أختي الغالية اذا الزوج موجود تزوجي وأدرسي بعدها واللحين الدراسه في كل مكان والحمدلله فيه الأنتساب وفيه الدراسة أون لاين يعني عن طريق النت وهذي طريقتها مره حلوة وكلها شهاداتها معتمدة ومن جامعات معترف فيها بكل مكان في اوروبا وامريكا وغيرة هذا اذا كنتي راح تتزوجين وتبغين الدراسة مع بعض أما أذا مافي زوج او احد قاعد ينتظر خلاص حبيبتي سافري ونصيبك أن شاء الله راح يجيك وراح تشوفين ناس وتتعرفين على ناس ونظرتك في السفر راح تتغير للحياة ويمكن تتغير متطلباتك في زوج المستقبل بعد السفر أما اذا كان موجود اصلا فتزوجي وبعديها ادرسي وحلم البعثه والدراسة في الخارج كان بالأول اما اللحين كلشي متوفر والحمدلله وحتى البلدان القريبة مننا فيها جامعات راقية ولها اسمها مثل الجامعة الأمريكية بدبي والشارق على ما أظن وهي جامعة عريقة وفي جامعة نيويورك المشهورة بالبحرين هذا اللي حاضرني الآن وهذي أمثلة فقط على سبيل المثال لا الحصر مع الطريقة الأولى اللي خبرتك عنها عموما تعددت السبل والطرق والهدف واحد وأرجع اقولك أن الدراسة بكل زمان ومكان ممكنة لكن أغتنمي الفرصة وقدمي اللي أكثر أولوية والله ينولك مرادك واللي تبغية ويكتب لك مافيه الخير ...

ملاحظة: أي وحدة تقول لك الدراسة أهم من الزواج أو العكس شوفي اول شيئ ايش هي حالتها الأجتماعية ووضعها الأسري وظروف بيئتها وايضا ظروفها النفسية ولا تستمعي لكل من يعني متزوجه وألا لأ واذا كانت متزوجه بعد كم سنة من الدراسة وتفكري من حولك وشوفي اوضاع الناس وقارني وأقري وأطلعي عن المرأة ومراحلها العمرية والزواج المتأخر و عن متاعب الحمل في العمر المتأخر وطبعا في دولنا ماشاء الله كل ما تقدم العمر قلت نسبة المتقدمين للزواج وهذي عادات وتقاليد مانقدر نغيرها لمجرد اننا سافرنا وتغيرنا يمكن ما تكون مقياس ولكل حالة خصوصيتها لكن التقدم بالعمر وطبيعة جسم المرأة شيئ ثابت وعلمي ومخلوقه علية ولا احد يقدر يغير هذا الشيئ ألا رب العباد ...

لا تنسي تستخيري الله
والله يكتب لك اللي فيه خيرتك

ياااااااااااالله كنت اسال نفس هالسؤال قبل كم شهر
انا مثل حالتك قالو لي ترى محد باغيك لو رحتي وماراح تتزووجين بس رزقنا على الله مو عليهم هذا اولا

ثانيا مادام اهلك موافقين ومباركين هالخطوة لاتفرطين فيها ابد ويالله لك الحمد ربي مسهل لك امر المحرم

وثالثا ليش تقعدين تتنظرين مجهول يمكن يجي يمكن مايجي وتضيع منك فرصة على حساب هالاطخم اللي زابن في بيت اهله ماجاء خخخ

انتي لما تجين هنا اصلن راح تنسين الزواج بتكونين مشغولة بالسعودية يطلعونك ولاشي عشانك ماتزوجتي بس برا ماعليهم منك

والزواج متى ماجاء يجي يابنت الحلال

انا كنت مثلك ونفسيتي مرة زفت من التردد وكتبت موضوع بالمنتدى نفس حالتك من كم شهر بس قلت يابنت ماراح تتكرر وان شاء الله مافيها خسارة

وتاكدي اي شي ربي يكتبه لنا تاااااااااااااكدي ان فيه خيرة ولو بعد حييين يمكن بلحظتها تقولين ياليت وماليت بس بعد فترة راح تتاكدين انها خيرة لك وتقولين الحمدلله ياربي انه صار كذا وكذا



ولاتنسينا من دعواتك وان الله يردنا سالمين غانمين لاهالينا ويسخر لنا خلقه وينطقني مثل ماربي نطق عيسى بالمهد<<<عذاب انا واللغة

اللهم اني اسلك باسمائك الحسنى وصفاتك العلى واسمك الاعظم العظيم الذي اذا سئلت به اجبت يا حي يا قيوم توفق وتسعد كل انسانه ردت علي ونصحتني نصيحه لوجه الله ويارب ترزقفنا جميعا وتوقفنا

والله يا خواتي انا فاهمه ان الشهاده هي الي الحين متاحه لي وعارفه ان الوالد واهلي معاي بس انتم مو عارفين اني وسط مجتمع قبلي له عادااات مرره صعبه والمشكله ان الحين انا في سن زواج يعني 24 وداخله ع 25 ونفسي مووووت اتزوج ويصير عندي بيبي


الحاجه الثانيه ان الدراسه هي طموحي وحلمي ونفسي احصل ع شهاده انفع بها ديني

والله الذي لا اله الا هو اني نذرت نذر انو اذا حصلت ع الشهاده راح اكرس كل طاقاتي لنصر ونفع الدين اولا واخيرا