ترا انا من ام اجنبيه واب سعودي عشان ما يجي احد ويقولي عنصريه ومادري ايش
لكن انا ما اييد ابدا زواج سعودي من اجنبيه ولا سعوديه من اجنبي
صدق حلاة الثوب رقعته منه وفيه انصحك ماتاخذين الا سعودي .. فكري بعدين باطفالك والمشاكل اللي بتواجههم فكري لو لما سمح الله حصلت بينكم مشاكل الاطفال بيروحون عند ابوهم كثير اشياء سلبيه فكري كووويس ومن كل النواحي

الله يوفقك اذا حصل لك زوج سعودي بيكون افضل لأولادك بالمستقبل حتى لوكان بنصف مواصفات الي مش سعودي

شفت حالات قريبه جدآ مني

كان الاقناع من باب انه ضعفت فرصتها من الزواج من ابن بلدها وهي تبغى تنستر وتخلف وكذا

اخو البنت هو الي عرضها عليه البنت كان عندها عيب خلقي ولا اعيب خلق الله خلق ربي كله حسن لكن نظرة المجتمع القاصره

البنت موظفه وشايله نفسهاوماشيه حياتها ولو في بعض المنقصات

وكمان في كثير بنات تزوجوا ناس من اقاربهم البنت بتكون متجنسه سعودي وقريبها لا

هي المشكله في المستقبل عشان الاولاد وكذا

الله يرزقك الزوج الصالح

مع البنات اﻻ في حالة انك بتتجنسين بجنسيته وتعيشين معه في بلده الوضع يختلف شوي ولو اني اشوفها صعبه ف البدايه بيكون كل شي جديد وحلو وبعدين بتتعبين ويمكن تندمين
نصيحتي لك استخيري الله وسبحانه بيختارلك الطيب والي فيه خير لك

أنصحك ما تاخذين إلا سعودي مثلك مثله
هذا مو انتقاص في الأجانب
لا والله كلهم رجال وفيهم الخير ويخافون الله
لكن ميزة السعودي بكره اذا خلفتي منه ما راح تشيلين هم إقامات لعيالك بينما الأجنبي لا تنسين عيالك بيصبرون بإقامات وتجديد اقامات كل سنه واذا جاء دور المدارس يبدأ مشوار المهانة وتنطيل الكلام تتفلسف المديرة ان ابوهم اجنبي وهم تابعين لأبوهم ومافي قبول او انتظري
مهما كان مو مثل السعوديين
وبكل شئ بيحسون بنقص حتى مع اصحابهم وعيال خالاتهم وعماتهم واقاربكم
ببحسون بنقص لأنهم اجانب من ام سعوديه وعايشين بالسعودية
وبكره ادا كبروا لا تتوقعين ان الجنسية بيحصلون عليها بسهولة ترى الشروط زادت تعقيد والسالفة فيها نقاط وتجميع نقاط وقروشة 

فكري كثير لا تتسرعين ترى الموضوع مو بس زواج والسلام خذي لك سعودي على دين وخلق

الحين حتى الأجنبيات يتمنون سعودي جارت أهلي تقول لأمي بنتي تقول والله ما اتزوج الا سعودي
انتظري وادعي ربك ترى ربك قادر يعطيك ويرضيك

دوري على مصلحتك ومصلحة مستقبلك وعيالك مستقبلا

اعرف سعودية زوجها اجنبي تقول بنتي من كثر ما عامت في المدارس تقول كيف ياماما انا طلعت من بطنتك اجنبية ؟!

للتأكيد .. ترى كلامي مو انتقاص للأجانب وادري ان الشخص بيدخل الجنة بأعماله مو بجنسيته

لكن انا اقول الواقع والي صاير في الحياة وبما انه حنا جزء لا يتجزأ من هالمجتمع فمن الضروري الواحد ياخذ الي يناسبه ويبتعد عن الي بيضايقه وبيشغل باله

الله يوفقك لكل خير ويوفق الجميع

لا والله مو بس من قبليه ثانيه الا من نفس القبيله بس من بعيد وجماعه غير تحس الوحده نفسها غريبه !
يمكن عشان قبيلتنا كبيره فنحس بالفرق بيننا وبين القرى الثانيه حتى العادات تختلف
مره وحده تقولي احس اني غريبه بينهم هذا وهي ماطلعت برا قبيلتها !!

الوحده لازم تفكر في بكره ولاتاخذها المشاعر وتوديها وترسم لها احلام خياليه والله الواقع مختلف تماما

احيانا تهون لو من قبيله ثانيه او وبعدها لو م دوله خليجيه لانه تقريبا نفس العادات واعرف خليجيين تزوجوا من بعض وحياتهم ماشيه بس احنا السعوديين ما تحررنا كثير للان

سهل السعودي يتزوج من هذي الجنسيات اما السعوديه صعب تروح لبلد ثاني لانها ماراح تقدر تتأقلم على حياتهم

مره وحده من جماعتنا اتزوجت من احدى الجنسيات اللي كتبتيها والله العظيم كنها سوت عااار ولاعزموا احد على زواجها والناس بس تتهامس كنها سوت مصيبه !!
مدري هي عرفته من عملها او من فين لكنه زواج على سنة الله ورسوله والناس عيونها بتطلع من التعجب !!
ووحده خليجيه نفس الشي تزوجت من ذي الجنسيات اهلها محتقرينها مررره ولايحبون زوجها يجي عزايمهم كلهم بثياب وهو ببنطلون واذا جا قالوا جا الزلمه ياخذك ... كلمي الزلمه ..الخ
رغم انه غني ما اخذها طمع لكن الاهل مو راضيين يستوعبونه ولايبلعونه
ووحده خليجيه ثانيه تزوجت اجنبي والله سارت عايشه وحيده بعيده ع اهلها وهي في نفس البلد لانهم زعلانيين منها وشبه متقاطعين لانها عصتهم وسارت بين الاجانب بعباتها وملامحها المختلفه وفروقات كثيررر اش اكتب واش اخلي

كلامي مو انتقاص لاحد وان اكرمكم عند الله اتقاكم ولكن هذا واقعنا اللي المفروض ناخذه بعين الاعتبار
والله ان زواج السعوديه من اجنبي مغامره ممكن تزبط وممكن لا
انا ما اتعدى على شرع الله ولكن ماهي سهله والاستخاره اولا واخيرا

فكري زين يالحبيبه والله الموضوع مو انه مو سهل الا مستعصي غالبا خاصه مع الاولاد بعدين