الحيرة والخوف جننوني . اتمنى كل زوجة ثانية ترد

انا منفصلة من سنة ونص بدون اطفال و عمري 26
تقدم لي الكثييير واغلبهم متزوجين وعندهم عيال وكنت ارفض على طول بدون حتى نسأل عنه لأني مابي اكون ضره لأحد ولأني آخذه فكره عن اي واحد متزوج وعنده عيال ويبغى يتزوج ثانية يايكون يبغى يأدب زوجته أو يجرب الثانية إن عجبته ولا طلقها ..
تقدم مطلق بس رفضته لان سببه مو واضح وخايفه يكون العيب منه وتقدم اعزب عمره فوق 35 ورفضته لانه مدخن وأنا مستحيل اعيش مع مدخن..
تقدم لي الحين متزوج من 13 سنة مارزقه الله ذريه عمره 42 والرجال الكل يمدحه ويثني عليه يصلي ويخاف ربه ويقول ان بينه وبين زوجته مشاكل كثير وصابر عليها كل هالسنين يبيها تتعدل والحين خلاص قرر يتزوج ، ومن كلامه انه بيعدل وكل وحده بيحطها ببيت وبيصرف عليها و طبعا زوجته واهله يعرفون انه بيتزوج ولما حاولنا نسألهم عن السبب ان الله مارزقهم اولاد هل هو منها أو منه وقال ان مافيهم شي وتحاليلهم سليمه بس فيهم عين ..
مااعرف ايش اسوي استخرت وفيني خوف شوي من ناحية ان ربي مايرزقني عيال منه ومن ناحية فرق العمر تقريبا بيننا 16 سنه ومن ناحية ان زوجته ممكن تتعدل بعد الزواج ويطلقني ..
انا كنت افكر اول ماانفصلت اني مستحيل اخذ متزوج بس اللي شفته عندنا المطلقة مايتقدم لها الا متزوج او مطلق ويكون فيه شي او حتى اعزب وفيه عيوب ماقبلتها البنت وراح تقدم لمطلقة..
ودي أتفائل بس تجربتي الاولى صدمتني وصرت ماأثق ..
الله يرضى عليكم انصحوني وياليت كل وحده قبل تكتب كلام يجرح تحط نفسها مكاني ..
اللي كتب لها الله تكون زوجة ثانية تقولنا تجربتها عجزت اتخيل نفسي لاني انسانة مسالمة وخايفه تصير لي مشاكل اللي اكيد بتكون مع اي واحد عنده زوجتين..
انا خااايفه حيييل من التجربة الثانية أكثر من زواجي الأول مابي أعيد معاناتي 😢