الحواوشي المصري......يا ولد يا ولد يا ولد.

السلام عليكم ورحمة الله وبركاته.

الحواوشي أكلة مصرية سهلة وتفتح النفس وتشبع ومش بتاخد وقت....

المقادير:
نصف كيلو لحم مفروم مخلوط بدهن اللحم يعني مش احمر خالص ، ويفضل تحطي معاه ملعقتين من لية الخروف المفرومة.

بصلتين كبار مفرومين خشن.

4 قرون فلفل حلو و3 قرون فلفل حار ولو مش بتحبي الحار بلاش تحطي خالص ، لكن الحواوشي مش بيكون حلو إلا إذا كان حراق ولو حرقان بسيط.

ملح وفلفل أسود ، ولو حطيتي اي بهارات تانية ممكن تغير الطعم.

5 أرغفة من العيش المصري اللي بردّة حجم متوسط.

ورق زبدة للف الحواوشي.


الطريقة:

اول حاجة تشعلي الفرن وتعلي الحرارة على 180.

اخلطي المقادير كلها مع بعض لحد ما تتجانس خالص مع بعضها.

قسميها خمس اقسام متساوية.

افتحي العيش وحطي جزء من الأجزاء الخمسة في كل رغيف.

غلفي الأرغفة بورق الزبدة وبخيه بالميه بالبخاخة.

رصي الأرغفة في صاج الفرن وحطيه لمدة ساعة إلا ربع في درجة حرارة 200

بعدين افتحي عليه هتلاقيه استوى ولو عايزة تقرمشيه سيبيه كمان 10 دقايق.

واعملي معاه بطاطس محمرة ، وقطعي طماطم وخيار وخس . وبعض المخللات ..أو ممكن سلطة زبادي.

وقولولي رأيكم.