الديك عزوز ... والمهرج العجوز ..!!

كان يا ما كان ، في قديم الزمان ، كان في الديك عزوز على طول يصيح كو كو .. الصبح كوكو، والظهر كوكو والعصر كوكو ، وبالليل كوكو ، وكان في المهرج العجوز اللى على طول يجيب عنزاته بالحديقة اللي فيها بيت الديك عزوز ، علشان ياكلون ويلعبون ، بس هالعنزات تأذوا وايد من الديك عزوز وصوته العالي ، وقالوا بينهم وبين بعضهم احنا لازم نقول حق مهرجنا العجوز يشوف لنا حل مع الديك عزوز المزعج محنا قادرين نستانس ولا ننام ولا ناكل من عنده ..
وفعلا راح المهرج العجوز حق بيت الديك عزوز وقاله : شوف يا ديك عزوز اذا ما يزت عن سوالفك وازعاجك ترى أعلم الذيب عن بيتك وأخليه ياكلك ، وبعد ما راح المهرج العجوز قعد الديك عزوز يفكر شلون يعاقب المهرج العجوز وعنزاته ... ، وبعد تفكير قال بينه وبين نفسه : اييييييي ما في الا أعلم الذيب عن عنزاته ، وأتغدى فيهم قبل ما يتعشون فيني !!!
وراح الديك عزوز حق بيت الذيب وأول ما شافه الذيب قاله : جيتني بريولك يا الديك عزوز أنا جوعان وما تعشيت تعال خلني أفصفص عظامك !!!
قاله الديك عزوز : لا لا يا معود ، شدعوة تفصفص عظامي انا ما فيني لا شحيم ولا لحيم ،انت جوعان ، قاله الذيب : وايد ، أدلك على عنزات وايد وفيهم شحيم ولحيم ..! ، قال الذيب : قول يا الديك عزوز تقفا ، قاله الديك عزوز بخبث :وحده تتعشا فيها ، ووحده تتغدى فيها ، ووحده تعزم عليها ربعك ، ووحده تفصفص عظامها تفصفص ..!!! ، قاله الذيب : قول يا الديك عزوز وينهم فيترى صبري نفذ ، قاله الديك عزوز : هذا مفتاح البيت ، والمهرج العجوز ألحين نايم ولا يدرى عن شي ، يعني اخذ راحتك ولا تخاف .
راح الذيب يتسحب حق بيت المهرج العجوز ولما وصل طالع حواليه ما شاف أحد فتح الباب على العنزات ولما شافهم ما صدق عيونه وقال : هذي العنزةاللي راح اتعشا فيها وهذي أعزم عليها ربعي ، وراح الذيب يبي يهجم عليهم وما يحس الا عصاة المهرج العجوز تكسرت على ظهره ، وبعد العقاب اللي شافه من المهرج العجوز راح حق بيت الديك عزوز وهجم عليه
وهو يقوله : انا أراويك يا الديك عزوز خدعتني وقلت لي ان المهرج العجوز نايم ، تعال خلني أفصفص عظامك ، وقام الديك عزوز يستنجد ويقول : هدي أعصابك لا تاكلني ......وبعد ما أكل الذيب الديك عزوز تخلصوا منه المهرج العجوز وعنزاته ، وصارواينامون ويلعبون براحتهم .

مرحبا يا بنات ......
هذي قصة الديك عزوز والمهرج العجوز اللي ما تمل منها ولا تشبع بنت أختي الصغيرة ( 4 سنوات ) ، ولما سمعتها أصرت الا تشوف هذا المهرج العجوز اللي قدر يحمي عنزاته من الذيب والديك عزوز ، وطبعا لان القصة من اختراعي وتأليفي ما عرفت شلون أراويها المهرج العجوز وخاصة انها أول مرة تسمع بالمهرج ولا شايفته قبل هالمرة ، شنو سويت ، جبت لوحة ورسمت عليها وجه المهرج ، وأحضرت نصف كرة بلاستيكية وركبته مكان الانف ، وركبت الخيوط مكان الشعر و جبت قبعة عيد الميلاد وثنيتها علشان ما تظل نافشة و ركبتها على الرأس ، والثياب من ورق التغليف وعملت حركة بحيث تسعد الطفلة مررت الحبل و ركبت المشابك علشان يعطي شكل انه منشور مثل الغسيل ...ولما شافته بنت اختي فرحت وايدوطارت فيه ...... ، انشالله يعجبكم ........