الحمد لله وبفضل من الله

بسم الله والصلاة والسلام على رسول الله
السلام عليكم ورحمة الله وبركاته.
كيفكم اخواتي. كنت غيابه لي مدة عن المنتدى ورجعت عشان اطرح تجربتي
بنات انا كان لي سنتين الا كم اسبوع وماحملت والنَّاس اكلت وجهي وبالذات اهلي.
وكتبت مواضيع كثيره كنت افضفص وكنت اقولكم كل شي اسويه. سواء منظار او حبوب. والحبوب كانت لها اثار عكسية علي وتركتها بس ماوصلت للتلقيح لان كان بدري عالموضوع
مع العلم اني وزوجي سليمين ماشاء الله تبارك الله
بس تعرفوا الدكاتره اول ما أجيهم كانوا يقولوا تحاليلك سليمه وبعد مااخذ كورس لزيادة فرص الحمل وماحمل. يحطوا فيني الف عله مره قالولي عندك تضخم بالانابيب وبكيت وانهرت نفسيا ورحت الاْردن اسوي منظار طلع الانابيب سليمه عندي واروح لدكتوره ثانيه. وأبدا كورس علاج جديد
اخر شي قالوه لي لازم عملية تثقيب للمبيض لما شفت السالفه كذا. كرهت كل شي. طبعا. مانسيت رب العالمين كنت اصلي واشتكي له واستغفر. مرات أيأس ومرات اتفاؤل
كتبت موضوع هنا. وهذا رابطه
http://forum.hawaaworld.com/showthread.php?t=42079...



وفعلا بديت استغفر وادعي الله وأكرر من قول (ربي اكشف مابي من ضر ) وأكررها كثييييير لان مرات يكون فينا شي نجهله يالله الايام اللي مرت علي كانت صعبه
تركت كل المستشفيات والادوية وصرت أكرر الدعاء هذا مع الاستغفار
سافرت الاْردن اغير جو وبالصدفه قالولي عن دكتور عيادته بسييييطه جدا. بس خبرته عاليه ماشاء الله
رفضت اني اروح بحجة اني مليت وتوكلت على ربي وخلاص
اصروا علي خالاتي اني اروح له ورحت. ريحني بكلامه كثييييير. كانوا هنا بالسعوديه مخوفيني من هرمون fsh انه مرتفع عندي. حاجه بسيطه. ومع الزمن راح يرتفع اكثر
بس هالدكتوره نكر هالشي وقالي انتي بحدود الطبيعي ورحمك سليم وتحليلك سليمه بس ابيك ترجعي تعيدي هرمون الحليب بما انه كان عندك زمان


وفعلا حللت وطلع عندي مرتفع شي بسييييييط. أعطاني اسم حبوب غير اللي أعطوني اياه هنا. وقال لا تتركيه ولا يوم الين ماتحملي. وفعلا اخذت من الحبوب كميه عشان ماتقطع بالسعوديهمع ان له اسم ثاني شركه ثانيه. هنا
قعدت شهرين استخدمه زي ماقال لي
ثالث شهر تاخرت الدوره علي يومييييين. ومو بالعاده تتاخر. فرحت قلت بس حامل مع اني كنت ناويه اروح لحرمه تمرخ رغم إيماني الضعيف فيهم وأنهم نصابات بس للاسف نزلت علي الدوره ثالث يوم وانهرت نفسياااااا
اتصلت بالحرمه العجوز وكان ردها صاعقه لي قالت يابنتي لو جيتيني قبل يومين كان مرختك. بس انا توني طالعه مسافره احضر عرس ولد بنتي.


قعدت افكرررر. واقول ربي اصرفها عني. لان بالعاده دورتي ما تتاخر. وتاخرت يومين. والحين الحرمه سافرت. وقلت يارب اختر لي ولا تخيرني
قعدت اقلب بجهات الاتصال عندي. وانا بعاااالم ثاني. وطاح عيني فجاه على رقم اعطتني اياه اختي زماااان. رقم حرمه مرخت صاحبتها كانت مناخره 7 سنوات وبفضل الله حملت
وقلت بنفسي بجرب اخر تجربه
واتصلت عليها وفعلا رحت. ومرختني بلبخه حطتها عبطني وحركت رحمي بكاسات هوا نزلته لي وقالت رحمك مرتفع وعندك هوا برحمك واعطتني اعشاب وبخور وسدر ومويه غريبه. وعسل وصابون الطاووس اللي من غير اي عطور
وزيت ادهن فيه ومنعتني من اكلات تنفخ البطن. و ربطت بطني بشماغ وكرتون ومنعتني من الجماع واعطتني موعد عندها بايام التبويض وقالت حتى وقت الجماع الشماغ لا تفكيه ولا تنامي عالسرير وبين فتره وفتره نامي عبطنك

اشياء كثيييييره وانا بيني وبينكم ماني مصدقه بس قلت بمشي عكلامها والصراحه سويت كل شي ماعدا نومة الارض والزيت الزيتون طفشت
طبعا. كنت مستمره على حبوب الهرمون. و جا اخر الشهر تاخرت الدوره اسبوع ونسيييييت السالفه
وماعلمت احد خفت اتفشل او هرموناتي تخربطت مع التمريخ. خفت مررره حتى زوجي ماعلمته. صارت نفسي تنسد عن الاكل بطني تمغصني. والصراحه بنات. كنت ابيها تنزل. لان وسواس هرمون fsh كان مخوفني ان الدوره تنقطع عني. عكثر ماكنت اقرا هنا بالمنتديات.
بعدها صار يجيني غثيان لما اشرب اي منبهات. زي الشاي والقهوه وشكيت صراحه. وحللت منزلي بدون لا احد يدري. رحت الصيدليه بدون علم زوجي كان معزوم
وجبت التحليل واول مارجعت البيت بعبايتي سويت الاختبار قلت افصخ عبايتي وارجع ويبان اذا في حمل او لا.
مامداني اطلع الا اشوف خطييييييييين. بنات وربي وربي. تلعثمت. وصرت اكلم نفسي واقول لاااا لااااا مو معقووول
خفت وقعدت ارجف واروح لمرايات البيت. ووجهي متلون. مدري ايش اسوي الحين. واتصلت بزوجي بحجة اني تعبانه وجا مخروع ولما وصلا المستوصف طلبت تحليل حمل والحمد لله وبفضل الله طلعت حااااااااامل. ماشاء الله لا قوة الا بالله


الله لا يحرم. الاحساس اللي حسيته لاي محرومه يارب العالمين. وفعلا بنات ربي ماخيب املي. ىفعلا بالرابط اللي حطيته بموضوعي هذا كنت اقولكم ان راح يجي يوم واقو لكم. ان ربي رزقني. والحين توني نافس لي اسبوعين. و ربي رزقني فبنوته زي القمر
نسيت اقولكم ان بالشهر اللي مرخت فيه كنت احلم احلام. غريبه ومبشرات وامي بعد وفسرتها عند شيخ وقال راح تسمعي خبر سااااااااار جدا جدا


اللهم لك الحمد كما ينبغي لجلال وجهك وعظيم سلطانك. اللهم لك الحمد حمدا كثيرا طيبا. ملئ السموات والارض وملئ ماشئت بعد
اللهم كما مننت علي بالحمل السليم والخلقه السليمه. امنن على كل محرومه بالذريه السليمه المعافاه.