الحمل بكيس على المبيض

السلام عليكم
من بدايه حملي وانا اقول اذا ربي تمم علي حملي بكتب قصتي للبنات الي مثلي ❤️
كانت البدايه جتني الدوره يوم وانقطعت وجلست تقريبا خمس ايام وقلت لازم اروح اكشف وش الي قطعها كنت اضن انه حمل ☺️


طلعت ذاك اليوم من الدوام وتوجهت مباشره للمستوصف افحص صارت النتيجه سلبيه قالت الدكتوره لازم نفحصك سونار ، اول ماحطت الجهاز على بطني واهي تجلس تسبيح وتهليل حسيبها ربي 😭🚨 انا هنا تمالكت نفسي وقلت وش فيه قالت عندك كيس كبير ع المبيض حجمه 6 الى7 سم
انا ماكنت اعرف وش الكيس وش ذا الاشياء وكان كلامها يخوف لدرجه حتى الان عندي ڤوبيا من السونار 😔 وعطتني حبوب تنزلها وقالت تعالي اخر يوم للدوره اشوفك (( بس هجيت مارجعت لها ))
طلعت من عندها قلبي مكسور وماعلمت احد حتى زوجي
وجلست اكل من الحبوب وكان اخر يوم لي عند اهلي وقلت لامي نروح لمستوصف ثاني وقالت نفس الشي ماراح وقالت نفس كلامها لاتمشين كثير ولا تشيلين شيء ثقيل وانه خطر وانه احتمال الانجاب عندك ضعيفه لين تسوين عمليه ازالته ولاعندي علاج له (( وكان خيره انهم ماعطوني علاج))
وقلت لها ان بروح عمره شلون تقولين ما امشي قالت كنسليها 🙁 قلت ابشري ورحت اعتمرت ولله الحمد ماجاني شيء
ورجعنا الحمدلله من العمره وعلمت زوجي ورحنا للحكومي طوارىء عشان ابدا معهم واشوف وضعي ونفس الشي قالوا نسبه الحمل ضعيفه بس قلت عطوني موعد عشان اتابع عندكم وخذت موعد ف نهايه شهر 8 كان بعيد يعني بعد 4 شهور
وطلعت من عندهم وقلت وتوكلت ع ربي يااااارب ما ارجع عندهم الا وانا اتابع حملي قلتها بيقييين قلتها وانا احس ان ربي يسمعني وكنت جالسه قايمه ادعي ربي لاتذرني فردا وانت خير الوارثين
جلست عقب هذي الدوره شهرين ماجتني وضاقت فيني الدنيا قلت يعني لازم علاج انزلها ورحت لمستوصف عشان اشوف وش العله قلت اخاف انه كبر حجم الكيس
واروح واول ماحطت السونار قالت انتي يابنتي حامل عشان مذا مانزلت الدوره 😭😭😭😭 حامل لي شهرين ياربي لك الحمد بس نفس الشي الكيس موجود
والخمدلله رجعت للحكومي طوارء ثانيه وعطوني موعد ف شهر 5 يعني قبل موعدهم 8 والحمدلله مارجعت للمستشفى الا وانا حامل وتابعت بالحكومي وانا حاااامل
وكل الي راجعت عندهم يقولون نسبه الانجاب ضعيفه
صح تضاعف حجمه صار 11في12 سم
بس قالي الاستشاري ماياثر باذن الله ع حملك وكثير صار لهم كذا
وولدت ولله الحمد ❤️🤱🏻
دعواتكم ان ربي ييسر لي ويبشرني انه راح مع الولاده لانه للحين موجود 😔
بس الحمدلله فضل ربي واسع ..
هذا تجربتي مع حملي كتبتها ع السريع وذكرت التفاصيل المهمه الدعاء بقوه والالحاح واليقين بالاجابه باذن الله ربي يستجيب ولاتنسون الدعاء بين الاذان والاقامه تحقيق امنايات بشكل عجيب ❤️✨