الزيوت هل فعلا تطول الشعر برجلك اليمين..

السلام عليكم و رحمة الله تعالى و بركاته

كيفكــــــــــــــــــــــم بنات... الموضوع باين من عنوانه
السبب اللي خلاني اكتب الموضوع
نتبين فيها الحقيقة من الخيال ..... الف نوع زيت و زيت
زيت هندي زيت أفريقي زيت من المحمصة زيت من الصيدلية زيت من التاجرة زيت ماعرف من وين
و في النهاية كثير بنات يمكن ما يلاقون فرق ملموس بين انواع هالزيوت
طبعا أكيد طبيعة كل شخص تختلف و اللي ينفع مع هاذي ما ينفع مع هاذي
بس أنا ألاحظ البنات اللي حولي عموما
يستخدمون الزيوت و لا تطول شعورهم و لا هم يحزنون بعض انواع الزيوت تقلل من تجاعيد الشعر مثل جوز الهند
فالبنت تحسب شعرها طال و هي من اول حمام و شعرها رجع مثل ما كان
بغض النظر عن الفوائد الاخرى للزيوت هي تحمي الشعر و تحافظ عليه و تسهل التصفيف جدا بس كمان عيبها حارة على البشرة مهما كان نوع الزيت
هذا غير منظره غير المرغوب في الشعر
انا اعتبره سيد منتجات العناية بالشعر يعني انا ما اقصد ان و الله كريمات الشعر احسن من الزيت لا ابدا او غيرها
بس انا بالتحديد أقصد تطويل الشعر
طيب ليش عندي هذه الفكرة

أولا :- بعض الأطباء يقولون لك الزيت لا تحطه على فروة الرأس لأنه يسد مسام الشعر و هو من العادات الغير صحية و الصحيح إنك تحطينه على الشعر الخارجي فقط سواء كان للحفاظ عليه او من اجل اللمعة
طيب الحين السؤال يطرح نفسه
إذا كان المنتج ما ينحط على الفروة كيف يفترض فيه انه يؤثر على النمو بشكل أو آخر ! طبعا لا يعني الزيت ما راح ينط من شعرك للفروة ليتغلغل داخل المسامات و يزيد من
نمو الشعر

ثانيا:-
الزيت ينعم الشعر طيب هو ينعم بنسبة بسيطة بس مو ينعم يخلي الشعر ذيل حصان من النعومة أساسا تركيبة الشعرة الممجعدة تختلف في الغلاف الخارجي المحيط بالشعرة عن الشعرة الغير مجعدة و الزيت شي وقتي فقط يعني تخيلي انه يكون جدار ضعيف وقتي يروح بالغسل و غير متماسك في نفسه

ثالثا :- هل فعلا الزيت يتغلغل داخل الجسم الزيت ما يدخل داخل لو كان يدخل كان صارت مصيبة تخيلي جزيئات الزيت تدخل داخل لجسمك فكرة غريبة ! الزيت حده على السطح يمكن يتفاعل مع خلايا الجلد سواء سبب لك التهاب او غيره طيب ايش قصدي
انا اشوف انه الجزء المسؤول من تطويل الشعرة داخل الجسم تكون تحت الجلد الخارجي و لها مكونات سواء كان غدة دهنية او شعيرات دموية الخ هذه اللي مفروض يكون التاثير عليها ما اظن اي منتج من فوق الراس راح ياثر بشكل كبير عليها حتى البخاخات اللي توسع الاوعية الدموية ع اساس يصل كمية اكبر من الدم مو قد التاثير الخارق اللي يروجون له
انا اقول دايما فكرة المساج قد يكون لها علاقة بتحريك الدورة الدموية و يطول الشعر احتمال بس كمان مو شي له اثر كبير و واضح يعني اصلا جسمك ييضخ الدم الحين بالمساج حقك هذا بتشغلين مضخة يعني للبصيلة احس الفكرة تساعد بس مو لهالدرجة


يعني يا توتا تبغي تقنعينا كل منتجات تطويل الشعر غير حقيقية ههههههههه انا اذا اقول كذا اخاف يحذفوني من المنتدى و يعلنو حرب ضدي لا ما اقول كذا الله اعلم
بس انا تجربتي الشخصية من النوع اللي يحط زيوت طول الوقت و ككل الانواع اي اسم زيت يخطر ع بالك المهم انا ما احس شعري يطول من الزيت ابدا
و سويت احصائية اشوف الاهل الاقارب الاصحاب الجيران جنسيات مختلفة اسالهم اسئلة معينة اكتشف ان الزيت ما يطول الشعر و لا شيء

طيب معظم اللي يطول شعرهم على الزيت استنتجت منهم شيئين
النوع الاول اللي هي اصلا خلقة من رب العالمين شعرها كذا اصلا يطول لكن لما تحكي لي قصتها دايما الفكرة ان شعرها متقصف و جاف بسبب الاهمال و الفرد و الصبغات و الخ
المهم تقول شعري ما كان يطول لما استخدمت الزيت الشعر صار يطول و اللي فهمته ان شعرها اصلا كان يطول بس هي ما تلاحظ لانه على طول متساقط و يتكسر بسبب الاهمال لما استخدمت الزيت شعرها الخارجي وقف التساقط و نفس معدل النمو كان مستمر فظهر الفرق في الطول يعني شعرها اصلا كان يطول بس ما بيبن معاها لانه كل ما طول شوي تساقط او يتكسر
وظيفة الزيت هنا الحماية هي اللي حافظت على الموجود

الشيء الثاني نوع يكون اصلا شعرهم يطول سواء كان في زيت او غيره انا اسمع البنات تجاربهم لما اسالهم طيب جربتو شي غير الزيت لطول شعر مثلا يوصفون لي منتجات اخرى كريمات سيروم و بعضهم يقول ما اسوي شي بس تركت الشامبو و اشياء غريبة هم يظنون ان الزيت يطول في الحقيقة هو مو سبب الطول السبب انه جيناتهم كذا و الزيت فقط حماية

الى الآن أبحث عن وحدة أبيها تقولي شعري من انولدت و هو قصير و لا يطول لين مرحلة متقدمة من العمر و استخدمت زيوت كثيرة و لا نفع لكن طحت ع هالزيت و طول
قد سمعتو بشي نفس هذا؟؟؟ لا و ماظنيت اسمع

الخلاصة ترى كلامي هذا فقط اجتهادات بغيت اعرف وش سالفة الزيت اذا يطول او لا انا اشوف انه ما يسوي شيء بناء على قصص بنات كثير
اسدحي لنا تجربتك هنا عسى شعوركم تنظفون فيها الارض من الطول خخخخخخخخخخ لا و الله امزح بس ايه ان شاء الله تطول للارض
دعواتكم لي و الله محتاجة لدعواتكم جداااااااااااااا بالنجاح عندي نتيجة قريب الاسبوع الجاي و شكلي بجيب العيد المهم ادعولي و طولت الموضوع سامحوني انتظركم