الزوج العصبي العنيد تخضعي له ولا تستقوي

اشكر اختي جومآنه لأنها سمحت لي استخدم يوزرها


حبيت أعرض لكم مشكلتي أنا زوجي مره مره مره عصبي ويعصب من اشياء تافهه مرات نكون طالعين من البيت فاضين ماعندنا شي وأقولو بالله عليك روح السوبرماركت جيب لي حاجتين على طووول يعصب ويتنرفز ويقول انا ماحب الاشياء اللي تيجي فجأه وعصبتيني وخربتي عليا جوي قلتلو طيب خلاص براحتك لاتعصب من ولا شي انا بس لأننا فاضين قلت استغل الخرجه والى اليوم ماجاب ليا الاغراض !!

مع العلم انو حتى السوق اطلبو منو ومايوديني الا اذا صار مزاجو رايق يقول قومي للسوق حتى لو كنت في هذاك اليوم تعبانه يقول اذا ماخرجتي اليوم مافي خرجه واضغط على نفسي وأروح لأني مااطلب السوق الا اذا فيه مناسبه كبيره ف أضطر اروح !
هوا ماعندو مشكله يجيب أغراض لكن على مزاجو وإذا طلبت منو يتنح ويماطل ويقول أنا مو سواق عندك
ومثلاً اذا طلبت صابونه معينه وكريم معين لبشرتي يشوف انو هاذي حاجات تافهه ومو ضروري يجيبها مع انها ضروريه عندي
وآخر مره طلبت منو نغير اثاث جلستنا اللي نجلس فيهاً يومياً الموكيت فاتح وتوسخ من الاولاد وقال لا انا ابغى اجمع فلوسي للظروف قلت ماعليك انا اجمع من فلوسي مع انها قليله على قدي واذا صار عندي مبلغ كويس اقولك ونغيرو قال لا انتي تفكري بالنفاق والمظاهر قدام الناس !! وانا اساساً ساكنه بمدينه لوحدي مايجيني أحد الا صاحبتي بالشهرين والثلاث شهور مره ! قلت انا ماابخل على نفسي لكن بالحد المعقول يعني اثاثنا من لما تزوجت ماغيرتو ولا مره وحتى لو فكرت اغيرو بحط حاجه فلوسها على قدي ماراح احط شي اكثر من فلوسي وقال لا يعني لا و عناد فيكي ماراح تغيري الاثاث لامن فلوسك ولا من فلوسي وانا تعصبت من كلامو وانفجرت فيه قلت انتا عصبي وتعصب من اتفه الاشياء ونفسيه وبخيل 😁 عصب من ردي وقال مو عاجبك انقلعي لأهلك !!


انا صبوره وهادئه لكن احس راح انفجر من طباعو كل ماطلبت منو شي يقول انا اختار الوقت مو انتي اللي تتحكمي فيا مع اني عمري ماحددت الوقت ليه لكن هوا فيه نرجسيه ويبغي مني أخضع لو ومااقول لا مع اني والله طلباتي قليله جداً جداً انا ولله الحمد مو من الزوجات اللي يبغو كل حاجه مااطلب الا الضروري ومااطلع للسوق الا لحاجة ضروريه ومناسبه كبيره وانا واللهي عاقله وماامشي وارمي فلوسي ع الاشياء التافهه لكن حتى انا ليا حق أرفه نفسي بالمعقول مااشوف انو شي غلط


وهوا طيب ومو بخيل ولا سيء ومادياً ظروفه كويسه ماشاء الله تبارك الله لكن يبغى يفرض شخصيتو ويتحكم حتى بفلوسي يقول الحريم عقلهم ناقص ومايصرفو فلوسهم الا على التفاهات ويبغى يغير تفكيري !! يظن انو مافي حاجه تستحق الصرف الا الاكل والباقي كلو تافه



ايش رايكم كيف اتصرف معاه 😭