فور روز @for_roz

عضوة جديدة

الشات والمأساة .. مدري وش يحسون بعض الحريم ..

مساكم الله بالخير يالربع ..

:39:

أخباركم يالغاليات ان شاء الله بخير ؟؟؟

:27:

:27:

:27:

من فتره كنت طفشانه وجلست اقولب بهالقنوات وشفت شويه رسائل على بعض الشيتان او الشاتات خخخخ مدري المهم جمع شات في التلفزيون ...
بصراحه مدري وش يحسون هالحريم ...
اسمعوا بالله نوعيه هالرسائل ...

1- انا زوجي يحب ياكل رمان كثير مرة مرة وانا ما احب آكل رمان مالحل افيدوني ؟؟؟

الحل من فور روز : خلي زوجك ياكل رمان وانتي لاتاكلين رمان بس !!!!!!!!!!!!!!!!!!!!!!! آه ياقلبي :angry:..

2- انا عندي ضغط وسكر وحاسه نفسي دايخه وعندي التهاب في القولون مدري وش اسوي انصحوني وش آكل ولا احد يقولي روحي المستشفى محد عندي يوديني ...

الحل من فور روز : بالله يعني نجي لك ونوديك مثلا ؟؟؟ والا نوصف لك وصفه تاخذ عمرك أحسن ؟؟؟؟ صدق اللي قال ( القاه في اليم مكتوفا وقال له إياك إياك ان تبتل بالماء ) الوحده لما تجي لها مرض وهي عندها امراض الدنيا لا تستشير الحريم والله ليخربون بيتها والله :mad: ..

3- قبل الفجر بساعه تقريبا .. الولد مسخن يابنات واتشنج علي من كثر ما هو مسخن ولا ادري وش اسوي له وابوه نايم وش اسوي ؟؟؟؟؟؟؟؟؟؟؟؟؟؟؟

الحل من فور روز : والله على بالي ان ابوه ميت اساسا .. استني لين يقوم ابوه وقولي له اذا فضيت ودي الولد ادفنه ....

4- بنات الحقوووووووني انا وزوجي بنسافر وامه بتجي معنا تخيلوا يابنات تبي تركب قدام وانا حاااااااااااااااامل بالله وش اسوي ؟؟؟
تعليق : والله ذاك اليوم الحرمه هذه قعدت مسخره للشات كل وحده تعطيها تعليق اكبر من الثاني .. وحده تقول لها
يعني الدكتور حرص عليك الا تجلسين قدام والا بتسقطين ؟؟

والثانيه تقول لها خذي كفره وهي كفره وامشوا بها احسن ..

والثالثه تقول وش هالخباله يعني اللي قدام بتوصل قبل اللي ورا ؟؟

الحل من فور روز : بالله لاعاد تمسكين الجوال وتخسرين 4 ريال على الفاضي ..

ارتفع ضغطكم صح ؟ ترا لسه هذه فقط اربع رسائل مو اكثر ....
استنوا القادم احلى ... والمتعه مع الشات احلى .. ( صار صيف المجد ) خخخ

5- بنات انا زواجي بكره وانا مغصوبه على العريس بالله وش اسوي ؟؟؟

الحل من فور روز : قولي لأهلك اعطوني اسبوعين افكر ... بالله اذا انتي صاحبه الموضوع ماقدرتي تسوين شيء من البدايه وانتهى كل شيء احنا وش بيدينا نسوي ؟؟؟

6- بنات انا اكتشفت بعد تفكير عميق ان امي وابوي ما يجيبون عيال هاهاهاهاهااااااي ...

الحل من فور روز : الحمدلله الذي عافانا مما ابتلاهم ...

7- وحده من القنوات فيها رجل مسمي نفسه الفارس طيب ؟؟؟ رجل محترم ورسايله كلها رائعه جدا ...
وحده من الحلوات جت تسمي نفسها وارسلت في الشات قالت له انا بسمي نفسي مهره الفارس ؟؟؟؟؟؟؟؟؟
أسألكم بالله هذه وش تحس ؟؟؟؟ الرجل استحى وهو رجلللللللللللللللللللللل قال لها بل انتي مهره الإسلام ..

الحل من فور روز : انا بأكتفي بالرسائل اللي جت لها كلللللللللللللللللهم يقولون لها الحياء شعبه من الإيمان والنبي صلى الله عليه وسلم كان اشد حياء من العذراء في خدرها ....
بصراحه وانا مجرد قارئه والله حسيت نفسي بموت من الخجل من رسايلهم كيف بها ؟؟؟؟

8- بنات تكفون قولوا لي كيف طريقه انجاب الولد ؟؟؟؟ او وش الأكل اللي آكله واحمل بولد ؟؟؟؟ او ماهي علامات الحمل بولد ؟؟؟؟

الحل من فور روز : استغفر الله العظيم .. اللهم لاتؤاخذنا بما فعل السفهاء منا ...

9- بنات انا قمت من النوم وعيوني ما تفتح زين و حيلي مهدود وما لي نفس اطبخ وانا امس كنت عند اهل زوجي على ايش يدل عين والا حسد ؟؟؟
الحل من فور روز : والله روحي غسلي وجهك زين واتحممي وبعدين اطبخي .. تبينا بالغصب نقولها جتك عين من ام زوجك ؟؟؟

10 - انا جتني الدورة يوم كذا وكذا لونها كذا وكذا وانقطعت يوم كذا وسويت تحليل وصار اللون كذا وكذا وش اسوي ؟؟؟

الحل من فور روز : :mad: الله يلوع كبدك زي ما لوعتي كبدي ... فيه دكتورات نساء وولاده وبعدين الشات نصه رجاااااااااااال :arb: ؟؟؟؟

11- انا لبسي للعيد تنورة سكيني سوداء وبلوزه بيضاء هاي نك واكسسوارات حمراء وش اسوي مكياج ؟؟؟

الحل من فور روز : امممممممممممم تدرين ان الرساله احيانا ب7 ريال ؟؟؟
طبعا الرجال في الشات لما شافوا هبالها قال واحد منهم انا لبسي للعيد ثوب اوف وايت وطاقيه وجزمه سوداء وش آخذ غتره ؟؟؟؟

آه ياقلبي .....
ترى والله الشات مأساة فعلا ...
ليش الواحد لما يتعرف على التكنلوجيا ما يستخدمها صح ؟؟
ليش كل ما اخترعوا لنا شيء خربناه ؟؟؟
اتمنى اي وحده تعرف ناس من هذا النوع انها تنصحهم ولو على الشات ... مو كل وحده ترسل تكون صاحيه النفسيات مختلفه وحده تعبانه والثانيه زوجها ضاربها والثالثه بنتها رسبت والرابعه مريضه نفسيا :44: .. ليش اتقبل نصايحهم وآخذ آرائهم في مشاكلي الخاصه اللي انا اعرف بها منهم ؟؟
ليش ما اروح لأهل الإختصاص كل واحد في مجاله وأسأله ؟؟
الدكتور ما ينفع يصير الا دكتور عمره ما صار اخصائي اجتماعي .. وربه المنزل اللي تعطيني وصفه او لبخه لشيء خطير عمرها ما بتصير دكتورة الوصف اللي جاها بالكلام فقط مو بالشوف انتبهوا لأنفسكم اتحلوا بالحياء اذا ما احد من الشات يعرفك ويشوفك الله تعالى يعرفك ويشوفك ...
اخيرا وليس آخرا ,,, آسفه اذا احد زعل منكم لكن لابد ان نضع حد لكل هذه المهازل ...

يلزم عليك تسجيل الدخول أولًا لكتابة تعليق.

تسجيل دخول

LaDy Nona • 13 سنة

هههههههههههههههه

الله يهدى الجمييييييييييييييييييع

بدويه وأفتخر • 13 سنة

ماساي وماساوات وبلاوي وبلاوات في تلك الشاتات

الحين انا ماتقهرني رسايلهم
كثر مايقهرني ويبط كبدي
لما اشوف وحده مستلمه من الصبح للعصر ترسل
ومن بعد المغرب الى ماشاء ربك

من وين لهم الرصيد ياناااااس

واللي يرسلون رسايل ماصخه

صدق الشاعر>>>>مشوها لي تكفووون>>>

اذ لم تستح فافعل ماشئت

لميس ولجين • 13 سنة

هههههههههههههههه

من جد أحيانا أضطر أغير القناة إذا كان أبو الشباب موجود

وكل الرسايل كوم وسيرة التعدد كوم

U-TURN • 13 سنة

لا انا الشات قريب يفقع مرارتي
احيانا احس اننا بخير وحريمنا واعيات واذا قريت الشات اقول مابالحامض احد
تدرين انا استغرب من بعض الحريم اللي تسأل بالله وتستحلف بالله تقولين عندها امر عظيم بتقوله ثم تتحمسين معها وتجهزين نفسك عشان تساعدينها وبالاخير تقول انا حركة الجنين عندي من يمين هذا يدل على انه بنت او ولد..؟
مع ان الرسائل سعرها غالي ب3 ويمكن اكثر واحيانا الوحدة تكتب رسالتين او اكثر وتعيدها اكثر من مرة... ياسعد اللي عنده قناة فيها عنز اقصد شات

فور روز • 13 سنة

ههههههههههههههه
يسلمو حبايبي ردودكم اسعدتني يالغاليات ..