الخدامه و زوجي ... قصة للعبره

السلام عليكم ورحمة الله وبركاته

راح اقولكم قصة صديقتي .. طبعا هي معانا بالمنتدى بس ما تبي تكتب بمعرفها لان ما تبي احد يعرف هالقصه من اهلها ...

القصه للعبره وعشان كل وحده تنتبه لخدامتها وزوجها حتى لو واثقه بزوجك مئه بالمئه ...

القصه على لسان صديقتي ....

كنت احب زوجي بجنون وواثقه فيه تمام الثقه لانه كمان كان يحبني بجنون ويلبي لي كل طلباتي لدرجة ان اهلي واهله دايما يحسدونا على علاقتنا الحلوة .. وعندي ولدين الكبير 8 سنين الله يخليهم لي .. انا موظفة ودوامي ل الساعه 6 وزوجي مفصول من عمله بسبب مشاكل بالشغل ويبحث عن عمل ثاني يعني كنت انا المعيل الوحيد للعيله في هالفتره .. يعني كان زوجي والشغاله طول اليوم مع بعض .. وهالشي غلط كبير مني طبعا لكن ما انتبهت الا بعد فوات الاوان ..

في هالفتره كنت الاحظ ولدي الكبير دايما شارد وحزين قلت يمكن عشان ابوه انفصل وهو زعلان مع انه في عمره ما يعرف لهالامور ... المهم في يوم من الايام جلست اسولف معاه واحاول اطلع منه كلام .. وبعدين قام يبكي !!! قالي ماما انا ما ابغي اقولك عشان ما تزعلي من بابا وتروحي عنه ... قلتله انا مستحيل اروح عن بابا واوعدك لو قلت لي الحين ما راح اروح عن بابا طول العمر .. قال لي انا شفت بابا يبوس عائشه طبعا هاي اسم خدامتي لانها مسلمه .. انا هنا من الصدمه افتر مخي وقعدت اتذكر مواقف كثير صارت قدامي بس ما كنت منتبهه لها كنت مثل العمياء اللي ما تشوف شي ... وقتها حاولت اتمالك نفسي ما اعرف من وين جتني القوه وضحكت في وجه ولدي قلته حبيبي بس هذا اللي مزعلك ؟. هذا عايشه كان فيها شي وانا كلمت بابا في التلفون وقلت له يشيله طبعا حسيتها ما مشت عليه لكنه لما شافني اضحك ارتاح وقام يضحك واشوى انه كان وقت متأخر نيمته ورحت غرفتي ابكي بحراره من الصدمه ويومها زوجي ما كان موجود رايح مع اصحابه وبيتأخر ..طبعا السوسه شافتني ابكي وجتني تقولي ايش فيه مدام كان ودي اقتلها لكن قلتلها ان بطني يألمني الم قوي وراحت سوت لي دوا الله اعلم ايش حطت لي فيه و ما شربته طبعا .... وبعدها قلتلها ان بطني خف علي وروحي نامي .. بعدها عملت نفسي نايمه عشان ما اشوف زوجي لما يرجع لان ما بقدر اجامله مستحيييييييييييييييييييل وهو يعرف ملامحي اذا حزينة او متضايقه وحاولت انام لكن ما غفت لي عين وبعدها قمت اصلي ودعيت ربي من كل قلبي انه يساعدني في اللي نويت اسويه وكنت ابكيييي (( صدقوني يا بنات سهام الليل ما تخطىء)) .

لما طلع الصباح كعادتي طلعت كأني بروح دوامي لكن اول شي سويته كلمت اخوي لان هو مخلص ويقدر يسوي لي واسطة وقلت له ابغيه يسفر خدامتي لاني شفتها تطلع مع شباب وما ابغي ابلغ زوجي اخاف يقتلها لان زوجي معروف عصبي ... وكنت استغفر ربي عشان يسهل لي الامور ويصبرني .. وفعلا ما شفت الا اخوي متصل لي يقولي حجز لها اليوم بالليل طائرتها !! اما في داومي فقدمت استقالتي وقلتلهم لظروف عائليه.


رجعت البيت وزوجي هالوقت يكون نايم ... خذيت عيالي لجارتي عشان ما ابيهم يشوفون اللي بيصير .. ورحت للسوسة في غرفتها وقفلت علينا الباب .. قلت لها طلعي شنطتك وحطيت فيها الاغراض اللي جت فيهم بسس و ضربتهاااا ولاول مره اضرب احد في حياتي لكن من الحره اللي في قلبي ... طبعا الضرب ما كان تعذيب كان بس ضرب تأديبي عشان محد يقولي حرام .. وقلت لها انتي عملتي كذا وقعدت تقولي استغفر الله وانا ما اسوي كذا وهذا حرام وهي اصلا ما تعرف من الحرام شي .. هالوقت كنت متفقه مع سياره تاخذها لاني خفت اخلي اخوي يوصلها وتقوله كل شي .. وراحت وانا ادعي عليهااا ... طبعا عطيتها رواتبها اللي عندي عشان ابري ذمتي ..


وبعدها رحت لزوجي صحيته و عطيته ظرف وهو مستغرب ... فتح الظرف شاف فيه نسخه من تذكرة السوسه اللي سفرتها ونسخه من استقالتي من العمل ... كان مصدوم .. يقولي ايش هذا .. قلتله مو عيب ان فلان ( ولدي الكبير ) يقولي بابا يبوس الخدامه وهو حزين !! ما خفت على مشاعر ولدك .. والله اعلم قال لمن بعد غيري ... وانا خلاص بستقيل وبقعد في البيت عشان اهتم ببيتي وبنفسي لان انت مو قد الثقه وانت تقدر تدور لك شغل لان انت اللي المفروض تعيل العيله مو انا .. وهاللي صار ما قلته لاحد لكن والله لو تكرر الا ما لي قعده في هالبيت والعيال خلهم عندك ربيهم انا ابي اشوف حياتي مع واحد يستاهلني .. طبعا وكلام كثير ما اذكره الحين لكن اللي اذكره انه كان مصدوم وسااااااااااااكت وبعدها طلعت اشوف التلفزيون كاني ما هامني شي لكن قلبي كان محروق وبالي نهائيا مو عندي ... بعدها جا اعتذر لي وقال لي انا ماعرف كيف الشيطان عماني وهيا اللي كانت تجيني وكلام كثير ... وبعدها تميت فتره زعلانه وهو يحاول يرضيني بأي طريقه وكان دايم يدلع ولدي الكبير لانه شاف وخايف انه تتغير مشاعره ناحيته ...


وهذي قصتي ... زوجي بعدها تغير وصار مستحيل يشوف غيري ولقى له شغل وانا بالبيت اربي عيالي واشوف حياتي ونفسي .. طبعا سامحته بعد مده لكن كان دايما في قلبي شي عليه ... واهلي واهله ما يعرفون بالموضوع وهالشي كبرني في عينه والحين صار يحسب لي الف حساب ...