السلام عليكم ورحمة الله وبركاته.
شخباركم حبيباتي,,شوفوا أنا ما أعرف للمقدمات
وراح ادخل بالموضوع على طول
الموضوع للحلوات المقبلات على الزواج,,وأخواتنا المتزوجات للتذكير فقط لا غير
وماشاء الله هنا أخوات اكثر مني خبره وعمرا
كل فتاة تحلم بالزواج والاستقرار وأن تكون قادرة على إدارة منزلها
وحسن التبعل لزوجها ورعاية أبنائها..
وطبعاً الأغلب إن ماكان كل المحيطين بالفتاة يقدمون لها نصائح وأفكار
فأنا حابه أشارك بأفكار بسيطه
أولا
ألا وهي أعرفي ماهي ميول زوجك وماهو أكثر شي يهمه ويأثر فيه,,
إن كان زوجك راعي عزايم ويحب السفره أشكال ألوان
فأحرصي إنك تهتمين بهذه الناحيه
وإن كان زوجك مايهمه الأكل عادي ممكن يمشي حاله بدون غدا
لو ياكل بيض ونواشف مافي مشكله
بس أهم شي عنده إنك تكونين متزينه وجالسه معاه فكوني له كما يكون
إن كان زوجك من النوع اللي يدقق في البيت والنظافه وهذا ليش هنا
والمواعين ليش إلى الان ماانغسلت فنظمي وقتك
لاتخلينه يمسك عليك زله ,,طبعا مع مراعاة الظروف الخاصه من مرض واطفال وغيره
لاتكرفين وتتعبين بشي عشان تبين الكمال بعينه وهو ما أثر فيه الشي هذا
ثانيا
اللي بينك وبين زوجك يضل بينك وبين زوجك
واللي ينطبق عليكم ماينطبق على غيركم ..واتذكر كلمة قالتها اختي حرة على كف صقار
قالت دعوا مابين الزوجين للزوجين ..حتى لو كان غير المتعارف بين الناس
شي بينكم يخصكم لاتشاورين فيه احد طبعا اقصد الامور المباحه
والا لازم نسوي مثل الناس والا نصير مثل الفلان ..طيب وبعدين؟؟
حاولتي وحاولتي تطوعين حياتك وظروفك وزوجك عشان تصيرين مثل الناس
ومن كثر ماحاولتي عوجتي حالك وحياتك ويمكن تنكسر بعد ..(بعيد الشر)
اذكر لكم مثال ..زوجي من النوع الحريص على ويحاول ويحاول انه ينحف(ماشاء الله تبارك الله)
ممكن يفطر كاس حليب ويتغدا سلطه ويتعشى فواكه..يعني يمر أسبوع ماطبخت فيه الا يوم واحد فقط
اوكي هذا زوجي وهاذي حياتنا كنت لما اروح للناس واسمعهم اللي تقول اليوم طبخت كبسه واللي مصقعه واللي مقلوبه الخ الخ الخ
واللي تقول الله يعيني وش بنطبخ بكره ..كنت مااقول شي لو اقول زوجي تغدا شابوره احس انهم ينظرون لي اني رفله وكسوله
يالله كنت احس اني غير الناس ليش انا مااطبخ ترا كان عادي الفريزر عندي مافيه لحم لأنه ببساطه مانطبخه ماناكله
وكان يضيق صدري ليش مانصير زي الناس ..طبعا غباء مني انا مافكرت بزوجي وانه هاذي حياتنا
بس كنت اخاف من نظره الناس لي اذا قلت لهم اني ماطبخت لأن الكثيرين كانوا يتهموني بأني كسوله ولااقوم بحقوق زوجي ووصلني الكلام من وراي
واني مجوعته ولااطبخ له
بس بصراحه بعدين حسيت انه هالسالفه بتأثر علي وعلى زوجي فقلت باالطقاق اهم شي انها حياتنا وحنا احرار بكيفنا
دام اننا راضين وانا ماتضررت الحمدلله ولا ضريت احد فما لأحد علاقه فينا
طبعا هذا مثال بسيط ويمكن يعتبر تافه لكن والله انا كنت مره متأثره بهالسالفه لكثره الذم والانتقاد اللي وصلني
اللي ابي اوصل له ماعليك من الناس اهم شي راحتك وراحة زوجك بشرط انك ماتسببين الضرر لأحد وماتقصرين بالحقوق الواجبه عليك من صلة رحم وغيره
ثالثا
لاتتوقعين انه اول سنه زواج راح تكون عسل في عسل ولاتتشائمين من الزواج وتقولين كله نكد في نكد
والرجال مايعرفون للرومانسيه لا حبيبتي الزواج فيه الحلو وفيه المر ولو ماذقتي المر ماتذوقتي حلاوة الحلو
سنه اولى زواج طبعا راح اتكلم عنها لأني مازالت احبي فيها وربي يبلغني ويهديني ويهدي زوجي
ونعيش مع بعض الين اقبره او يقبرني ..ولا كلنا بيوم واحد <<نذاله عشان مايتزوج عقبي
شي طبيعي انه يصير اختلاف بوجهات النظر لأنكم شخصين جيتوا من بيئات مختلفه لازم تختلفون عادي
سنه اولى زواج سنة اختبار توقعي انك راح تواجهين مشاكل بس حليها بالصبر وعدم التهور
ولاتكبرين الأمور وخلي عندك حكمه وبعد نظر
وتغاضي تسعدي ..لاتقصرين بحقوق زوجك ولاتتنازلين عن حقوقك
لاتنطقين شي وتتهورين وبعدين تتحسفين عليه..خذي لك فره بس بمنتدانا الغالي
شوفي اغلب المشاكل من وشو ..من هاللسان اللي بيودينا في داهيه
لاتتوقعين انك اذا سبيتي ورديتي الاساءه بالاساءه انك راح تكونين سعيده لا والله
الانثى معروفه بخجلها بحيائها بس مو ضعف وذل صحيح
ترا سمعتك من سمعة اهلك لو غلطتي يوم بحق زوجك او اهله راح تنقلين صورة سيئه عن اهلك وبيئتك وتربيتك
والاهم امك اللي ربتك واللي ماتستاهل في يوم انها تنهان
مهما احتدم النقاش بينكم لاتغلطين لاتعلين صوتك ترا مهما كان صوت زوجك عالي مع الوقت راح يتعود انه يناقشك بصوت واطي
لأنك عمرك مارفعتي صوتك ولاسبيتيه انتبهي تهينينه او تطعنين في رجولته او تقولين كلمات السب والشتم وكلمات الشوارع
ترا راح تندمين ..شعاري دائما لاتخلين احد يمسك عليك زله مهما كبرت المشاكل بينكم راح يرجع دامك ماغلطتي راح يرجع
مايقدر يمسك عليك شي لأنك بسهوله ماسويتي شي ولو غلطتي اعتذري لاتقولين كرامتي
لأنك بكذا تعودينه انه لو غلط يعتذر هذا زوجك تذكري بكل يوم انه بيصير اب لعيالك ان شاء الله مو عدو لك
لاتصيرين ند له يعني لاتحاسبينه على كل شارده ووارده عشان لايتقعد لك
الرجال مايجون بالعناد ابددددددد
وانا دايم احمد الله ان العصمه بيد الرجال لأنها لو كانت بيدنا كان علوووووووم
رابعا
اهل الزوج وماادراك مااهل الزوج الكل داخل ومتوقع اسوء شي
بصراحه فكري لوهله بس انه لو صدر تصرف من اخت زوجك ونفس التصرف صدر من اختك وش راح تكون ردة فعلك؟
حنا نكيل بمكيالين ..اهل الزوج دائما نواياهم سيئه وام زوجي شريره واخوات زوجي ساحرات
وامي طيبه واهلي مافي زيهم واخواتي ملائكه
انا مااقول هي مثل امي بصراحه انا مااكذب طيبه وبنت الحلال تنحط على الجرح يبرى
اذا تزوجتي توقعي الاشياء الجميله احسني الظن بس لاتصيرين غبيه
هم ناس مثلهم مثلي لااتوقع منهم الكمال ولااتوقع منهم انهم يردون جمايلي
اذا بتسوين خير سويه لوجه الله مو عشان هم يسوون لي
لأنك بعدين راح تتضايقين لو بيوم صدرت منهم اساءه راح تقعدين تندبين حظك وانا اللي سويت لهم وهم مايستاهلون وانا وانا وانا :icon33:
لا تجين وتنشرين غسيلك وغسيل اهلك وانا وزوجي وامي واختي وابوي
خلي اسرارك لنفسك وبصراحه مهما كانوا اهل زوجك عسل لاتطلعين كل اللي بينك وبين زوجك اكلتوا شربتوا طلعتوا دخلتوا رحتي السوق شريتي سويتي .. لأنه بعد زمن راح ينقلب عليك
مثل ماقلت لاتخلين احد يمسك عليك شي شلون انا اقولكم..ان تعودوا انهم يسمعون منك انك رحتي لمحل بربيري وشانيل ويوم سافرنا شريت من جوتشي
بعد مده بيقولون هي ماتشري الا غالي وخبله ومبذره وبياخذون عنك هالفكره الين تموتين
وممكن الفكره ذي تنتشر بين الناس وممكن يزودون بهارات انك مغروره ومفلسه رجلك ولو بيوم زوجك كان متضايق بيقولون ايه اكيد منها هي اللي تكلف عليه
ولو قعدتي تقولين انا مااشتري الا من الهرم وسيتي ماكس وقعدتي تنتظرين التخفيضات وتكفون متى تخفيضات زارا
بيقولون اعوذ بالله تراها مقعطه والله عمرها ماشرت شي بدون تخفيضات
حتى لو تشرين غالي بيقولون ها ماشاء الله لحقتي على تخفيضات دبنهامز وممكن تنقال هالكلمه قدام الناس كلهم
ترا هالتصرف ممكن يصدر منهم بدافع الدباشه وليس بدافع الخبث والمكر بس وشوله اجيب الكلام لنفسي
خليك غامضه بس لاتصيرين نذله لو بيوم سألك احد او طلب عنوان محل زين لاتقصرين مو تلفين وتدورين
خليك انسانه محترمه لاتغلطين على احد عشان مااحد يغلط عليك ووقت الفزعه لاتقصرين
ولاتشوفين نفسك عليهم وانه ماعلمهم السنع والكشخه غيري انا
لو ماكنتي تعرفين اهل زوجك قبل ماتتزوجين اسكتي قد ماتقدرين بس مو يقولون عليك مغروره
لا خليك مبتسمه وروحك مرحه بس لاتجين وتهدين المسباح الين تعرفين مويتهم هم وشو
ولاتصيرين مرجوجه وتعتقدين انه دمك خفيف وانهم راح يحبونك وتدخلين قلوبهم بسرعه
لاتعودينهم على شي فوق طاقتك ترا بعدين تتحسفين وتتعبين خليك وسط ومعتدله بكل امورك عشان تستمرين على كذا طول عمرك
انا اعرف وحده كانت كل يوم لازم حلى لأهل زوجها كل يوم كل يوم الين ملت وتعبت خلصت انواع الحلى اللي براسها وبطلت
صاروا ينظرون لها انها تغيرت وانها كانت طيبه وحليله وترا والله انا اعرفها معرفه شخصيه وهي تشتكي لي
لا مره كل اسبوعين او مره بالشهر اذا سيرتي عليهم طبعا يختلف من ناس لناس لأنه في ناس ساكنين معاهم وناس ساكنين بمدينه ثانيه
المهم مو لازم كل مادخلتي يكون بيدك شي ..قليل دائم خير من كثير منقطع
كل فتره والثانيه سوي لك طبق او قولي انا اليوم عازمتكم لو تجيبون شاورما من برا ترا المهم شي معنوي
في اشياء بسيطه بس تدوم ذكراها واهم شي الذكر الحسن
لو عنده جدات عطيهم قماش ينفع لهم او بخور اوعود مره بالسنه مو كل شهر
جيبي لهم مثلا كرتون بسكوت قولي لها يمه هذا للأطفال عطيهم اذا سلموا عليك
لو عندهم شغالات عطيهم كتيبات بلغتهم او بطاقه يكلمون بها اهلهم طبعا اذا كنتِ تعرفين انه اهل زوجك ماعندهم مانع
يوم العيد جيبي صحن شوكولاته وعطيه لخالتك ياخاله ذي حلاوة العيد اوقفي معاه واستقبلي وباشري
جت عندهم مناسبه اتصلي وش اسوي وش ناقصكم لاتذبحين عمرك انا لو كنت تعبانه والله اتصل واعتذر لخالتي وهي تتفهم
لأنها تدري اني مااكذب واني لو بيدي مااقصر
مو تقعدين مثل الضيفه تجين تاكلين وتغسلين وتمشين ترا والله يابنات ان مردهم للطيب
مهما الانسان تهاوش وزعل وظلم ناس واساء بهم الظن مرده للطيب راح يجي يوم ويتذكر محاسن الطرف الاخر ويتحسف
انا طولتهاااااااا مرررره ولازم اخلص الموضوع وماابي منكم الا دعوه صالحه الله يجزاكم خير ولكم مثلها لأن الموضوع بمجهودي وليس منقول <<واضح يابنتي من الاسلوب الرائع