السكن مع اهل الزوج, استشارة

السسسلام عليكم ورحمة الله وبركاته

أسعد الله صباحكم / مساكم

كل من جربت وسكنت عن اهل زوجها وكل من لها رأي حكيم, أبي استشيركم والله إني بحيرة من أمري
خطيبي يبينا نسكن عند أهله مع أنه من شروطي سكن مستقل لي, لكن ظروفة المادية ماتسمح أبدا أبدا انه نطلع ببيت لحالنا

انا سمعت وقريت قصص ومحتارة اخاف اوافق واندم :confused:

المشكلة الولد زين ومرتاحة له بس هذا موب معناته انه خلاص بيطلع كويس وياقف بجنبي لو صار شي
وممكن انه يكون كويس ويكون لي عون وسند
انتم عارفين انه هالاشياء ما اقدر اكتشفها إلا بعدين مع الحياة
واهله بعد ما اقدر اقول كويسين او لا لانه ما نعرفهم ابدا
كل اللي اعرفه انه زوج اختي وزوجة أخوي من نفس فخذ خطيبي لكن مايعرفون بعض
واهل زوج اختي وزوجة اخوي واهلها بصراحة ماتركوا لنا انطباع كويس
وطبعهم ابدا موب زين وياما جتنا مشاكل منهم لمين قلنا بس
بس طبعا كلامي اللي فوق موب معناته انه يطلعون اهل خطيبي مثلهم

والله محتارة جدا ما ادري وش اسوي, انا ما احب احد يشاركني بشي لي
ولا احب احد يتدخل فيني وخصوصا اللي يتدخل بخصوصياتي هنا تنجن جنوني
وبعد لما اشوف احد يقل ادبه او يكذب او يستغفلني ما اقدر اسكت ما اتحمل
ما احب كثرة الهرج وسوالف الحريم فلانه وعلانه هذه اكرها
وافكر ب اشياء كثيره اخاف ما أتأقلم وما اقدر اتحمل
محتارة اقلبها من جميع الجوانب

انا تعبت ببيت اهلي وتحملت مسوؤلية من يوم وانا صغيرة وشلت كل شي على راسي
واشيل هم الكل وافكر بالكل وكلن يجي ويشكي لي واحاول احل مشاكلهم واسمع وتحمل
واضغط على روحي والحين ابي ارتاح وما ابي اللي حصل لي ببيت اهلي يتكرر ببيت خطيبي


احيانا اقول بحط لي شروط معه من البداية واقوله ما احد يتدخل فيني ولا بخصوصياتي
ما احد يتدخل بينا ومن هالامور واحيانا اقول يمكن ماينفع الززززززيدة أني تايهة

لو حصل شي لا سمح الله بعد الزواج وابي احد ياقف معي ماراح احد ياقف لا اخو ولا ابو
ما ابي اسوي شي اندم عليه

والله إني ادعي ان امه وخواتي يكونوا مثل امي وخواتي قسم انهم تاركين حريم اخواني على كيفهم
ولا نتدخل فيهم وكلن حرة بحياتها وبعيالها وكل اللي بيننا احترام وتقدير وما احد يتدخل باحد

للمعلومية هو بيحط لي غرفة نوم بدورة المياة (وانتم بكرامة) بس :(

الله يزينها بس :44: