ازيكم يا قمرات عاملين ايه في المطبخ
الشوربة دي انا بعملها في الشتا وغير الشتا
يعني على مدار العام
لأني بحسها مغذية جدا والكل بيحبها نيجي للمقادير
نص كوباية عدس مغسول
واحد بطاطس مقشرة ومقطعة مكعبات
واحد جزر مقشر ومقطع مكعبات
2 طمام مقطع مكعبات
2 بصل مقطع مكعبات
ملح وفلفل أسود ورشة كمون (مكعب ماجي ) << اختياري
4 معالق شعيرية
الطريقة
سهلة قوي أول حاجة طبعا حنشوح البصل في الزيت لحد ما يدبل
نضيف الخضار ( الجزر والطماطم والبطاطس ) ونقلبهم شوية
حنضيف العدس ومكعب الماجي ونقلبهم كمان شوية وكمان البهارات
وبعدين نضيف الماء المغلي تقريبا 3 كوبايات
ولما تغلي نهدي النار ونسيبها ساعة
بعد الساعة حتتأكدي ان الخضار استوى والعدس داب
تقومي طافية عليها وسيبيها تبرد واضربيها في الخلاط ورجعيها على النار
أول ما تبدى تغلي حتضيفي الشعيرية وتطفي عليها بعد 10 دقايق
وبالهنا والشفا :)