الزوجة الثانيه(دلوعه زوجها)بس منبوذه من المجتمع..!! ليش

السلام عليكم ورحمة الله وبركاته

الموضوع واضح من العنوان ..اول شي يابنات خذوا نفس عميق ..لاحد يعصب وينفعل ..ريلاكس..

ياطويلات العمر ..انا بنت ..تزوجت يوم كان عمري 16 سنه ونص تقريبا ..تزوجت من رجل متزوج..
شوفوا كنت طفله..(يعني لاتجيني وحده تقول خطافه رجال)..مع ذالك كنت واعيه ورفضت هالزواج ..لاكن اجبرني ابوي ..وهاذي قسمتي بالحياه..عانيت في بدايه زواجي ماكنت حابه زوجي ..مع انه مدلعني اخر دلع وانا ساحبه سيفون عليه..بس بعدين كبرت شوي وعقلت ..وحبيته الحين انا الي مدلعته..مع ذالك احترم زوجته الاولى ..مقدره انها تغار ..بالبدايه كنت ساكته على اهانتها لي ..اقول تأثير الصدمه ..وبعدين بتتعود ..وتستوعب ان زيي زيها مثل ماهو زوجها زوجي انا بعد ..الحين لا ..حطينا لكل شي حدود تحترمني واحترمها ..طبعا بمساعدت زوجي الله يخليه لنا ..ماقصر للحين يحب زوجته الاولى ويحبني ..الي يجيبه لي يجيبه لها ..
..طبعا ماتتخيلون كل الحريم الي تعرف اني زوجه ثانيه ودها تذبحني تحسسني بالذنب
((مدري متى الناس يصير عندها وعي وتترك الناس بحالها))


الي خلاني افتح هالموضوع..مره نزلت مشكلتي بمنتدى ..تعالوا شوفو الردود ..
((تستاهلين ياخطافت الرجال ..))
((جايه فوق المره وتناشبينها بعد))

ليش بفهم ..كلنا زوجات ..مافيه فرق اذا هي قبلي ولا انا قبلها ..كلنا لنا حقوق وواجبات ..اتجاه زوجنا ..ومن الزوج اتجاهنا ..هي افضل مني بأيش..
بالعكس انا احترم واحب اهله اكثر منها..
ازوهم اعزمهم ..هي اذا جاها احد ..تعصب وتكشر ..وتسكر على نفسها غرفتها..!!
اضطر انا اطلع الضيوف لبيتي فوق بس عشان زوجي مايتشفل مع اهله...!!

((مين الي افضل اللحين والي تستاهل تكون زوجه..)

الحين بجيب لكم ..امثله واقعيه من حياتي ..على زواجات ثانيه ناجحه ..وفاشله..)
؛؛؛

اختي تطلقت من زوجها ..لانه كان يحشش ولا يصلي ..كل الي جوها متزوجين وهي شرطها الوحيد تبي رجل اما يكون اعزب ..او مطلق ...(وسبحان الله ربي كاتب انها تزوج رجل متزوج ..كان شبه مطلق زوجته الاولى ..وعذره انها مو مهتمه فيه ..تاكل وتنام ..بيتها وسخ..تتكلم على زوجها كلام بذيئ ..ماتحترمه ..مع ذالك صابر عليها لانها يتيمه ولانها بنت خالته ..امه بتزعل اذا طلقها ...اختي رفضته بالبدايه ..بس رجع خطب مره ثانيه وثالثه ..ودخل ناس من جماعتنا ..وسبحان الله صار النصيب ..تزوج اختي ..وشاف الفرق حس انه قبل مو متزوج ..وطلق الاولى برغبه منها)

:::

وحده من جماعتنا ..تزوج عليها زوجها ..لانها مغروره شايفه نفسها عليه ..قال بكسر خشمها ..مع انه يموت فيها

عاد هي من سمعت الخبر تغيرت 180 درجه ..الاهتمام والدلع ..والهدايا ..استانس الرجال اكتشف انها تحبه وتموت فيه ..زوجتة الثانيه طلعت مغروره ..وماديه همها الفلوس وبس ..ماتمت معه الى 3 سنين وطلقها
عرف قيمة زوجته الاولى ..
(هاذا زواج ثاني فاشل)


::::::::::::::::
موضوعنا الحين ..ابي كل وحده تفضفض ..ليش تلومون الزوجة الثانيه ..هي ماطقت باب الرجال وخذته من عند مرته ..الرجال هو الي راح يدور على بنت الحلال ..
ثانيا ..لو الزواج من ثانيه حرام او عيب ..كان ماذكر بالقران ..وكان ماعدد الرسول ..زوجات الرسول امهات المؤمنين ..هل هن مذنبات او خطافات رجال..!!
ليش ماتحطون اللوم على زوجته..الاولى ..يمكن هي مهملته يمكن اصلا مايطلق عليها اسم زوجه ..مو قايمه بواجبات زوجها..(اكل ومرعا وقله صنعا)..!!

سبحان الله ربي ماحلل التعدد الى لحكمه..مافيه شي بالاسلام ..ماله داعي او لتسليه فقط ...

((كل وحده تكون واثقه من زوجها ..اذا يحبها حتى لو تزوج عليها صدقوني بيترك زوجته الثانيه وبيرجع لها ..بيجرب غيرك ..ويشوف بيقارن ..بيعرف انه المره السنعه النظيفه الي تخاف الله في زوجها ..نعمه ..))

:::::::::::::::::::::::
يلا كل وحده تقول رايها بالموضوع ..صراحه انا ضايق خلقي من التعليقات الي اسمعها ..كل شوي ..:44: