الخوف من التبرز عند الاطفال ساااعدوني

السلام عليكم اخواتي ...
مشكلتي مع ولدي اللي عمره ثلاثه ونص اكرمكم الله ,,
انا حامل وحبيت اعلمه على الحمام قبل مااولد في البدايه كان زي اي طفل اخذ مني الموضوع يومين وصار الحمد لله يتحكم في البول ولكن يتبرز على نفسه ,,
وكنت اعرف ان هذا طبيعي وصرت اركز معاه اكثر واول مااحس انه بدأ يسويها اشيله وادخله الحمام والحمد لله كان يكمل وعاادي استمرينا تقريبا اسبوعين وكان مره يسوي بالحمام ومره على نفسه يتخبى بمكان ويسويها بعدين يناديني في هذا الوقت كانت عندي شغاله بس ولدي ماكان يحبها ابداا مع اني مااخليه معاها لوحدهم حتى بالحمام اكون معاهم ,,
بعد اسبوعين صار الولد مايتبرز قالولي طبيعي يجي امساك مع تعليم الحمام وكل الاطفال كذا حطي تحميله وساعديه وطولي انتي وهو بالحمام وان شاء الله يسوي ,,
مرت 6 ايام وانا على طول احاول معاه ومافي فايده وديته لدكتور وقال لازم حقنه شرجيه ومن هنا بدأت مشكله ولدي ,,
لما سويتها كنت انا وامي وولدي من الخوف شفايفه صارت زرقاء واطرافه تنتفض وخايف مايبغى شئ يخرج منه واول ماخرج غصب عنه صار يقول ياماما غسليه شيليه كان خايفه من شكل البراز وقرفان مررره ومغمض عينه اول مره اشوف ولدي كذا خفت عليه وقلت مستحيل اسويها مره ثانيه ,,
بعدها كتبله الدكتور ملينات للبطن وتحاميل وكنت اسويله زيت زيتون بالابره في الشرج ومرت 6 ايام وماتبرز وكتبله حقنه شرجيه ثانيه وقالي خذيه عند اختصاصي جهاز هضمي لان الملينات ماجابت نتيجه سويتها له ونفس المره الاولى اخذته مستشفى ثانيه وسووله اشعه وتحاليل وعرضته على جراح والكل قال سليم الحمد لله قالتلي الدكتوره راح نعطيه جرعه ملين كبيره وبيجيه اسهال بعدها وتنحل المشكله والله يابنات جلس يتمغص يومين وثالث يوم سوا شئ بسيط سوتله حميه الدكتوره ومافادت جربت اخليه على الزيت المقري والزمزم واخرتها حقنه شرجيه ..
اخر شئ عرضته على دكتوره كل يومين اوديه واقولها الملين ماجاب نتيجه وتغيره لحد ماوصلت لملين يناسبه ويخليه مايقدر يمسك نفسه قالتلي انه اللي سويته خلى ولدي يوصل لهذي المرحله المفروض العلاج يكون عن طريق الفم فقط عشان مايخاف اكثر من تحت ,, كتبتله العلاج يومين وسواله اسهال والحمد لله نظفت بطنه طبعا يسويها بملابسه وبالخوف وهوا ماسك فيني بس الحمد لله المهم صار يوسخ بعد كذا قللت الجرعات واعطيه زيت زيتون على الريق كل 3 ايام صار ينزل شويه وبالخوف وبالقوه مع انه مويا مع الملينات مايحتاج شئ ..
يابنات صارلي اعاني مع ولدي اكثر من شهرين والله اذا سواها نسويله حفله وهدايا وثاني يوم نروح الالعاب بس مافاد وقربت ولادتي وخايفه عليه فكرت اوديه عند دكتور نفسي بس كل الدكاتره اللي زرتهم قالولي ماراح يستفيد من الدكتور النفسي لانه صغير وبس يكبر ويفهم بتنحل مشكلته ,,
والله مو اهمال مني او تقصير لما جبت الشغاله بس انا كنت ممنوعه من الحركه وممنوع اشيله وهيا فتره بسيطه كانت وماكنت اخليهم لوحدهم وولدي ماشاء الله يتكلم يعني لو احد سواله شئ على طول يقول مااتوقع منها بس صرت اشك بكل شئ ..
بنات ابغى اعرف في احد تعرفوه مر بنفس مرحله ولدي وايش كان علاجه ..
اللي ماقد سمعت عن مشكلت ولدي اتمنى تدعيله وشكرا ..