بسم الله الرحمن الرحيم
و الصلاة و السلام على خير الانبياء والمرسلين
كيف الحلوات طبختي اليوم من ثلاث مراحل الحشو و الدقوس و الكشري
ببداية احب ابدي بقوس الكشري المضبوط لان فيه طعم لاذع و بطبعي احب اخترع و ابتكر و اجرب
و الحمد لله ماشاء الله تبارك الرحمن طلع مضبوط
مقادير الدقوس ممكن تستعملونه حتى للمجبوس
4 طماط كبار
5 فصوص ثوم
غطا شطة بيدر احسن من كريستال لانها احر، ملح خشن، غطا خل بيدر العنب
نص ملعقه كبيره مخلل المانجا ابو جمل و هذا سر لذاعة الدقوس ( فيه مخللات حارقه مثل مهران و مخلل الفلفل الاحمر الي مكتوب عليه معجون الشطه ما انصحج فيهم لانهم يحرقون اللسان)
كلهذولي يخلطون بخلاط الطماط بعد ما يقطع الطماط لقطع صغيره مع كوب ماي اذا الطماط مو احمر حيل حطي ملعقة طماط معجون لا تكثرين ترا كثر المعجون بخرب الطعم
ينحط شوي زيت بجدر و نحط الدقوس عليه و ينطبخ على نار متوسطه لين ما يصير خاثر
دقوس الكشري لازم خاثر يعني مثل صلصة المكرونه اوكي
نجي للحميسه او البصل
3 روس كبار يقطعون شرايح متوسطه لا متينه لانها بتخرب الطعم ولا صغيره لانها بتحترق
يعني قسمي البصله لنصين و اخذي النص و قصيه شرايح نص قمرية
جيبي تيفال و حطي البصل و حطي عليه زيت زيتون و قلبيه عدل بحيث كل البصل ياخذ زيت الزيتون
و حطيه بالفرن فوق و تحت و شيكي عليه كل شوي و قلبيه بيحترق البعض شوي بس ما عليه خليه يستوي
هالطريقه احسن من القلي لان القلي راح يطول و راح تستهلكين كثير زيت من تجربتي
نجي الحين للعدس الاسود او ابو جبه مو تاخذون العدس الاخضر الي هو الماش لا عدس اسود او ادعم
نص قلاس اغسليه بماي فاتر و نقعيه بماي مغلي
اغسلي كوب رز و نقعيه ايضا بماي مغلي كل واحد بقدره الخاص
جيبي راس بصل و قطعيه وسط و اقليهم بشوية زيت اذا تشقرو كبي عليهم العدس بعد ربع ساعه من تنقيعه
الي يسمونه ابو جبه و اطبخيه ب 3 اكواب ماي بقدر الضغط
لازم قدر الضغط لانه بيعذبك بالقدر العادي و بياخذ وقت طويل انا اول مره ما استوى معاي بالقدر العادي
طبخته لنص طبخه و كبيت الرز عليه و قلت بيستوي مع الرز وما استوى
ولا تحطين ملح او بهورات لان الملح ياخر النضوج
بعد ربع ساعه فكي الضغط و زيدي الماي للرز
كبي الرز مع مويته و حطي البهورات و الملح واطبخيه بنفس قدر الضغط بس لا تضغطينه يعني سكريه عادي بدون قفل انا ما اتجرأ اسوي الرز بقدر الضغط لا يطلع لين
انا حطيت شوي من
( زنجبيل مطحون لومي اسود كمون كركم و ملح خشن و غطا خل عنب) لازم الخل يعطي لذوعه حلوه
و خلي الرز يشرب الماي اذا شرب الماي حطي تحته الحديده و زيدي ماي و خليه يترسى 20 دقيقه
و كل فتره و الثانية شوفي الرز كلما احتاج ماي حطي له
الدقوس شيكي عليه كل شوي كلما احتاج طبخ خليه يطبخ لين ما يصير خاثر
انجبي بالصحن و ذري الحشو بالنص و غرقيه بالدقوس لانه بدون الدقوس يفرق طعمه كثييييييييييير
و تمتعي باحلا كشري بتذوقينه بحياتج
ان شاء الله المره اليايه اصور الطبخه لكم اذا تعلمت تنزيل الصور:)
يلزم عليك تسجيل الدخول أولًا لكتابة تعليق.
قهوة الضيافة
•
الصفحة الأخيرة