الروتين الاسبوعي لتنظيف البشرة

طبعا في اساسيات كل يوم لتنظيف البشرة وهي الغسول التونر المرطب
ولكن لأن الجلد بيتجدد فبتتراكم على البشرة طبقات من الجلد الميت لازم يتم ازالتها علشان البشرة تستفيد بأي مستحضر بتحطيه عليها زي المرطب او اي سيروم علاجي بتستخدميه علشان تعالجي مشاكل في بشرتك زي مثلا لو بتعالجي تصبغات حبوب اثار حبوب مسام واسعة او تجاعيد ايا كانت المشكلة
ف لازم نستخدم سكرب لتقشير الجلد الميت دا علشان البشرة تستفيد بالمنتجات اللي بتستخدميها
طبعا اشهر سكرب في التاريخ هو سكرب st. Ives غني عن التعريف لكن فيه أنواع تانية كتيرة جدا زي ايفا وغارنيه وكلين اند كلير وممكن تعملي سكرب في البيت ب سكر وليمون او قهوة وزيت جوز هند
البشرة الدهنية بتعملي سكرب من مرتين ل 3 مرات في الاسبوع والبشرة الجافة مرة واحدة كفاية
ولازم يكون في روتين العناية الاسبوعي ماسكات بتستخدم مرتين اسبوعيا زي ماسك الطين واي ماسك بالطين بيقلل من الشوائب الموجودة في البشرة وبينقيها ودا مناسب اكتر للبشرة الدهنية
والبشرة الجافة لازم لها ماسكات مرطبة زي العسل والزبادي مثلا
او ممكن تستخدمي ماسكات جاهزة بتتباع في كل مكان بس اختاري اللي يناسب نوع بشرتك والمشكلة اللي بتعالجيها
فيه حاجه كمان في روتين العناية بالبشرة وهي حمام البخار اللي بيفتح المسام ف بتعرفي تعملي تنضيف عميق ليها ودا بيكون مرة كل اسبوعين ولو بشرة جافة مرة كل شهر كفاية
وبكده تكون خطوات الروتين الاسبوعي:
1- استخدام الغسول اليومي في تنظيف البشرة
2- عمل سكرب للبشرة لإزالة الجلد الميت
3- نعرض الوجه للبخار علشان نفتح المسام والبشرة تستفيد بالماسكات
4- استخدام الماسك المناسب
5 - استخدام التونر او ماء الورد ل قفل المسام
6 - الترطيب بأي كريم مرطب وممكن نستخدم جل الصبار أو زيت الجوجوبا
يارب يكون موضوع مفيد🌹💜