الزوجات الاوليات والثانيات واللي عندهم حكمة يدخلون</STRONG> السلام عليكم
بنات انا عندي قناعة ان الرجل اذا تزوج على زوجته ام عياله المفروض ان الزوجة ماتترك البيت وتطلب الطلاق لعدة اسباب:ان هذا حق من حقوق الرجل شرعاوان المرأة اذاطلبت الطلاق لغير سبب فحرام عليها رائحة الجنة وهذا مو سبب للطلاق وبعدين اذا تطلقت العيال وش مصيرهم؟ بياخذهم ابوهم وبيرميهم عند امه او زوجته الجديدة اللي مستحيل تهتم فيهم مثل امهم الا من رحم الله واذا كبروا بيحقدون على امهم اللي ماتحملت علشانهم وبعدين الام المطلقة من بيتزوجها ؟اما مطلق او ارمل او متزوج وجميعهم لهم اولاد واذا كانوا صغار بتقعد تربيهم وعيالها اولى بالتربية واذا كانوا كبار بيسوون لها مشاكل فالاحسن تجلس معززة في بيتها مع عيالها وابوهم يدخل عليهم ويصرف عليهم
هذي قناعتي
المهم انا لما اتكلم مع اي احد افهمه هالكلام حتى زوجي وزوجي شكله ناوي يتزوج علي بس يفهمني انه مو متزوج الحين لانه لازم يكون عنده بيت ملك عشان يتزوج وانه مهماحاول يتزوج او انا حاولت امنعه ماراح يصير غير اللي كتبه الله
وهو دائما يتكلم ويحاول انه بنبرة مزح حتى عند اهله انه بيتزوج وانا اضحك مو عشاني مكذبته لا عشان اقهره لما اضحك
المهم انه جاء في كلام في زواجه علي فانا قمت فهمته انه اذا جاب لي صك زواجه يجيب لي معه صك طلاقي وعياله برميهم عليه لانهم ماراح يضيعون عند ابوهم وانا بتزوج اوسع صدري مثله لانه مو عدل هو يتزوج ويستانس وانا اجلس بقهري بين عيالي المزعجين اللي دايم يتشكى منهم وان اتخيله عند الجديدة مبسوط واركض ارتب له البيت واركض اتزين لاتكون الثانية احسن مني وطقاق مع العيال عشان يسكتون اذا جاء ابوهم عشان مايكون عذر له عشان يروح للثانية:icon33:
فالرجال انهبل ماتوقع مني هالكلام وقام يقول خلاص طحتي من عيني واناماراح اكلمك وليش انت جالسةروحي دامك تبين الطلاق وانا ماقالت بطلقك اذا تزوجت عليك بس انتي ماتبيني قلت له انا ابيك واحبك بس ليش اتحمل القهر لو ما معك فلوس او مريض اومسجون طيب مو مشكلة لانه غصب عليك بس ان تتزوج لا مو غصب انت تنبسط وان انقر وتبيني اتحمل؟:angry2:
في النهاية قلت له مثل مانت ماتبيني انا بعد ماابيك ومن عافنا عفناه لو كان غالي ومن باعنا برخيص بتراب ينباع وطلعت عنه وانا واثقة انه زعلان ومنقهر مني بس انا مليت من هالسالفة وابيه يسكرها
وانا يابنات على قناعتي الى الان والله لايقوله لوتزوج علي انا بجلس عنده وعند عيالي:42:
وش رايكم في اللي صار ووش المفروض اني اسوي؟ساعدوني اله يوفقكم:26:
صحيح الزوجه الثانيه امرها صعب على النفس لكن الطلاق اصعب ولنفرض تطلقتي ماراح ياخذك الا انسان متزوج..يعني كذا ولا كذا راح تكون فيه زوجه اخرى في حياتك..
انا اقول حافظي على بيتك وان فكر يتزوج فهذا من حقه وفي نفس الوقت اعملي جاهده انك توفرين له كل رغباته وطلباته اعملي بكل الأسباب عشان مايتزوج عليك ..لكن اذا تزوج اعرفي ان هذا قدر ومكتوب عليك وعليه..وارجع اكرر واعيد لاتهدمين حياه انتي بنيتيها..