الحموله وماادراك مالحموله

السلام عليكم ورحمة الله وبركاته 00000
حبايبي ماتلاحظون دائما الزوجه تعاني من حمولتها يعني دائما الانظار عليها حتى لو كانو طيبين وحليوين00000

يعني انا مثلا حمولتي حليوين بس مثلا اذا جت عزيمه عند احد منهم وما حضرت واجتمعنا بعدها بكم يوم احس انهم مكتمين 000 احيانا اقول خيالات

واول ماتبدا الاجازه على طول يسالوني وزوجي وين بتسافرون؟احس اني شغلهم الشاغل فاقولهم مدري
يمكن مانسافر واذا نوينا نسافر مانعلمهم الاقبل السفره بكم يوم فاذا جينا احس انهم مكتمين ويرمون بالكلام يعني يقولون كلنا نسافر عادي والثانيه تقول مااحب اخبي عن الناس اني بسافر مع العلم اني ماادري عنهم الا وهم مسافرين بس وش دخلني اسال بتسافرون والا لا
وانا بصراحه مااحب اقولهم اي شي لاني مره كنت ابسافر انا وزوجي وتوني متزوجه ماصارلي 6شهور الا وهم يلصقون اختهم فينا (مابعد تزوجت) ويقولون خذوها معكم عاد انا ماانسجم معها وسويتها زعله

وانا عندي سلفتين يعني زوجات اخوان زوجي وحده احبها ووحده عادي ماانسجم معها وهم يحبون اللي انا ماانسجم معها واذا اجتمعنا يطيرون فيها طيره ويضحكون معها ويسولفون معها اكثر مني ومن سلفتي الثانيه مع العلم انا اصغرهم وتخيلو مره شافوني جالسه اسولف مع سلفتي اللي انا احبها وجت وحده منهم قالتلي بيني وبينها لاتسولفين معها كثير تراها تنقل الحكي؟؟؟؟عاد انا انصدمت:confused:
عيب عيب هذا الكلام والله عيب يعني لو اقول لسلفتي انهم يقولون عنها كذا والله تقوم الدنيا وماتقعدها وخاصه انها زوجة اخوهم الكبير بس انا اسوي باصلي وسويت نفسي ماسمعت شي 00

واذا شافوني لابسه لبس حلو عاد انا دايما لبسي حلو وذوق<<<<<<<<<تمدح نفسها:)
احس انهم يطالعوني من فوق لتحت واخرشي يسالوني من وين ويالله لازم يجبون مثله عاد هم ماعليهم يقدرون يجيبون اغلى شي بس مافي ذوق:o
وسلفتي اللي يحبونها اذا شافو عليها شي حلو انواع المدح والله انك تجننين اليوم وش هالزين

ومره صار شي احس انه قوي كنا مجتمعين انا وزوجي واخوانه واخواته وكنت جالسه بعباتي وجت بنت اخت زوجي تدور بالشاهي يوم وصلت عند زوجي قالتله انت اصلا من تزوجت وانت متغير علينا واذا صرت عند حرمتك ماتكلم علينا ولا تسال لاحظو بنت اخت زوجي حك ظهري عاد انا من تحت العبايه:angry2: :mad: انواع التعصيب خير انشاءالله وسكت وبلعتها

يعني بالمختصر اذا جيت ابروح عندهم اشيل هم مع ان جلستهم ضحك وسعة صدر يعني يوسعون الصدر مااظلمهم بس لازم نغزات اوحركات تضيق الصدر (ولا مايصيرن حموله)

وانا طبعي تراي هاديه ومااحب الكلام الكثير والقال والقيل يعني دائما اطنش حتى لو احد غلط او رمى علي كلمه اطنش وماارد عليهم ودائما مبتسمه والله دائما كلامي ينقط عسل مو مدح لنفسي لا والله بس دائما ارد بالكلمه الحلوه والطيبه

وهنا احب اقول كل وحده تدخل تقول كيف تعاملها مع حمولتها وكيف يتعاملون معها وهل يفرقون بينك وبين زوجات اخوانهم الباقين؟؟

وابي اقول شي اخير مهما كنتي تعانين منهم او من غيرهم احتسبي الاجر وطنشو ترا الحقران يقطع المصران ووسعو صدوركم واذا جيتي بتروحين لهم البسي احلى لبس ولا يهمك احد ولاتردين على احد :26: