الحمد لله ولدت واليكم التفاصيل

مرحبا كروشات
الحمد لله ولدت امس في الاسبوع الاربعين
بقولكم التفاصيل🌺
مافيه شي ما سويته من دخلت التاسع شربت خلطة الحليب قرفه ومسمار وعسل وما استمريت
شربت كمون يانسون حليب بزنجبيل
شربت عصير اناناس اسبوع وما شفت نتيجه
امشي الصباح ٢٠دقيقه وبالليل ٢٠ دقيقه
كل يوم اشم حلتيت
توكلت ع الله وسويت كبو مره وكمون ومراميه وقشر بصل وخياس وما جاب نتيجه
تبخرت بماءمغلي فيه حلتيت وكمون وما كو شي
رحت لموعدي الاسبوع الماضي عملت تحريض وماجاء بعدها اي الم او طلق غسلت بحلتيت وحطيت بالفوطه
وكل ما نمت اقول ان شا الله اقوم ع طلق
استمر الدم يومين خفيف بعد الكشف طفشت ورحت للطوارئ وحولوني ع العياده لان ماعندي طلق كشف الدكتوره وقالت ٤سم امشي وربك كريم وعطتني موعد بعد ٤ايام
طبعا خلاص ما صرت امشي لان رجلي خلاص الم فضيع فيها
رحت للموعد وقالت بكشف قلت خلاص انا يئست متى ما جاءت الولاده جت قالت وهي تضحك الله يسعدها يدي مبروكه وممكن تولدين سوت كشف وشكلها عملت توسيع بسيط وقالت سوي تخطيط طلعت للمستشفى وسويت تخطيط ومافيه اي بوادر طلق قالت روحي للبيت ونامي مع زوجك وحاولي تمشين طلعت للبيت ومالي خلق جماع على كلامها طنشت وصليت العصر زوجي طلع بالاولاد للمكتبه وحسيت بنغزات بسيطه قلت اكيد حركة البيبي صارت متعبه جبت لقمه اباكلها من الصباح ما اكلت شي اكلت ملعقه والملعقه الثانيه خلاص ما قدرت صار طلق واكذب نفسي الام وتروح
يوم شد يابنااات في دقايق وادق ع زوجي تعال طيران جاء مخروش يقول طلعت مافيك شي خلاص ما اقدر امشي الطلق حامي. والآلام لا تطاق اتشهد وادعي ربي الولاده موت 😭 الله يجزا أمهاتنا. الجنه
رحت ع الطوارئ والرحم مفتوح٧ سم وجت الدكتوره تقول ما قلت لك يدي مبروكه والحمد لله ولدت المغرب ولله الحمد اولا واخيرا
فعلا ما ادري سرعه الطلق من الاشياء اللي عملتها او من التحريض
🤕بالنهايه هو يوم حدده ربي لكن احنا نستعجل. (وكان الانسان عجول) والحمد لله على تيسيره ياااكريم