اتصلي على استشاريه نفسيه لا تتركين نفسك كذا
الله يشفيك ويسعدك يارب

الله يكون بعونك يارب

اذا وسواس الصلاة فهذا منتشر فوق ماتتخيلي وانا من الناس الي عانيت منه سننننننننننننيييييييييييين طويلة ورحت لدكتور ولا استفدت لانه الدكتور قالي لازم انتي تبطلي تفكري الدواء لحاله مامنه فايدة وبجد بداءت اطننش يعني اذا جيت ابغى اعيد الصلاة امسك نفسي وما اعيدها ومرة على مرة بطلت اعيد بالذات انه الشيوخ قالولي كدا اسالي وشوفي

الله يكون بعونك حبيبتي
بس اذا تروحين لدكتور احسن

السلام عليكم و رحمة الله و بركاته ..

حبيبتي أنا حاسة بيكي و عارفة وضعك ..
بس إنتي تعاملك مع المشكلة غلط .. قوليلي ليش ؟؟
إنتي دحين إذا مرضتي و جاتك إنفلونزا مثلا .. ماتروحي المستشفى ؟؟
طبعا حتروحي و تاخدي أدوية ومضاد حيوي و فيتامين سي و.... إلخ
ألين ما تتعافي و تروح السخونة و الإلتهاب و الكحة و....إلخ ..
صح ولا لأ ؟؟
هادا إللي إنتي فيه ماهو إلا مرض .. يلزمه علاج ..
والعلاج النفسي عبارة عن قسمين ..
أدوية .. و كلام و فضفضة ..
ممكن تكون مشكلتك جدا بسيطة و تتحل بالكلام بمعرفة
مسبب المشكلة و السيطرة عليه فقط بالكلام و بطرق معينة ..
و ممكن تكون محتاجة علاج فترة و تتنتهي المشكلة و ترجع
حياتك طبيعية ..
لكن إنتي كل ما بتسكتي عالموضوع و تهمليه و تعزلي نفسك
عن الناس والمجتمع المحيط بيكي كل ما بتخلي الوضع يسوء
و إنتي مانتي حاسة .. فلازم تغيري هادا الشي .. أغصبي نفسك
عالخروج و الكلام و الجلوس بين الناس حتى لو ما تتكلمي ..
بس عالأقل تغيري جو و تسمعي حكاوي و تشوفي ناس تانيين ..

وصدقيني من تجربة ..
مافي زي قراءة القرآن و الصلاة و الدعاء و أستغفري كتيييير بنية
إنه ربنا يشفيكي من المرض دا و تتصلح حياتك ..
و شيلي الموضوع من دماغك ولا تسمحي له يسيطر على حياتك ..
لا تقولي أنا موسوسة .. لا تقولي أنا مكتئبة ..
قولي أنا طيبة .. أنا فرحانة .. أنا مبسوطة .. أنا قوية .. أنا شجاعة ..
أنا ما فيا شي ..
أنا مرتاحة .. أنا سعيدة .. أنا غير موسوسة .. أنا لا أشك في أحد ..
أنا أحب الناس .. أنا أحب الخروج .. أنا أكون سعيدة بعد ما أصلي ..
أنا أرتاح بعد ما أقرأ البقرة أو القرآن ..
يعني عبارات زي كدة عكس الشي الوحش إللي إنتي تحسي بيه ..
و مرة بعد مرة حيبدأ عقلك الباطن يتجاوب معاكي و يبدأ يتغير إحساسك ..
و صدقيني إنتي حتحسي بالتغيير الإيجابي ..

حتى لو تربطي شي بشي ..
مثلا : أربطي السعادة بالصلاة ..
و أربطي الراحة بقراءة القرآن أو قراة البقرة بالذات ..
و زي كدة ..
و لمن تحسي بضيقة قولي أنا دحين أقوم أتوضأ و أصلي
ركعتين و أقرأ البقرة و حأرتاااااااااااااااااح ..
و طول ما إنتي تقرأيها حتحسي بكل الضيقة بدأت تفك شوية شوية
ألين ما تروح تماما ..
و لمن تخلصي قراءة قولي لنفسك يا سلالالام أنا أرتحت بالقرآن الحمدلله ..
والله العظيم إذا سويتيها حترتااااحي ..
و جربيها و شوفي على ضمانتي :)

سيطري عليه ولا تخليه يسيطر عليكي ..
خليكي أقوى من الإكتئاب و من الوسواس ..
حيكون صعب في البداية .. بس حتقدري عليه و حتسويه ..
و حتتصلح حياتك كلها .. و ماعاد تفكري فيه تاني ..

و أشغلي و قتك و نفسك .. لا تجلسي فاضية ..
أدرسي .. أشتغلي .. أطبخي .. أرسمي .. أقرأي كتب مفيدة ..
أدخلي دورات تدريبية في مختلف المجالات ..
شوفي أي شي يستهويكي و ترتاحي و إنتي بتسويه و سويه ..
بس أهم شي يكون شي فيه منفعة ..
لأنه طول ما إنتي جالسة فاضية .. حتجلسي تفكري في الأشياء
الوحشة و تكبريها جوة راسك .. و تحسي إنك خلالالالاص أنخنقتي ..
بس لمن تنشغلي .. ما حتفكري كتير في الشي الوحش .. و حينشغل
تفكيرك في الشي إللي إنتي بتسويه ..
عشان كدة بأقولك سوي شي إنتي تحبيه عشان يشدك و تركزي فيه ..
لو تحبي اللغات أتعلمي لغة جديدة ..
لو تحبي الطبخ أتعلمي طبخات جديدة و أتفنني فيها ..
لو تبغي تشتغلي أشتغلي في وظيفة تملأ وقت فراغك ..

و قالها الشاعر :
إن الفراغ و الشباب و الجدة .. مفسدة للمرء و أي مفسدة !!

بس أنا نصيحتي ليكي إنك ما تسكتي على نفسك و تروحي لدكتور
أو أخصائي نفسي .. ماهو عيب ولا حرام ..
بس لازم تروحي لأحد ثقة .. مو تروحي لأي أحد .. لأنه مو كل الدكاترة
أمينين فيه دكاترة ما يخافو من الله و بس يعطوكي أدوية كتيرة لفترة طويلة
و هادا الشي عالمدى البعيد له مضار ..
بس إذا كنتي محتاجة علاج المفروض يكون لفترة معينة و بعدين هو الدكتور بنفسه
يوقفه لكي إذا شاف وضعك أتحسن و أبدا أبدا ما توقفي الأدوية من راسك لأنه
بعض الأدوية النفسية تعمل زي الصدمة و رد فعل عكسي لمن توقفيها فجأة فلازم
توقفيها بتعليمات الدكتور و تحت إشرافه ,,

و أبعدي عن الأغاني و التلهي في الأشياء إللي ماهي مفيدة لأنها تزيد
الإكتئاب .. كمان تغضب ربنا و إنتي تبغي رضاه و رحمته و تفريجه عنك :)

و إذا كنتي في جدة و تبغي مساعدة بخصوص دكاترة أو أخصائيين نفسيين
ممتازين .. أنا أقدر أخدمك في دا الموضوع و والله العظيم ما ليا مصلحة في
أي شي غير مساعدتك .. لأني عانيت من دا الشي كتيييير :44:

هادا إللي يحضرني دحين .. و إذا تبغي أي مساعدة أنا حاضرة :)
والله يشفيكي و يرفع عنك و يصلح لك أمورك كلها يارب :)


تحياتي ..
جــــداويــــــــة