السلام عليكم حبوبة وربي يحفظلك بنتك الأمورة

حبوبة انتي خيارك صحيح مية بالمية ومافيه مجال تقعدي تشككي بحالك وتقولي ممكن كلام امي صحيح
للأسف كلام امك غير صحيح وحتى امي واغلب الامهات عندهم نفس الرأي عن الصناعي بيعتقدوا انه كويس ويسمن الطفل والصراحة ماعليهم لوم لانهم لايعرفون مخاطر الصناعي ومصائبه بس انتي خودي امك باللين وكلميها من ناحية دينية ان الله امر الام ان ترضع طفلها بكتابه الكريم كما أمرها بوضع الحجاب ... اسأليها ترضي اني اطلع في الشارع سافرة ؟؟ بتجاوبك لا طبعا لان الله امرنا بالسترة والحجاب كذلك امرنا بالرضاعة في اكثر من اية قرآنية وذلك لفوائدها العظيمة والتي تغفل عنها الامهات

حبوبة سوف اكتب لك بعض فوائد الرضاعة الطبيعية علشان تطمني ويكون عندك سلااااح تقاومي كل من يحاول ردك عن خيارك المثالي ...

فوائد الرضاعة الطبيعية للطفل

1- حليب جاهز دائما وفي الحرارة الملائمة ولا يحتاج لاي وقت او جهد للتحضير .

2- خال من الميكروبات والجراثيم المسببة لكثير من الالتهابات المعوية والصدرية مثل الاسهال

3- يتكيف مع حاجات الرضيع : حيث يحتوي على العناصر الغدائية المختلفة بنسب وكميات متوازنة ومتناسبة مع عمر المولود حتى ان نوعية الحليب في بداية عملية الارضاع تختلف عن ختامها حسب حاجة الطفل . (شوفي عظمة الخالق)

4- غني بالفيتامينات والمعادن الاساسية التي تساعد على الوقاية من الامراض المختلفة وينشط عمل خلايا الجسم .

5- غني بالهرمونات وعوامل النمو التي يحتاجها الطفل كي ينمو بشكل طبيعي .

6- يحتوي علي نوعية ممتازة من الاملاح المعدنية والبروتينات : تمتاز بسهولة هضمها ودون ان تسبب اي عوارض تحسسية من قبل الرضيع .

7- لوحظ ان الاطفال المعتمدين على الرضاعة الصناعيةفي تغذيتهم ان معدل الذكاء لديهم اقل من الاطفال المعتمدين على الرضاعة الطبيعية.

8- لقاح طبيعي : يحتوي على مضادات حيوية ضد الجراثيم المسببة للكثير من الامراض .

9- يقي الطفل من الاصابة بالامراض : مثل القلب والشرايين والسمنة والسكري والسرطان والامراض التنفسية والمعوية , الربو والحساسية , والتهاب الاذن الوسطى . وهذه كلها يسببها الحليب الصناعي.

10- يقي من الامراض والمشاكل النفسية : فالطفل يحتاج الى اربعة عناصر مهمة اللمس , الضم , التقبيل والحمل وهذه جميعها متوفرة والى اقصى حد في اثناء الرضاعة الطبيعية .
فكيف ايقولولك اعطيه الصناعي علشان مايتعلق بيك !! وهو مفروض يتعلق علشان ياخذ حاجاته العاطفية وطبيعي بعد السنتين لما تفطمي بيستقل بنفسه لكن بيكون عنده مخزون كبير من احترامه لذاته وثقته بنفسه اللي اخذهم من حنان امه .

وفاقد الشئ لايعطيه .

واخر اخت لي يوم كانت صغيره

ماترضع من امي الا طبيعي وجدتي وخالاتي منهبلين ليش بس ترضعينها طبيعي رضيعها بعد صناعي حرام عليك ومن هالكلام

امي مطنشتهم ولا تسمع كلامهم ضاربه بكلام امها وخواتها الجدار

كانت اختي ماشاء الله تبارك اله كانت صحتها ممتااااااااازه لا سمينه ولا نحيفه كانت صحتها تهبل ومرتاحين من الامراض وخربيطه
لكن عين حسبي عليها من عين حملت امي على اختي غصب عنها مع ان امي حاولت انها ماتحمل لان اختي صغيره وترضعها حملت ونحرمت اختي من الرضاعه الطبيعيه وصارت ترضع صناعي نزل وزن اختي حيييييييييل نحفت وصارت صحتها مو زي اول

عاد حمل امي ماكمل الا 4 شهور وسقطته واختي كانت تجلس يعني توها ماكملت حسبي عليييييهم حسبي علييييهم حسبي علييييييهم مايغفلون عن احد والله اني اتحسب على اللي مايغفل ان الواحد ...

الحين اختي بالمتوسطه لكن مررررررررره مررررررررره عصلى مصلى تقل مجاعة افريقيا


لذا ياقلبي لاتحرمينها الرضاعه الطبيعيه وربي منيتي اسوي مثل امي

يقلبي ابقولك شيء الرضاعه الطبيعيه تزيد المحبه والاخوه ...يعني سبحان الله امي مرضعه كلنا من كبيرنا الين صغيرنا طبيعي قلوبنا على بعض مثل شبك الصيد نحب بعض ونخاف على بعض وندور بعض حتى وحنا متزوجين والله اننا نهدي بعض على باقي الناس يعني مانهدي ازواجنا نحب نهدي خواتنا واخواننا احب لنا من ازواجنا والله ... والله نخاف على بعض كثير احس ابموت لو صار احد فيه شيء او لو رقدت او لو تعبت وحده منا تشوفينا ندور لها علاج ونكبيها وندهنها ونصرف على بعض بالمستشفيات عشان نعالج بعض نخاف على بعض حيل والله ازواجنا ماخفنا عليهم مع انه عشره سنين اما الاخوان والاخوات الله لايحرمنا من بعض ويزيدنا محبه على محبه ياقادر ياكريم
وزيادة اللي ترضعينه طبيعي يصير بااااار لامه وابوه الاغلبيه الصراحه ... حتى اني قستها على زوجي وخواته واخوانه خالتي مرضعتهم كلهم طبيعي واشوف زوجي وخواته زينا بضبط يخافون على بعض ولو وحده رقدت يتركون اشغالهم ويقعدون عندها
والله يحبون بعض حب الله لايغير عليهم يارب ...
انا قست هذا اللي حنا فيه بالرضاعه الطبيعيه وانا منيتي اسوي كذا بعيالي واتمنى

زوجة عمي ماشاءا لله تبارك الله اكثرنا عيال وبنات بس ولا واحد منهم رضعته طبيعي لكن قلوبهم على بعض متنافره حقد وحسد يحسدون بعض يكرهون بعض وهم مع بعض

لذا ياقلبي الرضاعه الطبيعيه لاتحرمينها بنتك
واذا استخدمتي الصناعي مع الطبيعي راح البنت يعجبها الصناعي بعد التعود وراح تترك صدرك

قالته لي الدكتوره قالت لي تراه اذا رضعتي ولد ولا بنتك صناعي وانتي ترضعينها طبيعي راح تترك الطبيعي لان حلمة الصناعي غير حلمة الطبيعي لذا الطفل راح تعجبه الصناعي لانها طويله وسهله مسكها

الاخوات ماقصروا وفعلا مافي افضل من الطبيعي

الصراحه كفيتوا ووفيتوا
والله يجعل نصايحكم في ميزان حسناتكم
قسم بالله انكم اديتوني دفعه قويه اني استمر
وامي ان شاء الله راح تستسلم لما تشوفني مهتمه بصحتي اكثر عشان بنتي
ومن اليوم ما راح اتردد ابدا او اسمع كلام اي احد لأنو فعلا ما يصح الا الصحيح
مشكورين حبوبات عالدعم القوي
والله يحفظ لنا عيالنا من كل شر