السلام عليكم ورحمة الله وبركاته

خواتي حابة احكيلكم شي انا صح طبيبه وخطيبي مو متعلم ولا معه شهادة وراتب بعد فترة كبيرة ينزل لكن يحاول يشتغل اي شي وكل مكاملة يساءلني اذا ناقصني شي ولما نزل راتبه بعد مدة كبيره اشترلي دبلة بسيطة وه شي فرحني يمكن كان مااهتم ولا شرالي دبلة اصلا.... احنا فى بلاد حرب اخدت كثير منا نص شبابها فى طريق الغلط من قتل ومخدرات وغيرها ونص الثاني متخرج مش لقي شغل وبينهم من يشتغل اي شي وبسيط ويرعي غنم مثل خطيبي ..... انا وقت الدراسة يجوني خطاب وكنت ارفض لاني بكمل دراستي وهما مستعجلين على الفرح وغيره ومااقدر اتحمل مسؤليه وقتها ف رفضت ، اتخرجت ومقولتي تزوجو من ترضوه خلقآ ودينآ يعني يصلي ويصوم ويزكي وصادق وحنون ويدعمك معنويا ومعاملته طيبه معك ، المهم اتقدملي العريس اول كان خريج ومتعلم وعنده عمل وسكن فوق بيت العايلة بس كان بيدخن ومارتحت له ابدآوقت شفت صورته ف رفضته ، والعريس الثاني كان قريب من عمري وكنت بشوف فيه على النت طايش كثيرا ف رفضته ، العريس الثالث كان معه عمل راتب وعمل حر بس سكن لسه ناوي يسكن فوق بيت العايلة ف وافقت حكي معي انصدمت فيه حكلي انه بتاع نسوان يعني يحكي مع صبايا والمتزوجات وارامل والمطلقة حتى المتزوجة عمل علاقة حب معها اي وقالي قبل مقابلة الشرعيه بيوم كنت بحكى معها حكيتله اتزوجها قالي لا هي متزوجة طبعا ويدخن وكلمه معي كله شك فيا لانه خاين وبتاع نسوان ف رفضته .. بقيت فترة عمري بيروح مني وصرت اكبر اتخرجت بس الشغل مافي اخوتي رافضين يوصلوني للشغل ، اخويا اصغر مني معاملته سيئة معي جدا من كلام عيب للضرب بكيفه هك لان اجي بعد البنات ف عمل يضرب فيا صرت في بيت اهلي اخدم واطبخ وامسك اطفال اخواتي اصغر مني وعلى قلبي زي العسل هدا واجبي ، بس وقت احتاج شي مالقي حدا معي وللى فاهمني مالاقيته وكل حدا مشغول بحياته ... المهم فى يوم صليت وقريت سورة البقرة وبالصدفة تعرفت على بنت وطلبتني لسلفها ساءلنه عليه كثيرا وكلهم بيشكرو فيه انه طيب كثيرا وبسيط عملت مقابلة معه شرطت عليه العمل والدراسه قالي حاضر لكن بس شرطي تاخدي بالك من امي وابوي واختي لا تخدميهم بس انتبهي عليهم لانهم هما معانا عايشين واحنا سكن فوق بيت العايلة .. وقتها فكرت ان خيركم خيرا لى اهله .. استخرت ووافقت حكى معي بالبدايه ماتقبلته وبعدها اكتشفت انه مثقف وواعي وفاهم عليا وحكالي كل شي انه راتب ينزل بعد مدة وانه يشتغل مرة راعي غنم ومرة يركب غرف النوم واي شي بشتغله مادام بحلال وموافق على عملي ودراستي وبيدعمني عليها يابنات هدا حال بلادي وهدا للى اتقدملي ونكونو انفسنا من الصفر مامعه سيارة ولا سكن ملك لينا لكن خطوة خطوة نساعدو عليها .... لو رفضته من يتقدملي ؟ شاب متعلم يرفض سني لاني كبيره او نسوانجي او بيدخن وماارتاح معه ؟ ولو بقيت فى بيت العايلة طيب لى امتى بصير اخدم اخوواتي وامسك اطفالهم واطبخ وبساعد الجميع بس ماحدا يساعدني وللعمل رافضين يوصلوني اصلا ومابين عصبيه اخويا لى طامع اخواتي فيا ...يابنات بشوف غيري قريبتي دكتورة رفضت عرسان عشان تاخد دكتور نفس مستوى تعليمي فعلا اجاها دكتور اكبر منها 20 سنة ومتزوج له 16 سنة وماعنده اولاد وطلق مرته و اتزوج قريبتي دكتورة بس ماعندهم اطفال ، وليا صديقتي طبيبه زوجها من الدفاع المدني اتوفي فى الحرب وهي ارمله ومعها 3 اطفال وعايشه براتبها هي بس ، وقريبتي صيدلانيه متزوجة زوجها ماعنده راتب عمل حر يوم في ويوم لا والسكن ايجار ، وليا قريبي متزوج بيت ملك له ويشتغل ومراته تشتغل ومعهم طفلين بس والله مشاكل بينهم كثير وكبيرة وماتنتهي ابدا ومافي راحة نفسيه بينهم ، طيب وليا صديقتي زوجها متعلم وسكن ملك لهم ومرتاحين هده ارزاق من الله واهله مساعدينه فى تكوين البيت ، خطيبي لما احكي معه ابدا ماحسيت انه طمعان فيا نهائي ولا بيحكلي فلان معه مصاري وفلان معه اراضي لا لا مافي حقد او حسد ابدا اتجاه حدا ويحب يساعد الغير ... زوج قريبتي بطبعه هك انت راتبك كدا وانت معك مبلغ كدا وانا معك مصاري وانا فقير ومامعي شي مع انه الله فاتحها عليه لكن ملاحظة عليه الحقد والحسد فى الناس ف يعني بقول انه الحمدلله ان خطيبي عنده راحة بال وانه متفاهم وواعي فى حكي معي ويقولي الله يقدرني وماتزعلي مني ومابقصر معك واهم شي عندي الاحترام والتفاهم وراحة النفسيه .. وانا حاسة براحة معه لكن متخوفة من المستقبل وهل يقدر يصرف على البيت وهل التعليم يسبب مشكلة بينا ؟؟ حابة اخدا رايكم وانصحوني ك اخت لكم فى لله وبارك الله فيكم