الروتييين الممل

السلام عليكم ورحمة الله وبركاته
كيف حالكم يا احلى بنات
بدخل دوغري بالسالفة..
يقولون فيه وحده عندها كروشة (تدليعة كرشة
ومضايقتها
اذا لبست لبس خربت عليها
تعرفون الكروش ملقوفة لازم تطلع عند الناس
تسلم وتسولف لا وتضحك بعد(تترجرج
المهم اختنا في الله صاحبة الكرشة ودها تسوي تمارين عشان تصغر كرشتها بس تقول ليه اسوي وانا ودي احمل
اذا حملت وولدت
سويت تمارين بالمرة
المهم
كل شهر تقول يارب احمل
وما تحمل
وهذي حالتها
والكرشة كل مالها تكبر
وزودن على هم تاخر الحمل ،، الكرشة في تزايد مستمر
اخيرا
انتبهت الحرمة هذي ان المفروض تمشي بحياتها ((وتسوي نظام صحي لها
وجسمها يكون حلو
وما توقف حياتها عالحمل
بنفس الوقت تراجع طبيبات نساء وولادة وهيك
المهم اختنا
قررت تتناسى موضوع الحمل
ولا تخليه يسيطر على تفكيرها
عشان ماتتعب
لكن اذا جاء نصف الليل قامت وصلت ودعت الله من قلب

ومارح تخيب..


على صعيد آخر
في عطلة الصيف الماضية
ماكنت اقدر اطلع من مدينتي
بمعنى أن الكل مسافر
وانا جالسة في البيت
فقررت اشترك في دورة حفظ قرآن
سجلت
وكان الجو حلو وإيماني
وتحسين المشتركات على قلب واحد
مع أن الاعمار تختلف
فيه مجموعه كبااار جدا بالسن
وفيه بنات صغار
وفيه شابات جميلات(مثلي هع
اوضاعهم تختلف
منهم الحرمة الكبيرة الي ساكنة بالبيت لوحدها
ومنهم الموظفة الي تجي للدورة بعد ماترجع من عملها بشوي
ومنهم البنت الي ما عندها شغل ولا مشغلة
اوضاعهم تختلف لكن كلهم عندهم هدف واحد يسعون كلهم على تحقيقه

ومتأكده أن الإجازة خلصت وهم من اسعد الناس لأنهم انجزوا
مو على قولتهم: اكل ومرعى وقلة صنعة
***********
فيه وحده تعرفت عليها في مركز نسائي
ما شاء الله عليها
"شعلة"
تشتغل وترتب الامور وتتحرك
وفوق كل هذا خلوقة وبشوشه
وحتى مهتمة بنفسها

وبعد فترة رحت مركز تدريب خاص بالاطفال ولقيتها تشتغل فيه
تركت المركز الأول واشتغلت في مركز ثاني بعد ما صار لها مشاكل مع مديرتها
وفي كل مكان تروح تحسينها تعمل بحب للعمل
وتحسينها دايم منشغلة فيه ومالي وقتها مررة
يعني بصراحة تحببك للعمل
هي مو صغيرة اعطيها عمر خمسة وثلاثين مو متزوجه
اذاشافها الواحد يتمنى يكون فاضي عشان يسوي مثلها


زبدة الموضوع:
7
7
7
لا تكونين وحده بدون أهداف
لا توقفين اعمالك ومخططاتك انتظار لحدث معين
امشي
وامشي
ويوم من الايام بتلاقين امنيتك و بتوصلين لهدفك
زي لو انك رايحه بتشترين شغلة معينة وبالطريق لقيتي محل من زمان تدورين عليه
انتي رايحه تبغين حاجه معينه لكن صادفتي شيء "أهم" كنتي من زمان تبغينه
فخلصتي شغلتين بوقت واحد

لازم كل واحد بالعالم يكون عنده هدف
يسعى لتحقيقه
******
ممكن انتي تتمنين أن احد يسلم على يدك
خلاص
اعملي على تحقيق هذا الهدف بكل ما تقدرين عليه
تعاوني مع مكتب دعوة الجاليات
اسأليهم وش ممكن تسوين عشان تحققين هدفك
ممكن تعملين معهم عن بعد (في بيتك عبر النت
مو لازم تطلعين من البيت
بالعكس
الأفضل للمرأة القرار بالبيت
******
كل وحدة تفكر في نفسها
وش العمل الي اذا شافته بصحائفها يوم القيامة بتفرح فيه
وبنفس الوقت بيملأ وقتها
***
مثلا :
حفظ سورة البقرة وآل عمران
ورد أن سورة البقرة وآل عمران تحاجان عن أصحابهما يوم القيامة، ففي صحيح مسلم عن أبي أمامة الباهلي رضي الله عنه قال: سمعت رسول الله صلى الله عليه وسلم يقول: اقرأوا القرآن فإنه يأتي يوم القيامة شفيعا لأصحابة، اقرأوا الزهراوين البقرة وآل عمران فإنهما تأتيان يوم القيامة كأنهما غمامتان أو كأنهما غيايتان، أو كأنهما فرقان من طير صواف تحاجان عن أصحابهما...
مين ماتتمنى هذا الفضل
اشغلي نفسك بحفظ السورتين العظيمتين
***
وممكن تبدأين بطلب العلم الشرعي، تشتركين في دورات
او تنتظمين في حظور دروس في المساجد
يقول الرسول صلى الله عليه وسلم:
من يرد الله به خيرا يفقهه في الدين...

ادخلي دار تحفيظ
بتحصلي صحبه مباركة ما يجمعكم ألا حفظ كتاب الله
***
عندك والديك
تقربي منهم،، حتى لو انك تحسين أن بينكم حواجز
ترى المسألة مسألة وقت ( بالدعاء-والتحبب اليهم)
وتكسرون هذي الحواجز
وبتصيرون بإذن الله اصحاب
خلي اكبر همك رضاهم
اذا جاء وقت قومتهم بالصباح جهزي لهم فطورهم
صلحي شيء خفيف مع الفطور يحبونه
بيفرحون مرة لأنهم ماتوقعوه
وبالمقابل انتي بتحسين بسعادة لانك اسعدتيهم

ووقت الغداء تغدي معهم وسولفي وياهم
ووقت المغرب جهزي الشاهي او القهوة وجيبي معك مواضيع حلوة واقريها عليهم (من النت او البلاك بيري..مثلا

بتشوفين نفسك مستمتعه لانك رسمتي البسمه على شفاههم
***
فتشي في نفسك
ايش المواهب اللي عندك
ايش الامنيات الي تتمنينها
ايش الهوايات الي تستمتعين فيها
***
لا تخلين ايام الاسبوع كلها زي بعض
الروتين قاااااتل
خلي لكل يوم نكهة خاصة

يوم لأهلك
دلعيهم
خليه يوم يشتاقون له
جهزي حلى جديد له مع القهوة
ونوع موالح مع الشاي
والعشاء شكلي فيه وبدون اسراف
وممكن تخلين يوم ثاني
او بنفس هذا اليوم
تطعمين احد العوائل المحتاجه
ترى ما يكلفك كثير
سوي لهم طبق للعشاء او الغداء يجتمعون عليه و يفرحون فيه
هذا حديث للرسول صلى الله عليه وسلم:
أَطْعِمِ الطَّعَامَ ، وَاَفْشِ السَّلامَ ، وَصِلِ الأَرْحَامَ ، وَصَلِّ بِاللَّيْلِ وَالنَّاسُ نِيَامٌ تَدْخُلِ الْجَنَّةَ بِسَلامٍ...
***
يوم الاثنين والخميس خليها خاصة بالصيام
كلكم تعرفون فضل الصيام
وان جزاءه عند الله غير محدود
وان الإنسان اذا جاء يوم القيامة وعليه حقوق للناس يؤخذ من اعماله الصالحة إلا الصيام
فياليت ما نترك صيام هاليومين
***
يوم بالاسبوع نخليه وناسة وفلة واي مشروع ترفيهي مافيه محذور شرعي نخليه في هذا اليوم
ممكن تحصرين اماكن ممكن تروحين لها
او صديقات ممكن تجتمعون او اقارب او حتى بنات الجيران
***
يوم تهتمين في بجسمك
وبشرتك
حطي خلطات وكريمات وخلي كل أهل البيت ينقرفون من ريحتك
هههههه
ما عليكي منهم ههههه
بس انتبهي مو أي خلطة تسوينها
حطي اشياء طبيعيه
زيت الزيتون ممتاز للبشرة عموما – لكل الجسم
الزبادي حلو للوجه –
والاحسن انك ماتخلطين اشياء كثيرة مع بعض
لانه ممكن تتفاعل وتخرب جسمك
***
يوم الجمعة خليه يوم ايماااني
قومي قبل صلاة الجمعة
وتروشي
وسوي لك بخور
وافرشي سجادتك
وصلي صلاة الضحى
واجلسي ادعي او اذكري الله وصلي على النبي (صلى الله عليه وسلم)
وقبل صلاة المغرب بساعة عالاقل نفس الشيء
ادعي ربك بخير الدنيا والاخرة،،
اسمعي هذا الحديث:أن رسول الله صلى الله عليه وسلم ذكر يوم الجمعة ، فقال : فيه ساعة ، لايوافقهاعبدمسلم ، وهو قائم يصلي ، يسأل الله تعالى شيئا ، إلا أعطاه إياه .


بين فترة وفترة غيري "ستايلك"
وزي ما قلنا نراعي الله في كل امورنا

وبين فترة وفترة غيري بغرفتك
الي يمين خليه يسار
والي فوق خليه تحت
حتى لو طلع الشكل مو تمام
بس التغيير مررة مفيد
تحسين نفسك مبسوطة
***
حددي لك جزء معين تقرأينه كل يوم
وكم ركعة تصلينها بالليل
قبل نومك ، او اذا كنتي تقدرين تقومين في وقت نزول الله عز وجل، فهذا كيد افضل
اذا سويتي هذا العمل بتحسين براحه نفسية عجيبة
لانك تغلبتي على شيطانك وأديتي عمل صالح....
والرسول صلى الله عليه وسلم يقول
قليل دائم خير من كثير منقطع...
حددي مقدار تقدرين عليه كل يوم حتى تستمرين وما تنقطعين عن الاعمال الصالحة



هذي افكار بسيطة
نحاول نغير فيها طريقة حياتنا،،
واتمنى كل وحدة تساعدنا بأفكار جديدة...

والسلام عليكم ورحمة الله وبركاته..