الخبــيره بالتعامـــل مــع الخادمــات..

السلام عليكم
أخباركم يابنات ..؟؟
ساعدوني تكفون عندي خدامه ماني عارفه أتعامل معها أتعبتني..
ويعلم الله أني خسرت عشان تكون عندي بسبب ظروفي الصحيه..
كنت مختلفه مع زوجي في الرأي كان ودي بخادمه متعلمه وتفهم وهو يقول اللي ماأشتغلت أفضل تعلمينها على يدك..
المهم هذي نيباليه عمرها 50 أخذتها بالتنازل وكان لها 3 أشهر بمبلغ 27,000
والمبلغ بعت الذهب وزوجي تسلف الباقي واللحين لها عندي 3 أشهر..
وتعرفون أغلبنا ساكنين شقق..
يعني شيء ماهو متعب بالشغل..
3 غرف وصاله و2 دورة مياه..
وشقتي حاطه على السيراميك قطع سجاد كبيره بحيث تغطي الجزء الاكبر خوفا على عيالي من الطيحات والتمسيح جزئيه بسيطه..
حتى الملابس كانت تغسلهم وبعدها أكتشفت من ريحتهم أنها مجرد تغسلهم بيديها وبصابون بسيط..
صرت لازم أشرف عليها ماتغسل ألا وأنا أشوفها..
الكوايه تقول طاحت وأنكسرت وأصلا كوايها شين صار زوجي يكويهم في المغسله..
وماتطبخ..
الزبده شغلها بالبيت مايجي ساعه الصباح تمسح التلفزيونين وتغسل الدورتين فقط..
أنا عندي طفلين الكبير عمره3سنوات وللامانه شقي وبنت عمرها سنه..
اللي دوم تسويه أنها تجلس مع الطفله وتخليها تحوس وتطيح وهي بس نايمه..
ماعرف وش سالفة النوم معها فيها نوم حمير..أستغفر الله ماتشبع..
طبعا ماتقوم بالولد لاترويش ولاتأكيل ولا شي نهائي..
كل شي علي..
واذا شافته يكسر أو يلعب بأي شي ماتكلمه تخليه بحجة أنها ماتقدر عليه والاكل تقول مايرضى..
واذا جات السالفه على الفازلين حقها تعرف تدسه بوسط الغساله بدورة المياه لاننا نقفل الباب ونعلق المفتاح شفتوا الحرص على أغراضها وين يوصل..
لكن أشياء البيت خله يعوث فسادا فيها..
بالليل تنام من10 وماتصحى الا 8 أو 9 رغم اني اقول لها تقومين 6 ولاحياة لمن تنادي..
أقول لها شوفي بابا ينام متأخر ومع ذلك يقول الساعه7 للدوام لانه لو تأخر بيخصمون عليه وأنتي تنامين قبله ويروح الدوام وانتي نايمه...
وأنا ماأنام ألا متأخر بعد ماأنوم العيال وأقوم أزين الفطور وأرجع أنام وأنتي فاطسه..
ومن أقوم للغداء ماعاد أنسدح وأنتي كل شوي نايمه..مايصير كذا..
واللي قاهرني أني مرشحه للتدريس كيف بترك عيالي عندها كيف بتعتني فيهم..
يعني حتى جلستها مع العيال مافيها فايده,,والله لما أروح المستوصف وأنا تعبانه آخذهم معي لاني ماأضمنها تنام عن الصغيره أو تترك الولد يطيح عليه شي أو يلعب بالكهرباء..
هذا غير الشراهه بالاكل بشكل ماهو طبيعي والله تآكل أكثر من أكلي مع زوجي..
واذا جاء الولد يبي ياكل معها مستحيل تخليه تقوله روح لمدام هذا حار جشعه لدرجة أنها توقف عند المجلى وتأكل عشان مايطول يآخذه..
تقهرني أقول لها تراه كثير وبابا اللي جايب الاغراض وأنا اللي طابخه..
عطوني حلول الله يسعدكم..
جايبتها عون صارت فرعون..
بس تبي تآكل وتنام
أحس أن قلبي تعبان منها..ورأسي دوم مصدع..ماأحس أني أستفدت شي..