واحنا صغار مرات كنا نحط على القناة وفيها هالشاشة وننطر يبدون البث عشان يحطون الكارتونات الحلوة الصبح: الليث الأبيض، حكايات عالمية، وهالسوالف
وفي منهم وايد أنواع، أذكر قناة السعودية كانوا يحطون شاشة زرقا وفيها ساعة صفرا، ووايد قنوات ثانية بس تستخدم أعمدة ألوان وتحتهم مستطيل أحمر، وغيره وغيره.
هذيل الله يسلمكم يسمونهم بطاقات تجريبية – Test Cards، بالأساس كانوا بطاقات حقيقية مطبوعة ويحطون الكاميرا عليهم يصورونهم عشان يتأكدون من توصيلات القناة وضبط درجات الألوان والصورة على الشاشة حق البث التلفزيوني. وبالخلفية نسمع صوت أو راديو أو موسيقى أو أي شي، هم لغرض التأكد من توصيلات الصوت وبثه السليم. بعد التطور التكنولوجي صار بدال ما يحطون بطاقة مطبوعة حقيقية ويصورونها جدام الكاميرا قاموا يعرضون شاشة مشابهة عن طريق مولد الإشارات التجريبية – test signal generators وبالصوت اللي يبونه. في أمريكا القانون يجبر القنوات يحطون صوت معين بدال الموسيقى او الأغاني، شخصياً شفتهم يستخدمون الصوت “طووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووط
يعني إذا شفت هالشاشة تدري ان البث موجود والموجة صحيحة بس مثلاً يبدي الإرسال الصبح -مثل أيام أول- وينتهي نص الليل.
استخدام هذي الشاشات قل بشكل كبير في السنوات الأخيرة للأسباب التالية:
1- وايد من القنوات صاروا يبثون 24 ساعة وشغلهم مستمر، أو إذا وقف الإرسال يحطون شعار القناة وشريط أخبار ورسايل نصية. بعضهم يعرض حالة الطقس، دعايات محلية، أرقام قنوات الراديو ويبثون الصوت …الخ.
2- التكنولوجيا الحديثة والكاميرات وأجهزة البث صارت دقتها عالية جداً نادراً ما تحتاج ضبط في شاشات التلفزيون بالبيوت، حتى التلفزيونات بالبيوت صارت متطورة فيها ضبط تلقائي للإعدادات والألوان.
3- التحول من استخدام الموجات التماثلية – Analogue Signals إلى الديجيتال في الكثير من دول العالم ألغى مشاكل التشويش على الألوان ونقاوة الصورة.
هذي صور بعض الشاشات اللي استخدموها في دول العالم:
