السلام عليكم ورحمة الله وبركاته
كيفكم يا احلى عضوات بالعالم
موضوعي اليوم ممكن يكون قديم بالنسبه لكم ومر عليكم لكن هو جديد بتاريخ طرحه وقديم جدا محطوط بقلبي
مع اني ما اشيل بقلبي على اي احد
//
أنتي فنانه بكل شي
.
.
كتر الله خيرك
.
.
تسلميلي ياكل الذوق
.
.
ما انحرم منك
.
.
انا احبك ياماما
.
.
انتي احلى بنوته جبتها
.
.
ياناس عليها ست البنات
.
.
انت ولدي الشاطر الله يحفظك
.
.
يا اطيب أب بالدنيا عساني ما انحرم منك
//
وجمل وكلمات ثناء ومدح محببه للقلب
اتمنيتي انك تسمعيها من اغلى الناس..
ماما..بابا..اختي ..واخويا..وحتى سيدي وستي
كلمات تطيب الخاطر وتهدي النفوس وتقرب الأرواح
هالكلمات مع انها بسيطه لكنها تترك أثر جدا عميق بنفوسنا
يا امهات ويا آباء ويا اخوات
لاتستهينو بهالكلمات..ولاتقولو لا استحي اقولها او مو متعوده اقولها
انا ترا زيكم..مو متعوده ..وجد محروقه على نفسي واحاول قد ما اقدر اني اخلي ريقي حلو مع اهلي ومع الناس
.
.
احكيلكم مواقف مرت علي عن جد اثرت فيني
انا زمان ماكنت اعرف هالثنائات ولا اعرف ارد بإسلوب حلو قبل لا ادخل لعالم المنتديات واشوف ردود العالم مع بعضها كيف
يوم بنفاس اختي..جاتنا وحده وكنت انا اللي اباشر
كنت اقدملها الشاهي والمعجنات..
قالتلي تعبتك يابنتي..ابتسمت ونزلت راسي..وخرجت من الغرفه
لمن خرجت ندمت اني ماقلتلها تعبك راحه..
عارفين ليش ماقلتها...مو لأني تعبت ولا لأني مو فايقتلها ولا لأي سبب تاني
الا انو لساني مو متعود على هالكلام..
ليش..!!؟
اهلي ماعودونا..ماكنت اشوف بابا يقول لماما تعبك راحه او العكس
عارفين الشي الوحيد اللي كنت اسمع بابا يقولو لها ويثني عليها فيه
كل يوم بعد الأكل سواء غدا عشا فطور....يقولها تسلم يدك يا أم فلان الأكل كان حلو
وكنا نتضارب انا وأخواني لا بابا قول تسلم يدك يا ام فلانه ..
وكل واحد يبغى بابا يثني على ماما ويقول يا ام فلان بإسمو..وكان يجاملنا ويقول يا ام احمد..يا أم عبدالله...يا أم شدى..إلخ
وكنا ننبسط والبسمه مشققه وجيهنا ..بابا اليوم قال اسمي وهو يمدح
.
.
وهدا موقف تاني قريب
عندي اخ صغير عمرو تقريبا بين الـ 10 والـ 8 ..بس هو سنه رابع مدري كم عمرو
كان كل ماسويتلو شي..مثلا ساندويتش..جلست العب معاه .. قلبتلو على سبيستون
يقولي شكرا يا اختي الكبيره لأنك سويتيلي كدا وكدا
وبرضو ما اعرف ارد ...اقولو عفون واروح
طيب لي ماكنت قلتلو ياقلبي انت لو ماسويت كده ليك حسوي لمين
ليش ما اعرف ارد
ليش كا ما احاول اعود لساني على الكلام الحلو
بوقت الاختبار احوس..
لأنو لا بابا ولا ماما عودونا
يا الله ليش ماعودونا على هالشي
تخيلي أحد لمن يكلمك يأمرك أمر..او لمن تسويله شي..تحسي بعيونه انو هدا مو واجب عليكي إلا غصب عن جد جدك بتسويه
فرق كبير لمن يطلبك الشخص بذوق عن اللي يطلبك بكل دفاشه وبالنهايه لا يشكر
انا لو طلبت مني وحده..لو سمحتي ممكن..قبل لاتكمل اقولها امري..او ايوه..واقوم اسويلها او اجيبلها
فرق عن اللي بتقولي اقول قومي جيبي فصفص..وكاسة بيبسي حطي عليها ثلج ..مره مكسره مافيني اقوم <<حتى انا زيك مكسره..ايش رايك نفتح قسم عظام بمستشفى
ياهوو..ياعالم
عودو اطفالكم يسمعو الكلام الحلو والمدح والثناء
معاهم او مع اخواتكم او اخوانكم او مع آبائكم
قدام هالطفل..ترا رح يكبر ويكون هالشي عادي عندو
عارفين ليش اخوي الصغير يمكن كتير الشكر
لأننا انا واخواني قدامو سرنا متعودين...شكرا ..جزاك الله خير..تسلمي
وعودنا بعض على هالكلام...
بس برضو احيانا تخوننا العبارات ومانعرف نعطي هالشخص حقو من الشكر
.
.
وغير كده يأخواتي
كتير بنات ضاعو بسبب الكلام المعسول اللي يسمعوه برا البيت
فلانه حبت واحد لأنها عمرها ماسمعت كلمه حلوه..وكل اللي بالبيت يخاصموها ويسبوها
ولمن تلاقي هالانسان اللي يغازلها بأحلى الكلام ومسكينه ماتدري انو وراه بلاوي وغرض غير شريف
ولا احيانا تكون عارفه ..من كتر القصص المنتشره هالايام..بس تقول لا هو غير
ترا كلهم غير..كل شاب بالدنيا غير عن التاني.. بس هالنوعيه من الشباب مايختلفو ابدا
مثل مايقولو ..اختلفت الاسباب والموت واحد..
وكل واحد له طريقته بالكلام العذب اللي يجذب الفريسه
.
.
ليش نحنا ما نحصن بناتنا من الوقوع بهالتجارب المخيفه
ليش مانعودهم بالبيت على الكلام الحلو والعمل الطيب عشان مايحتاجو للي برا
.
.
يا أم.... يا أخت
عندك بنت او ولد صغير بالعيله
عوديه على انو يسمع الثناء..عوديه انو يسمع احلى الكلام
عوديها انها تثق بنفسها وهي بالتالي رح تردلك هالكلمه بكلمه أحلى منها
يا أحلى ام بالدنيا الله لايحرمني منك
يا اغلى اخت بالكون..انا بدونك اضيع انتي صديقتي الصدوق
.
.
^
^
هالكلام ممكن مو الكل يكون واقع فيه..ويمكن بعضنا عن جد متعودين على الريق الحلو والمعامله الحسنه مع بعض.. اتمنى اننا نتغير ونسير زيهم وللأحسن كمان
وأنا أولكم..ومثل ما اثرت بأخوي الصغير..بإذن الله رح أأثر بزوجي بالمستقبل وابنائي
وهدي لكل من مرت على موضووعي :26:
جروووح إنسانه @groooh_ansanh
محررة برونزية
يلزم عليك تسجيل الدخول أولًا لكتابة تعليق.
انا قبل اتزوج كنت دفشه بالكلام بس بعد تزوجت زوجي علمني الكلام الحلو وعودني اتكلم مع الناس بنفس الطريقه
شكرا لك ياعسل
شكرا لك ياعسل
jasmean
•
والله الكلمات الطيبه مفعولها مفعول السحر.....
وكفايه ان رسولنا الكريم قال انو الكلمه الطيبه صدقه عليه افضل الصلاه والسلام
وكفايه ان رسولنا الكريم قال انو الكلمه الطيبه صدقه عليه افضل الصلاه والسلام
الصفحة الأخيرة
موضوع مره مفيد