الدنيا صارت تخوف

السلام عليكم كيف الحال
مدري كيف ارتب لكم الكلام مصدومه من اللي يصير
صديق ابوي بنته متملكه وكان باقي على زواجها اسبوع وخلصت من التحهيز وكانت مبسوطه فجئه طلق بنتهم بدون سبب يقنعهم البنت انهارت مو عشان الزواج لا عشان الحسد صاروا بعض الناس يحسدون بعضهم وصارت الاعراض المحصنات لعبه
والله ناس ونعم فيهم اجواد ومتربين احسن تربيه وناس ملتزمه وجيران من عمرررر ماشاءالله حنا وهم زي الاهل


وحده اعرفها البنت تخرجت وماشاءالله جميله وخطبوها ناس بعد التخرج ماشاءالله ارسلت ام الخاطب لامها تعتذر وماتبغى البنت
طبيعي ام البنت تسأل وش السبب قالت ام الخاطب وحده اتصلت وتعرفكم وقالت بنتك تطلع مع شباب ومومضبوطه وحلفت بالله
والله البنت ماتطلع الا مع امها وخلوقه ومحترمه وخوافه مستحيل تطلع لحالها حتى لو عزموها صديقاتها تاخذ امها واعرف البنت عز المعرفه ومن قرابتي كانت صدمه لي من سمعت خبرها لو وحده ثانيه متكلمين عليها قلت يمكن البنت انجنت وامها ضاق صدرها قذف المحصنات عشان زواج والله لو هي مبشره بالجنه اقول يمكن يحسدونها


صديقه لي كنا نشتغل في مدرسه اهليه ومعروف الناس تصعد على بعضها عشان المناصب مو مثل الحكومي وظيفه ثابته
المهم هي متزوجه وعندها ولد وصلت خبث معلمتين يشهدون زور عليها بعرضها وتسببوا لفصلها من الوظيفه بدون شهود او شي يثبت والله طلعت وهي تبكي وتتحسب


ومره وحده ثانيه جاء قرار ترقيه المهم البنت ابوها صديق ابوي واعرفه رجال كبير ولحيته بيضاء وناس محترمه البنت طلعت وركبت مع ابوها اعرف سيارته وسمعت معلمه تتكلم على 6 معلمات تقول لهم شفتوا فلانه السياره اللي ركبت فيها مو ابوها هذا واحد تطلع معه وابوها ياغفلينهم الله على باله تطلع متأخره والله الدنيا صارت بعيوني سوداء وانتفض من هول الكلام والارض مو شيلتني على طوووول اتصلت عليها قلت لها ارجعي ابعطيك فلوس القطية وانا تعبانه قالت خلاص رجعت ورحت لسياره وطقيت القزازه اللي جهت ابوها ونزلها وعطيته الفلوس ورجعت وانا متقصده اشيل الحياء واعطي الفلوس من جهة ابوها عشان اثبت براءتها ولا قلت لها ابد


اخوي خطبنا له وحده من اقاربنا كلمت اهل المخطوبه وقالت لاتوافقون عليه الولد مطرود من بيت ابوه الله يستر عليه اتصلت امها وقالت لامي والله امي انجنت
ابوي مستحيل يطرد احد من عياله الحين يخاف عليهم من دخول العسكريه شلون يطرده ماقول الا حسبي الله ونعم الوكيل والحمدالله سألوا عنه وتأكدوا وربي غاض اعداءه وتم زواجه ماشاءالله


مره انا بعد تخرجي صرت اخيط في البيت واستقبل زبائن في بيت اهلي بالدور الثاني جناح واستفدت منه وحده قريبتي بالحيييل طلعت عني اشاعه اني اخيط في مشغل بالسوق وداهمته الهيئه صاروا الناس يدقون يتاأكدون انا وقفت الخياطه ولا لا


ومره في وحده في الكليه صار بينهم سوء تفاهم على تصميم فستان بالخياطه وحده من المجموعه حقدت على اللي عارضت على الموديل من طلعنا بالطلعه وجت البنت بتركب مع اخوها بلغت عليها انها تركب مع شاب وحراس الامن مسكوها وسحبوا شنطتها قدام الناس والبنت تبكي وكانت مخطوبه وجاء اخوها الاكبير معه اثبات لاخوها الصغير اللي جاي ياخذه والبنت صار كل يتكلم عليها ويطلعون عليها قصص تركت الكليه وفكت خطوبتها




وش صاير بالمسلمين سحر حسد حقد وقتل والله صارت الدنيا تخوف ونعدمت الثقه بين الناس خصوصا اللي انظلموا
يعني وش الحل ؟؟؟
الناس تسكر على نفسها في بيوتها ولا
ولا تطلع وفاقده الثقه بالاقارب واناس
مصدومه على الخبر اللي سمعته بوحده من اقاربي ومقادره استوعب هول اللي يصير بين المؤمنين


لاحول ولاقوة الا بالله
وحسبي الله ونعم الوكيل