الرفيقات حينما يبيعـون الوهم ( انا وصديقتي واخوها )

السلام عليكم ورحمة الله وبركاتة
حابه اطرح موضوع حصل لي
قبل 5 سنوات تقريباً التحقت بعمل وكنت انسانه في حالي مالي بأحد اعامل الناس برقي وذوق
ومال لاحد عندي حاجه زميلاتي كلهم يحبوني وكنت الاحظ اني الفت نظر الكثير في العمل سواء إدارة او زميلات
العبرة انو تقربت مني صديقه رغم اني حلفت اني ما اعمق علاقتي مع احد واكون سطحية مع الكل خصوصاً بعد تجربتي السيئة بالجامعه حاولت اني اكون عقلانية اكثر في علاقاتي مع النساء
بس هذي كانت غير طيبه وذربه واخلاقها تمام وشوي شوي لقيت نفسي انا كمان متقبلتها طبعاَ في البداية كانت البنت اوكي
المهم عزمتني مره في بيتهم ورحت شافتني امها واخواتها والظاهر اني اعجبتهم لانها صارت كل فترة تعلق وتقول بنخطبك لاخوي واخوي يجهز نفسه ونجيكم وامي تبيك واعجبتيها وكلمت اخوي عنك
طبعاً ماكنت اعطي كلامها اي اهتمام بما انها بس تقول كذا فتوقعتها تجامل فقط ما اهتميت وكنت احياناً اجاوبها بالرفض بحكم انه لو اتزوجت الصديقه اخو صديقتها يبدأو يحسبون عليها كل شي وفي كل طالعه ونازله يقولو
اتغيرت علينا فما حبيت بالبداية اني اتقبل الموضوع
وقتها جاء خطبني واحد من منطقه بعيدة وقلت لها قالت لاتوافقين احنا نبغاك لفلان وفلان يجهز نفسه وجلست تمدح اخوها ومن خلال تعامله معاهم بدأت اتقبل الفكره وحبيتهم هم كعائله يفكروني بأسرتي زمان
حبيت امهم حسيتها تذكرني بأمي الله يرحمها ,, حبيت لمتهم وتقبلت اكون بينهم
طبعاً اخوها في مقارنة بسيطه مع الشخص الي خطبني هو الي بيكسب الاختيار لانه الافضل والاقرب لي عمرياً وعقلياً وعايش حتى بنفس المنطقه الي تربيت فيها وعمله فيها وكل شي
ورفضت الشخص الي بيتقدم لي
بس انا طبعاً ماحطيت اخوها ببالي قلت لو جاني واحد افضل منه راح اوافق والنتيجه ماكان يجي احد افضل منه وكنت ارفض في كل مره
وفي كل مره هي تقول بنجيكم قريباً ورتني صورته واخذت موافقتي اكثر من مره كلمت اخواتي عنهم واخواتي رحبو بالموضوع
جو عندنا اتعرفو علينا وعلى اهلي وانسجموا معانا .. لكن
مرت 5 سنين وماشفتها جت لاهي ولا اهلها يخطبوا .. فقمت افكر بالاشخاص الي رفضتهم هل فعلاً كانوا مو افضل من اخوها
لما راجعت اسبابي لقيت اني رفضت رجل قانوني وعنده مكتب ومكون نفسه بس عشان قال انه شخص انفعالي يبغى وحده هاديه !
ورفضت شخص موظف واموره طيبه واهله يحبوه بس كان مطلق عشان زوجته غلطت في اهله وكنت اعرف سالفتها !
ورفضت 3 بس لانهم كانو بمناطق بعيدة مره عن منطقتي الي احبها وعايشه فيها !
شفت انها اسباب غير منطقية للرفض مقابل قشة وحده تعلقت فيها ان صديقتي مواصفات اخوها افضل والاهم من هذا كله انها كلمتني بصراحه واخذت مني موافقه !
وحطيت قدر للكلمه الي قالتها وماتوقعت انها تتراجع بيوم
بعد فتره مريت بضروف جداً صعبه واصعب من ماتتخيلو لو احكيها لكم
طبعاً انا امي متوفية الله يرحمها وتقريباً عايشه لوحدي وبدون عمل حالياً لان انقطع رزقي بعملي السابق
وصرت اغلب وقتي لوحدي اتواصل مع الي يتواصلو معاي فقط
وما اتواصل مع الناس او ازعجهم لانو اعرف ان الناس مشغولين ومحد فاضي لاحد ووحدتي مو مزعجتني بالعكس اطلع واروح واجي واتمشى وادرس واتعلم
وابحث عن اعمال وشايله مسوؤليتي انا تماماً بس وانا الي يعرفني يعرف اني ما اتكل على الزواج لحل مشاكلي .. اعتبره مجرد نصيب لو حصل كان به ولو ماحصل عادي
المهم
العبرة بدأت البنت تتغير علاقتها فيا بدون مقدمات كنت اعزمها واتجهز لجيتها وتعطيني كلمه وتسحب علي بعد كل شي انظف واتعب واتجهز واتكلف وتقول في الاخير مابجي
وكانت هي تعزمني ولما اتجهز وبروح لها تقوم في اخر ساعه تكنسل العزومة
صارت تطلع وماتناديني وتسحب علي بالاشهراستغربت تصرفها ,, وقلت يمكن عندها انشغالات بس مابجبرها لكني ياناس اعرفها تصحيني من نومي تسحبني سحب عشان اجيها
ولو كنت طالعه مشوار مع اخواتي المتزوجات ماتتركني تسحبني سحب من عندهم وتدق علي من ترليون جوال حتى ارد واجيها
الحين صارت تصرف وتقول كلام مو منطقي انو مثلاً انا ما اطلع كثير عشان كذا هي ماعاد تخرج معاي وهي تسوقها علي كأنها تقول ايوه اصرفك ! وش عندك ؟
مع انو عمري مارفضت اي طلعه معاها كل ماتناديني نخرج وانا من الاخر وحده قد كلامي وما احب الناس الي يخلفوا بكلامهم معي
مافهمت تصرفاتها المهم جاء قبل فتره عريس محترم بس كبير عني قلت ارسله على اختها الكبيره يمكن يصير نصيب وكلمتها عنه بس قلت اسأل اول واشوف ايش شروطه
لاني ماعطيت الرجال معلومات عنها فلما اعطيناه رفض عشان هي موظفه بمنطقه ثانيه وهو يبغى وحده يتزوجها تكون معاه مو مغتربه وقلت لها هالكلام
يعني الحمدلله اسعى لها الي اكتشفته انو اختها تتكلم فيا كأني ماني عاجبتها او فيه حاجه انا ماني فاهمتها ( فيه حلقه مفقوده )
وبرضو فيه واحد من اخواني بيتزوج وكنت مرشحة صديقتي هذي اصلاً له لانو البنت اساساً عاجبتني لكن طبعاً ماقلت لها اني ابغاها لاخوي حتى يكون فعلاً جاهز للزواج
طبعاً استمر التغير في العلاقه بدون اسباب من طرفها ولاحظت انها تخرج مع مجموعه جديده من اقاربها وماعاد تكلمني لا اتصال ولا سؤال
وتتعامل بقلة ذوق عكس ماعرفتها وتتهرب كثير استغربت ..
مع انو انا يابنات فهمتها ان علاقتيي فيك غير مبنيه على اي مصلحه وحتى لو اخوك ماصار نصيب بتضلي صديقة طول ما انتي محترمة معاي !
في الاخير بعد 5 سنوات جت تسب في اخوها وتقول ماينفع لك احنا نظلمك معاه هو مو كويس بنشوف له بنت ثانيه تناسبه وتتقبل قرفه ! قلت ايش مشكلته
قالت مايبغانا نطلع من البيت ويتحكم فينا قلت لها ما اشوف ان هذي عيوب .. تقول اخاف اظلمك مع واحد يتحكم فيك وتفكيره رجعي انا من زمان لما حكت لي عنه ماحسيته رجعي
ومتخلف بالعكس يجي بكلمتين وطيب جداً ودايم يجيبها عندي يخليهم يسهرو للفجر !
بس مدري في ايش تفكر تقول خايفه تظلمني الحين بعد 5 سنين انتظرتهم فيها هههههه وخايفه تظلمني عشان كذا خلتني وحيده بالاخير مترممطه وشايله نفسي بدون عزوه ولاسند ورافضه نص الشعب عشان احترمت انها قد كلمتها معي واحترمت موافقتي الي اعطيتها لهم .. خايفه تظلمني سبحانك يارب ؟!
تمهد انو بنخطب له غيرك وقالت لي احنا ندور له بس مو عارفه تودي وجهها مني وين وانا حاسه من فتره انهم متغيرين ويقولو روحي ربي يوفقك لولد الحلال
والمشكله انو اعرف ان اخوها مافي شي يعيبه شايلهم وحاطهم على راسه ومايقصر معاهم ابد وهذا الي لفتني فيه
بس اتوقع اخته الكبيره رافضتني لحاجه انو مو عارفتها ... هم فجأه قلبوا او لقيو وحده افضل واحسن !
الزبده يعني هي ماتدري اني فضلت اخوها على ناس كثير ! بعد كلامها واصرارها ا علي ان اوافق عليه مع اني كنت رافضه بالبدايه ؟!
هي ماتدري انو 5 سنين راحت والان دخلت الثلاثين والفرص بطبيعة الحال تقل ! وانا مازلت واقفه عند كلمتهم انهم بيجوا يطلبوني ولاتوافقين احنا نبيك ؟
وين راح كلامها ارفضي العريس ترا احنا نبيك .. وين اودي وجهي من اخواتي واهلي لما قلت لهم انو فيه ناس بيجوا يخطبوا ؟!
وعرفتهم على بعض !!
يا الله انا مو زعلانه على النصيب لو ماصار .. زعلانه على الناس لما ماتكون قد كلامها وتسرق من حياة غيرها الوقت والعمر والفرص
والحمدلله على خيرته واسأل الله ان يرزقني الخير واياكم اينما كان
ويهدي صديقتي ويسامحها ويوفق اخوها في حياته وين ماراح