الدنيا صارت تخوف

السلام عليكم ورحمة الله وبركاته...

مساكم الله بعافيه وستر وأمان....

انا قاعده اكتب من الجوال يعني لو فيه أخطاء مشوها....

والله يابنات مدري وش اقول احس عندي كلام كثيييييير ودي اقوله لذلك بفضفض والفضفضه ماتجي مرتبه يعني كل ماجا ببالي شي سدحته...

زوجي اذا قلتله عن هالاشياء اللي تدور براسي يقول ارقدي بس يالموسوسه طبعا ابربر عليه اذا جيت انام هذا الوقت اللي اعبر فيه عن شعوري ﻷن اليوم كله مو موجود المهم...بقولكم وش عندي بس طلبتكم بدون رحمه او مثاليه تقولولي الصدق اعتبرونياختكم:mad: اخلصي علينا...طيب طيب هدو اعصابكم


مدري وش احس فيه. احس الحياه تغيرت ادري ماجبت شي جديد بس احسها مره تغيرت ..تكفون لحد يجلدني مدري وشلون اعبر ....اليوم مافيه بركه نصلي الفجر وشوي نصلي الظهر شوي اذن العصر وووووالخ راح اليوم احس مافيه بركه حتى بعض الاشغال مايمديني اخلصها ...


البزران مررررره عصبيين واشقياء ويمشون راييهم اللي يبونه ياخذونه والله يبنات ما اكذب عليكم حمودي بالتمهيدي والصغير عمره سنتين كأنهم بالثانوي يوم يتضاربون اقسم بالله يطلع دم يعضون بعض وتمخيش وحذف بالالعاب وتروني جننوني انتو زي والا عيالي من عالم اخر كرهت كل شي بسبتهم لاتقولون ابالغ انا بطبعي اتوتر من الصوت اعالي والصراخ ...صرت اصارخ عليهم ويوم يكونون مندمجين بالمضاربه واجي افرع بينهم يالله افكهم من بعض يخوفون الكبير عصبي وعنيد ومزاجي ذبحنا باسلوبه جننا ضربناه مافاد عاقبناه جبناله هدايا عنده ايباد طبعا الايباد حارمته له شهر يستاهل فقع كبدي يطيحه كل شوي متهاون مو حريص على اغراضه بعكس اخوه في حاله بس لو احد قرب منه ياويله يعني اتقي شر الحليم اذا غضب.....على فكره اكتب الحين واسمع صوتهم يتهاوشون....


المشاكل احسها زادت كل يوم ادخل الاسريه واصعق من المشاكل شي يخوف مافيه رجال وين رجال زمان انا ما اقولكم مابيني وبين زوجي مشاكل لا والله تقريبا شبه يومي مشاكلنا وتتفاوت فيه العاديه وفيه الكبيره بس من طبعي ما احب اعلم احد مشاكلي ولاعمري كتبت مشاكلي هنا ﻷن محد بيفيدني الا ربي البنات بيعطوني خيارات بس هم ماعاشو الوضع ....


مافيه امان الامان من ربي سبحانه بس اﻷمن ملحوظ انه متدني الاثيوبيين متنثرين بالسعوديه خصوصا بالجنوب والقضايا كثرت ...مخدرات اغتصاب سرقه وووووالخ بجي للقتل كثر بشكل يخوف مو اخر الزمن كثر القتل شوفو الدول اللي حولنا الله يطفي نار الفتنه ويجمع كلمتهم وينصرهم....بس عندنا هنا كثر القتل اعطيكم مثال اثيوبيين دخلو على واحد وقتلوه وش ذمبه ليه!!!!! مو اخر الزمان المقتول مايدري ليه انقتل الحين هالرجال مايدري وش السالفه دخلو عليه وقتلوه...غير القتل اللي وقت التفحيط...والقتل على اراضي وعلى اشياء كثيره يتدخل بينهم الشيطان....



الاقارب تقاطعو في السنه حسنه يجتمعون واذا اجتمعو شايلين على بعض قلوبهم مهيب صافيه وتنتهي الجمعه وكلن يحش بالثاني ...اول العزايم لها طعم وبسيطه مافيه تكلف ...الحين السفره من والى وياليتهم يشكرون الا يسبون مايدرون المسكينه قعدت النهار كله تشتغل غير فلوس الطلبات 600والا 800..بعض البنات معد صارو يجتمعون لان ظروفهم الماديه ماتسمح معد حضرو الجمعات عشان محد ينقد عليهم ليه طيب ليه كلن وظروفه اهم الجمعه والسوالف .....


المناسبات واخصص الاعراس ...انا ما احضر الا في السنه حسنه طبعا قرايب فقططط ولحسن حظي اني في منطقه مو كل قرايبي فيها لاني اتضايق من المناظر اللي اشوفها بالعروس....حظرت قبل شهر ليتني ماحضرت طول الوقت وانا على اعصابي الطق والزفه اسلامي البنت ملتزمه ماشاء الله...بس الحضور وش اقول ياربي الظهور والفخوذ طالعه:mad:


انصدمت يابنات اخر عرس حضرته قبل 4سنوات صح كان فيه بنات متعريات بس يمكن قله وكانو بس ايدينهم وقصير تحته كولونات ....اللي شفته هالمره امرضني ااااااااه يابنات بنات المسلمين كذا المشكله امهاتهم مو راضيات بس وش يسوون هذا كلامهم.....


الامراض كثرت كل يوم اقول بكره بقوم وانا فيني المرض الفلاني اي شي يجيني اقول المرض الفلاني . وبنفس الوقت اهدي نفسي واقول واذا مرضت عادي تكفير للذنوب وابتلاء من الله لازم اصبر مصيري بموت خل اموت وذنوبي تمحصت..يجيني نغزاتةبقلبي اقول يمكن بموت وافكر دايم بموت الفجأه كثر يابنات .....


كل سنه اشر من اللي قبلها الرسول عليه الصلاه والسلام اقر بهالشي...وكل سنه تقرب الشمس من الارض مقدار شبر والدليل الحر القاتل ...حتى الامطار قللللللللت....الناس تباعدو ...تحاسدو ...العمران كثر .....زبدة كلامي افكر كثير بالموت وعلامات الساعه...انتو زيي ...معد احس بطعم الحياه ...بتقولون فيك اكتئاب نقص فيتامين دال...فيتامين دال قاعده حاليا اخذ علاج ...كان قبل فتره عندي نوبات ذعر وتعالجت الحمدلله وطبعا تروح تجي بس بين فتره وفتره....

احس اللي فيني عادي لانه الواقع بس ابي العب على نفسي واقول يمكن اني موسوسه على قولة ابو حمودي...يعني كأني مابي اقر بالواقع....



بنات طال الموضوع اسفه ....في جعبتي الكثير بس حبيت افضفض...تكفون قلولي الدنيا باقي بخير والا صدق الدنيا تخوف...ادري بالحديث اللي بمامعناه الخير في امتي الى قيام الساعه بس انتو تحسون باللي احسه والا انا موسوسه....


سبحان الله والحمدلله ولا اله الا الله والله اكبر.