شموخ رجل @shmokh_rgl

عضو

الزواج هو عالم من العكس عكاس..

عزيزي الزوج يجب أن تعلم بأن الزواج هو عالم من العكس عكاس ..

تختلف فيه الأذواق والأفكار والأساسيات لدى كل طرف من أطرافه المتمثله فيك وفي زوجتك ..

لا تتحسر من اختلافك مع زوجتك في بعض الأمور ..

فهذا هو الزواج .. وهذه هي الفطرة ..

لا يصل بك الحال الى أنك تشعر بأنك أتعس مخلوق بذا الأرض ..

اسمع مني وانا اخوك .. ترى هذا حالك وحال الكثير من المتزوجين .. لا تظن انك انت الوحيد اللي بينك وبين زوجتك اختلاف في الهوايات والاهتمامات وفي الطبايع..

اذا الزوج من النوع اللي يحتر ويقدر شئ اسمه مكيف وغرفه بارده .. بتلقى زوجته تستبرد وتقدر الصيف ولهوبه
اذا الزوجه رومنسيه وتحب الشموع ومسك الأيادي وتسبيل العيون .. بتلقى الزوج مايفرق في التعامل بين خويه ابو صالح وزوجته .. الا انه مايشيش مع زوجته في مقهى قرنفله
واذا لقيت الزوج رومنسي ومن النوع اللي يعطس بكلينكس ومرهف الحس .. بتلقى زوجته ما غير مريول المطبخ و ورقة وقلم علشان تكتب الطلبات..ورمنسيتها انها تستقبله والفوطه على كتفها بعد مانشفت يدها من غسيل تقطيع البصل
اذا لقيت الزوجه راعية طبخ ونفخ وفنانه بالمطبخ .. بتلقى الزوج مايفرق بين البرياني و التريكاي وبين البيض المسلوق
واذا لقيت الزوج هاوي استطعام الأكل ويقدر النكهات الهندي والصوص الصيني .. بتلقى زوجته راس مالها كبسه حمراء ومكرونه بشمل وماصخه بعد
اذا لقيت الزوج مدمن انترنت ولغات برمجه ومهووس بذا الأمور .. بتلقى زوجته آخر شئ تعاملت معاه له علاقه بالتكنلوجيا هو الأتاري
اذا لقيت الشخص راعي بر وبحر وسفر ومقناص .. بتلقى زوجته أقصى طموحها هو زوليه في الحوش وقهوة ورطيبات على حزة العصريه
اذا لقيت الزوجه مثل الفراشه و ذربه ومرتبه وكل يوم لبس وكل فتره بستايل جديد .. بتلقى زوجها في البيت راعي فلينه علاقي وهاف قصير أبو طقطق ..واذا كشخ لبس طاقيه شخال
اذا لقيت الزوج ونيس وراعي ضحك وفرفشه .. بتلقى زوجته مكشرة طول اليوم كأنها شامه ريحة خايسه .. وهوايتها تقرى صفحة الوفيات والحالات كثير والاختلافات أكثر وانا اخوك.. فلا تضيق صدرك .. وهالأمور لها حكمه حنا نجهلها ..

وصدقني هذي الاختلافات هي من اسرار السعاده .. فعن طريقة تبداء المشاكل .. وبعدها يكون التراضي وتبداء تحس بشعور الرضى والسعاده ..

لكن لو حياتك على طول ماشيه عوافي .. بتمل ..وماسمعت عبدالمجيد يوم يقول .. ملح المحبه ياحبيبي زعلنا؟ ..

وشفت حتى هالاغنيه لو تقولها لزوجتك .. يمكن بتجي وتقولك ليه ملح؟ ليه ماتكون سكر المحبه؟ماتدري اني ما احب الملح؟ولا تبي ترفع ضغطي وتذبحني؟
مو قلت لك فيه حكمه حنا نجهلها من هالاختلافات ياسيدي؟

—————
ولا يغرك اذا شفت اثنين متفقين في كل شئ .. لأنهم بيتطلقون قريب .. لأن الناس بتصكهم عين
شفت شلون ان حالك أحسن منهم؟
————–
هالتدوينه اهداء لكل زوج أو زوجه يظن نفسه أتعس الموجودين .. ويتخيل انه توجد حياه أخرى في انتظاره و هو محروم منها .. ويعتقد أنه هناك من يوافقه ويشابهه في كل أموره .. وهذا الشعور يخليه يبدا يمل من حياته الزوجيه ويكون سبب انهيارها .. وكله بسبب وهم حطه في باله ان هناك شخصيه أخرى تشابهني وهي تستحقني وأنا أستحقها ..

من ايميلي الخاص...

يلزم عليك تسجيل الدخول أولًا لكتابة تعليق.

تسجيل دخول

جروووح إنسانه • 14 سنة

الله يعطيك العافيه
ويجزاك خير

أمجاد نجد • 14 سنة

يعطيك العافيه

كيك اليمامة • 14 سنة

هههههههههههههههههههههههههههههههههههههههههههههههههه
الله يسعد قلبك والله ضحكتيني فعلا هاذا هو واقع الحياه
الله يعين على هالدنيا بخير

العنود العنيدة • 14 سنة

وكله بسبب وهم حطه في باله ان هناك شخصيه أخرى تشابهني وهي تستحقني وأنا أستحقها

بالنسبة للمرأة ممكن لكن بالنسبة للرجل والله ما أظن إن هذا السبب !

السبب إن أغلب الشباب ينظر للزواج على إنه يضيف شيء لممتلكاته يعني الزوجة عنده داخلة في الملك ! والزواج حقيقته شراكة مو امتلاك يعني الزوجة شريك مناصف وليس مملوك ! الزواج شركة لكل واحد فيها مسؤولياته وحدوده !

يعطيك العافية على النقل

rere199 • 14 سنة

اذا لقيت الزوج مدمن انترنت ولغات برمجه ومهووس بذا الأمور .. بتلقى زوجته آخر شئ تعاملت معاه له علاقه بالتكنلوجيا هو الأتاري

ههههههههههههههههههههههههههههه للحين في اتاري خخخ اكره الرجال اللي مايعرف للتكنولوجيا احسه مايستحق يعيش حياة المدن افضله راسين غنم ويطلع البر هع

ثآآآآآآآآآآآآآآآنكس