويوفقها وين ماراحت والله ييسر لها امرها هالانسانه ويبعد عنها كل سوء ...عمري ماشفت طبيبه بامانتها..
المهم دخلت عليها...وشافت اشعتي...طبعا الاشعه بمكتب ثاني...وتخيلوا دقائق الانتظار ..والله قاتله..
جت وجلست قبالي وزوجي جنبي ...وشبكت يديها ببعض..
قالت اطلعي خذي فلوس الكشف ..انا مقدر اسويلك شئ ...ولاتسلمين رقبتك لاحد وضعك جدا صعب
وارشحلك دكتور عندنا كويس بعد الله واصلا الجهاز اللي راح يستخدمونه بالعمليه حقتي خاص بالحالات المستعصيه لان لحمياتي صارت واصله الدماغ:44:
وماينوجد هالجهاز الا بهالمستشفى ...سبحان الله سبحان الله...شوفوا كيف لو اني مسويتها بمستشفى ثاني..سبحانك ربي مااعظم الاستخاره...
اخذت موعد عند هالدكتور...الاحد والله العظيم مدري كيف الايام مرت علي رغم ان الفرق بين الموعدين 3 ايام المهم كشف علي قالي لازم عمليه باقرب وقت عشان ماتتحول شي ثاني:44:والعياذ بالله
قلت له استخرت ربي وباقرب فرصه اعملوها لي قالي خلاص يوم الثلاثاء...
المهم طلعت من عنده واخذوا مني دم للفحوصات
الاثنين بالليل يعني ليله العمليه رحت لاختي...قلت عشان لما اروح الصبح يكون ولدي نايم..مايحتاج اعبر عن الضغط النفسي اللي كنت احس فيه ..والوقت كيف بطي بس اذا دخل لي الشيطان احاول استغفر وانسى....وانا انوم ولدي والله دموعي تطيح على خدوده اتخيل اني خلاص ماارح اشوفه مره ثانيه...وهو ياقلبي يقولي ماما وثفيث:44:
راثث يعورث:44:---بابا هاوثث:44:
ليلتها والله جفاني النوم...ورحت مواصله الساعه 8 الصبح وطبعا اختي ماتدري عن شي قلتها اشعه مقطعيه...
رحت ودخلوني بغرفه الله يسامحهم نظافتها موذاك الزود رغم انها على حسابي تبع مركز الاعمال
بس قلت كيفه انا مو بوضع يسمح لي ...اتكلم والشفاء من ربي لامن المكان ولا غيره...وبس ادعي واصلي استخاره..
انا معاي حساسيه بالصدر وطبعا من التوتر هاجت كحتي علي ....فاحتار الاطباء يعملونها او لا عشان مااختنق من البنج او يطير بالرئه هذا الكلام الساعه 12 ومفروض عمليتي 3 ونص العصر ...
المهم كل شوي جايني طبيب وكاشف ويقول لا ماانتي مؤهله...للعمليه
وبعدها جاني حق الباطنيه قالي لا مافيه مشكله بس لازم تاخذين فنتولين قبل
انا طبعا احترت ومدري وش اسوي رحت فرشت سجادتي...وصليت استخاره يمكن 4 مرات وجلست ادعي ربي وادعي وادعي يوم سلمت
الا الممرضه جابتلي لبس العمليه قالت خلاص خذي هالحبوب المنومه والبسي
حمدت الله واطمانيت تمام الاطمنان ان المقدر لي بيصير .... ..لا اله الا الله
المهم خذوا وجوالي والاشياء الثمنيه اللي معي ووقعت ..وانسدحت على الفراش...
اقرا سوره الكهف
جابوا لي السرير وغطوني كني جنازه ...يالللللللللللللللله هاك الشعور .....سبحان الله ابن ادم ضعيييييييييييييييييييييييييييف..
وهم يدفوني بالممرات والله شريط حياتي مر.....قدامي سبحان الله كيف غفلت وكيف فرطت ....
دخلت غرفه العمليات وانتظر الدكتور ركبولي الاجهزه وانا ابحلق فيهم ويجون ويروحون الممرضات واللي لسه ماافاقوا واللي توهم يدخلون .......ااااااااااااااه سبحان الله
المهم جاء طبيب التخدير وهو يحاول يسالني عشان اغفى وانا مدري...ماارديت عليه وقعدت اتشهد تذكرت حديث النبي صلى الله عليه وسلم من كان اخر كلامه من الدنيا لااله الا الله دخل الجنه......
فتحت عيني كني جوا بحر والممرضات برا يطالعوني وزوجي معهم...بكيت وبكيت وبكيت ....
حمدت الله انه رد لي روحي....
ورجعت انوم مدري عن نفسي.......طلعت من العمليات 8 بالليل وانا داخلتها 3ونص....
فتحت عيني فجر الاربعاء وخشمي من جواء فيه زي الدعامات ومحشي قطن ويالمني الم لايعلم فيه الا الله سبحانه ...بس كل هذا يهون..الحمد لله خلصت..بس حلقي كني بالعه امواس مااقدر ابلع حتى ريقي لانهم كانوا مركبين لي اجهزة تنفس صناعي اثناء العمليه:44:
اليوم الثاني جاني الدكتور يسحب القطن والدعامات من جوا...ولاتسالوني عن الالم واللللللله الم فضيع فضيع ابغى اصرخ من جوا لان القطن محشي لين حد الجبهه:44:
والله بكيت وبكيت من الالم وخشمي ينزف دم ....اعطوني مسكنات...وخف بنسبه 60 بالميه...
بس الحمد للله الحمد لله الحمد لله........اللي رد لي روحي وللله يجعل كل الم حسيت فيه بميزان حسناتي
مابديت احس بالعافيه الا بعد 12 يوم من العمليه
طبعا اعطوني مضادات وكورتيزون اخذها لشهر كامل ثم اروح اسوي فحوصات وبعدها يتقرر اكمل او اقلل الجرعه او لا.. يالله هالكورتزون والله قوي بشكل ويسبب لي ضعف مااقدر ابذل مجهود بس ان شاء الله ازمه وتعدي..والعافيه شوي شوي.. والله يابنات اعزكم الله انه يطلع من انفي اعزكم الله اشياء تخوف سوداء طويله مدري كيف اصلا هي جوا:44:
والله اني مقدر امسك المنديل من الخوف....بس الحمد لله على كل حال
وطبعا ممنوعه من الروائح جمعيها ومن الحركه والمجهود والله حتى وليدي ممنوعه اشيله او ابدل ملابسه عشان الراس مايحصل فيه ضغط بس كل هذا شي واني مقدر اسجد لله شي ثاني والله يابنات تمتعوا بالسجود اقسم بربي انه من اكبر النعم ...ربي لاتحرمني منها......واشفني شفاء لايغادر سقما..
اشكر كل من دعا لي ووقف معي وسال عني واسال الله ان يرزقكم الجنه ويدخلكم اياها بدون حساب اللهم امين ولاتنسوني من دعواتكم انها ماترجع لي لان هذي ثاني مره اسويها والاطبااء مستغربين انها رجعت بهالشراسه وبهالسرعه
واسال الله الكريم ان يشفيني ويشفي مرضى المسلمين