الزوج البليد الغير مبالي :(

السلام عليكم

احتار في امر زوجي كثير .. ما ادري هل بعد كل هالمشوار الطويل من الدراسه بعلم النفس والفراسه ماقدرت اتفهم لشخصيته .. او انه مايبيني !!

من اول ماتملكنا وكان بااااارد جدا .. قليل الاتصال والسؤال لدرجة اهلي لاحظوها
الكلام الحلو معدوم وكنت ابكي كثير قهر وحسره
كنت اعرف ان الي تتزوج تبي الاستقرار العاطفي قبل كل شي
بينما انا ماحسيت بالجوع العاطفي الا معاااه ..
يكلمني دقايق ويسكر وانا اجلس بالساعات استرجع الكلام احاول اطلع فيه كلمه حب وحده لو بالغلط .. ولا القى !!

وبعد الزواج من شهر العسل الين اليوم وانا لازلت اعاني مع بروده واهماله

لمن يشوفني متضايقه يصد ويمشي ولا كأني موجوده
لمن اجلس معاه كاشخه وابي اسولف له ..
ينشغل عني بتلفزيون ولا كمبيوتر ولا يلتفت لي ولا ينطق ولا حرف
ولا يبيني اتكلم الا بإختصار وكلمه ورد غطاها ..
وكمان عمري ماحسيته يغار علي ولا يشتاق لي ولا حتى يحس فيني
عادي جدا يوم يشوفني ابكي يدخل الغرفه وينااام واسمع شخيره بأخر البيت !!!

تعببببببت افكر هالانسان اذا مايحبني ليش عايش معي
يا عااالم فهموني .. هو انا حساسه ولا هو فعلا بليد او هو يكرهني ؟؟

لمن ازعل يتركني حتى لو اجلس شهر مايلتفت لي ولا يسألني وش فيك ومستحيل يناقشني
اجلس زعلانه مع نفسي اكلم الجدران لين امل وانسى ..
واذا تركني في بيت اهلي يومين او ثلاثه او اكثر مايتصل يتطمن
حتى لو جاه علم اني مريضه يضل مطنش ..

من باب الانصاف ولاني فعلا ابحث عن من تعينني على الحل
زوجي طبيعته هادي جدا ولا يتكلم وعادي جدا انه يجلس يوم كامل بدون حركه " منسدح ع التلفزيون " .. لكن مع اهله واصحابه لا فرفوش ويسولف

بالنسبه لي كل هذا مو مهم انا مشكلتي الحقيقيه الحرمان العاطفي
وربي لمن كنت بنت كان قلبي مرتاح اكثر من الحين ..
بديت احس اني ناقصه اني مو ماليه عينه ..
الله المستعان رغم الجمال والاهتمام والصبر ورغم انه ياما تمنوني ناس .. لكن هذا النصيب

يارب سخر لي الحكيمه العاقله الي تنور بصيرتي للحق ..