السلام عليكم.. الله يذكركم بالشهادة ان شاءالله... ذكرتوني بالموضوع و انا كنت قايلة اني بكتب عن الدوكين موضوع كامل.... الله يسلمك بشرتي كما ذكرت سلفا (حصة عربي) كانت مختربة من الصيف و الحر و المراكض في الشموس و الدوام و النفسية و كل شي يطري على بالكم... المهم صديقتي طبيبة جلدية و كنت مب شايفتها من فترة و يوم شافتني قالت لي ليش مخلية ويهج جذي.. المهم ما قصرت رحت عندها المستشفى و كتب لي على أدوية أولها لوشن عشان احطه على الحبة أول ما تظهر عشان تيبسها و بعدين احط فيتامين على ويهي مادري شو اسمه لأني مب في البيت الحينه انا في الدوام... و بعد ما مرت فترة قالت لي اخلط الدوكين مع شوية ريتن مع دوا ثاني مادري شو اسمه بس طبعا نسبة الدوكين كانت اكثر شي لأنها كانت تبغي نتيجة حق ويهي انه يصفى من البقع اللي طلعت لي و الريتن يمكن يقشرها ..... و انا هات يا احط كل يوم و ما انساه ابد .. أول يومين حسيت بشرتي شوي جفت .. بس بعدين الحمدلله مشى الحال... بس في الويكند أحيانا احطي الفيتامين اللي عطتني اياه بالأول...و اللوشن تراه ماشي حاله من تطلع لي حبة... والله يا بنات الله يجزا الطبيبة كل خير و سعادة و الزوج الصالح.. لو اقدر أوصف لك بشرتي كيف كانت تعبانة و مرهقة و كل حد يقول لي ويهج كأنه مسلوخ.. الحينه ماشاءالله تبارك الله (الله يخليكم قولوا ماشاءالله) بشرتي واااايد تحسنت بشكل ما تتصورون مع اني طول الوقت احن على الطبيبة أقولها متى تبين نتيجة الدوكين لأنه يفتح تقول ما عليه اصبري شوي هذا مب خلطة كيماوية.. هاي اشياء طبية لازم نطول بالنا... و ان شاءالله باقي الشهر الياي و اخلص علاجي بس بصراحة مووول مب متعب و يتشربه الوجه على طوووول يعني ما كأنج محطية شي...بس تراه قبل النوم مب من اللقافة تحطون و تراكضون برع... الله يجملكم و يعطيكم بشرات حلوة يا رب... و سلامتكم و اتمنى أكون أفدتكم بتجربتي
الصفحة الأخيرة
قل لن يصيبنا إلا ما كتب الله لنا