الحياه والروتين وافكار لكسره

ياصباح الفل والياسمين والكادي يازين هالاجواء الله يفرحنا بالمطر عاجل غير اجل
كيفكم خواتي غالياتي .. مااعتبركم الا خوات صدقوني


اول حاجه انا خلصت ثانويه وقعدت بالبيت سنه اتخير من ذا الخطاب واتدلع لا هذا مو عاجبني وهذاك قصير وهذا شعره خشن واشغل اخواني استخبارات ع شكله 😂😂 سبحانك ربي احسن الخالقين اللهم لاشماته
اممم ماكنت احس بالطفش هذيك السنه ليش لانو صديقات الثانويه جنب بيت اهلي وكل يومين زيارات وفله هذا غير خواتي ماشالله ماامل معهم وطلعاتنا وحتى كنت اطلع مع صديقاتي
ومرت هالسنه بشتائها وصيفها ووصل الفارس المغوار زوجي الغالي وبديت الهى بتجهيزات الشوفه والملكه وبعدها غراميات الملكه والزيارات وتجهيزات العرس و نصحوني خواتي الكبيرات اسجل بالجامعه واختبر قياس << اووه نسيت اقولكم اني نجحت من الثانويه بالددف لا وكاشخه يوم الشهادات كأني الاولى عالدفعه والله الاولى عالدفعه ماكشخت زيي يومها 😂
ونجحت بنسبه تفشل لكن الحمدلله نجحت عالاقل وانا اقضي للعرس اخذت بنصيحه خواتي سجلت قياس والحمدلله جبت نسبه ماتخيلتها في التسعين حظ يابنات صدقوني ولا انا عارفه نفسي زين ورحم الله امرىءعرف قدر نفسه انا وحده بالكشخه والترزز والاستعراض خذو رجال بس في الدراسه ولاا شي تماما طبعا استانست بالنتيجه وطرت حتى خواتي دقو عالمركز (قياس) يتاكدون لانه مو معقول بالتسعين مره وحده وطلعت صحيحه بعدها قمت اتخير بذا الجامعات سجلت باكبر جامعه في منطقتي وجاا قبولي وبنفس الصيفيه هذيك تزوجت ويوم بدا العام الدراسي بدا الدوام والفرقره بالاسواق لزوم الكشخه وهيگ ??
عاد بالكشخه مايحتاج الله يهديني اهملت الدراسه بشكل فضيع وانشغلت بالكشخه والصديقات والفله وتراكمت الواجبات وتراكمت الاختبارات لحد ماجا هذاك اليوم اللي سحبت عالمحاظره 3 مرات وحضرت بعدها فقالت لي الدكتوره انتي مهمله وراح ارسبك قلت ماتقدرين قالت نشوف ورسبتني فعلا كرهت الجامعه وقتها واعترف باهمالي وماكانت هي الماده الوحيده كان في غيرها 3 مواد وانا لازلت تحضيري !! قلت والله مااخذها ولا عاد بكمل وسحبت
بعدها سجلت بجامعه ثانيه وانقبلت ولله الحمد بس كان نظام الدراسه صعب جدا وانقلش وكررف حتى طلعت عيوني كرف على وجهي والله ماابالغ بس جد كانت صعبه جدا مع هذا خذيت فيها فصلين بالدف حتى لدرجه جاني نقص في النظر وعيوني ووجهي شحب واحس اني اهملت بعمري وبحياتي ولا عدت البنت اللي تحب تكشخ وتلبس وتنزل اسواق حتى انعزلت عن الجيران وانعزلت عن الناس من كثر ماكنت شاده الحيل واخرتها رحت لطبيب العيون قالي النظر ضعيف عندي ولازم نظاره هنا انجنيت وقلت يللعن ابو الدراسه على ابو هالجامعه استغفر الله ي ربي من القهر علىً نفسي بس قلت هالكلام رحت بعدها سويت انسحاب ونسيت الدراسه الجامعيه بلا رجعه وخصوصا اني صح في مجتمع كل من حولي جامعيات بس وش استفادو تصورو جنبها وهذا هم عاطلين لهم سنين لا ضمنو وظيفه ولا شي وانا عن نفسي وصلت لقناعه وسالت نفسي ولقيت اني اسهلي اضمن زوجي ولا اظمن هالظيفه وشلت هالدراسه من بالي بس طفششت وحسيت بالملل بعد ترك الدراسه بست شهور الروتين ممل جدا مااخفيكم فقدت جامعتي الاولى لكن لعل في الامر خيره رحت بعدها سجلت بنادي رياضي استمريت فيه 4 شهوراستانست وتعرفت ع صديقات+ جسمي صار جميل يالله لك الحمد بس توقفت بعدها عشان الحمل ووابي افكار لما بعد الولاده اكييد بستمر بالنادي بس ابي افكار استفيد منها في اوقات الفضاوه والطفش وتفيدني بنفس الوقت مو بس انا ابي كل الطفشانات زيي يستفيدون ودي بشي اذا ضاع وقتي فيه ماضاع هباء منثورا ابي اضيع وقتي بشي يفيدني شخصيا و يطلعني من الطفش ويجمعني بصديقات لاني اجتماعيه واموت من الوحده ولا احبها واعشق تكوين الصداقات