و اخيرا رجعت لقسم الحمل و الولادة وانا بدون كرشه
ولدت يوم الأحد الماضي 20-6-2010
و جبت احلى بنوتة :04:
الله يحفظها و يصلحها و يجعلها من عباده الصالحين
طبعا راح ابدا لكم بقصتي من نهاية الشهر الثامن كانت بادية معاي طلوق و الالام لدرجة اني كنت متفائلة اني راح اولد ببداية الشهر التاسع
دخلت الشهر التاسع والالام هيا هيا تزيد و تنقص و بدا التنفخ يبين علي و النفسية صارت زفت مااتحمل كلمة من احد حتى زوجي ما عدت اطيق منه حتى المزح الله ياجرنا
المهم بديت بالشهر التاسع و انا متوقعه الولادة باي لحظة من التعب
حتى لما كنت اروح مواعيدي كنت اتوقع ان الدكتورة راح تشوف فيني بوادر ولادة وتمسكني لكن ما كان فيه اي بوادر :06:
سويت كل شي .. مشيت و شربت اشياء تفتح الرحم و تحمي الطلق ولا في اثر لولادة
حتى الافرازات كانت قلييييلة جدا بالشهر التاسع و تكاد تكون معدومة يعني ادخل الحمام واطلع ناااااشفة
خلص الشهر التاسع و جاء موعدي و اللي هو كان يوم السبت 19-6 و كنت حاسه اني تعبااااااانة و معاي الام قالت لي حماتي على مغلي الحبة السوداء و العسل شربته و كان عندي امل اني الليلة راح اكون بالمستشفى ,, بس نمت هذيك الليلة بالبيت و ما تغير معاي ولااااا شي .. الا اني كنت ملاحظة ان حركة البيبي قليلة من يومين تقريبا
كان عندي من بكرة موعد بالمستشفى .. قمت الصباح حاسه بالام خفيفة قلت خليني اخلص بعض الاشغال بالبيت قبل لا اطلع
غسلت الملابس و جهزت السلة الثانية عساس باغسلها و طلعت من البيت الساعة 12 ونص .. رحت الموعد وقلت للدكتورة عن ملاحظتي ان حركة البيبي صايرة اقل من الطبيعي .. هزأتني و قالت لي ليش ما جيتي اول ما حسيتي بهالشعور ؟؟ قلت لها انا كنت متوقعة ان هالشي طبيعي بسبب كبر حجم الطفل
المهم سوت لي سونار و شافت ان ماي الجنين بدا يقل و المشيمة بدات تتوقف عن العمل و اصرت انها تدخلني ولادة و تحط لي تحاميل اذا كان الرحم مسكر
انا بهالوقت بطني قام يمغصني من الخوف و حسيت ان الولادة قربت :35:رحت صليت ركعتين استخارة و قلت لها باروح البيت بس عشان ارتب اغراضي و اجهز شنطتي و ارجع لكم .. قالت ماااافي خروج لما نسوي تخطيط لقلب البيبي
دخلتني غرفة التخطيط وخلوني ربع ساعة على الجهاز يوم جات النرس تشيك قالت البيبي شكله نايم و حطت مثل الجهاز يطلع ذبذبات عشان يصحونه من النوم :04:
صحت البنوتة من نومتها و تعدل تخطيط القلب و لقوا ان كل شي اوكي بس الطلق كان خفيييييف جدا .. خلصنا التخطيط و رجعت لغرفة الدكتورة قالت لي ان تخطيط البيبي تمام بس لازم تشوف عنق الرحم اذا مفتوح او لا عشان تعرف نوع الطلق الصناعي اللي راح تستخدمه
قاست الرحم ولقته مسكككككككر عالاخر قالت مافي مجال الا على التحميلة و كتبتها لي و دخلتني قسم التنويم .. طبعا غرفة ما قبل الولادة في مستشفى ارامكو سراير جنب بعض و بينها ستاير و كل وحده تسمع اللي جنبها وهي تطلق .. يعني انواع التعذيب :06: دخلوني بغرفة التعذيب الساعة 2 ونص تقريبا و كانت معاي وحده اسمعها تتألم المسكينة و انا خايفة واقول الدور علي بعد شوي ..
المهم يا طويلات العمر يوم جات الساعة 3 حطت لي النرس التحميلة و اااااه من هالتحميلة شكلها غريييييييب مثل الخيط طويييييل و في نهايته شي ماادري شنو ؟؟:35:
انا ماادري شلون دخلوه ووين قعد هالخيط بس المهم انها حطتها لي على الساعة 3 و من حطتها و انا طلقة ورى الثانية ,, الااااام تروح و تجي الين الساعة 7 بدت تشد و تتواصل ورى بعض جات النرس تقيس لقت الرحم فاتح بس 1 سم
انا انهبلت يوم قالت لي 1 سم .. قلت كل هالالام و مافتح الا 1 سم .. و حسيت ان المشوار قدامي طويييييل خاصة ان الدكتورة قالت ممكن تاخذ التحميلة مدة 24 ساعه او احيانا يومين
طلبت منهم شي يخفف الالم قالتلي على ابرة العضل .. اخذتها و ما حسيت بالدنيا حوالي احس انها دوختني .. ما حسيت الا بالنرس تقول للنرس الثانية اكسجين قليل و نبض البيبي ضعيف و حطولي اكسجين على وجهي وانا مثل اللي بعالم ثاني و اشوفهم مثل الحلم قدامي و ما اقوم الا على الم الطلق اللي حتى ابرة العضل ما هدته
قعدت اذكر الله و اشرب ماي زمزم و ماي منقوع الزعفران مسويته لي الوالدة الله يطول بعمرها و يحفظها
بعد ساعة جات تقيس الرحم مرة ثانية لقته 3 سم ماشاء الله
قالت خلاص الحين نشيل التحميلة .. شالتها .. و اول ماشالتها انا سمعت صوت طلع من داخل بطني كان شي انكسر
و بعدها حسيت بماي البيبي نزل و كان فعلا شوي .. ناديت الممرضة و قلت لها ان الماي نزل يوم شافت قالت خلاص على غرفة الولادة
هالكلام كانت الساعة 10 و نص تقريبا
دخلوني غرفة الولادة و كان الطلق حاااااامي ماشاء الله طلبت منهم الكمام ما كنت اشيله وقت الطلق من شدة الالام و خااااصة وقت طلعة الرااااااااس
و الحمد لله ولدت احلى عروسة الساعة 11 و ثلث
و كانت صغنوووونة اصغر وحده بعيالي كلهم