الرضع وفيروس الجدري

السلام عليكم ورحمة الله وبركاته .

مرحبا اخواتي .. ياليت القى تجربه او افاده منكم بهالموضوع .

والله محتاره ووكلت امري وأمر بنتي لربي لكن القلق والتفكير اتعبني :( .

بنتي عمرها 8 شهور .. لسى ما اخذت تطعيم الـ 9 شهور .. واللي واحد منها عن فيروس الجدري .

اختي بالجامعه جاها الجدري وماكانت تعرف بإصابتها .. حست بكذا حبه بظهرها قبل اسبوع لكن ماكانت تحكها وماتقدر تشوفها صح بسبب هالمنطقه صعب .. واعتقدت انها من حب الشباب او من الحبوب اللي تظهر قبل الدورة .

انا معي بنتي ونزور اهلي مرتين بالاسبوع او حسب الظروف .. زرتهم بذاك الاسبوع اللي حست فيه اختي بالحبوب الغريبه .. وابدا ماجا ببالنا انها جدري بسبب عدم وجود اي اعراض اخرى .

الاسبوع هذا صار لاختي سخونه قويه وزاد المرض والتعب والحبوب ظهرت بكل مكان بجسمها واعتذرت عن الجامعه والامتحانات وعزلناها بالبيت .

راحت راجعت طبيبة قالت لها الفيروس هذا معدي في وقت الحضانه .. يعني عزلنا هذا ماينفع خلاص انتشر بالبيت ولقطه اللي ما اصيب به لو ربي كتب له يصاب به .

سؤالي هل بنتي عليها خطوره لو اصيبت به بسنها الصغيرة ولسى ما اخذت التطعيم ؟ وهل اقدر اسوي تحليل عنه ؟

ماعندي اي فكره ايش اسوي اذا اقدر اتصرف دلوني وارشدوني .

حاولت اقدم موعد تطعيمتها ورفضو كل تطعيمه بوقتها .. يمكن تاخيرها لكن تقديمها لا .

وجزاكم الله خير .. انتظر اجاباتكم بفارغ الصبر . :(