الحمد لله ولدت بالسلامة وقصتي مع ابرة الظهر

سلام يا بنات.. الحمدلله ولدت بالسلامة والله رزقني بنوتة الله يخليها لي يارب. انا ولدت بالمانع الخبر واخذت ابرة الظهر وسعرها 1280 ريال. اعطوني الابرة لما فتح الرحم 3 سم . واللي يعطيك الابرة استشاري اسمه الدكتور رؤوف. بصراحة شاطر مررررررة ويده خفيفة مرة ما تحسين بالابرة بس مثل ابرة المغذي. اول شيء طبعا يعقم الظهر يمكن 3 مرات وبعدين يعطونك مخدة تحطينها قدامك وترخين عليها كأنك تحضنينها وبعدين يقول لك لا تتحركين. ويدخل الابرة وبعدين يدخل سائل التخدير شوي شوي ويسألك تحسين بشيء يسري؟ . وبعدين يثبت الابرة والانبوب على طول ظهرك الى الرقبة . يثبته بلصقات مثل لصقات المغذي. وبعدين يميله من فوق على جنب الرقبة ويثبته وفي الطرف ابرة علشان اذا احتجتي تخدير زيادة يضخون من خلال هذا الانبوب. بعدها على طول ما راح تحسين بالم الطلق ببس تقدرين تحركين رجليك عادي وتتقلبين بعد على السرير عادي بس اذا لمستي الحوض بتحسين فيه بشوي تنميل بس عادي ووقت اللي تجي الدكتورة تقيس تحسين بالم القياس لانه الدكتور ما يخدر اعصاب المهبل. واذا حسيتي بأثر التخدير قرب يخف تقولين للممرضة وهي تزيد الجرعة. ووقت اللي انفتح الرحم 8 سم راح تحسين بالالم في المهبل وبشي يدف ( طبعا الدكتور قال لي بتحسين بالدفع ). واذا انفتح 10 سم خلاص انا بالنسبة لي حسيت بالالم عادي ما كأني فيني الابرة. وبعد الولادة انا بالنسبة لي اعطوني ابرة العضل في البداية اللي هي البيتيدين وسببت لي قيء واستمر معي بعد الولادة وقالت الدكتورة انه احتمال كمان من ابرة الظهر يعني يمكن رجعت 3 مرات بعد الولادة وبعدين خلاص عادي ما فيه اي شيء ولا اي الم بس مكان الابرة مثل الم مكان ابرة المغذي اذا شالوها من يدك بس هذي في ظهرك.والحمدلله ما حسيت لا بصداع ولا شيء. وريحتني كثير مرة وافرح لما اشوف الدكتورة تجي وتشوف الجهاز وهي تقول كويس طلق قوي كويس وانا ما احس بشي. هذي تجربتي وان شاء الله تستفيدون منها لاني كنت ابحث عن تجارب تفيدني وما لقيت غير بعض خواتي اللي مدحوا لي الابرة بس ما كانت عندي معلومات كفاية عنها. ادعوا لي الله يخلي لي عيالي ويخليني لهم.