الشحنات الكهربائة في الدماغ

بسم الله الرحمن الرحيم
السلام عليكم ورحمة الله وبركاته مساء /صباح الخير لكم جميعا
أتمنى من المشرفات عدم نقل الموضوع للأهمية وهنا أكثر الأقسام دخول وقراءة ومتابعة
طبعا ما نعرف الشي إلا لما نمر فيه وتصير لنا الأعراض
الله يشفي جميع مرضى المسلمين ويحفظ لنا أطفالنا وشبابنا وبناتنا وأمهاتنا وأباؤنا ويحفظنا لهم يا رب من كل حاسد وساحر وفاسق يتمنى زوال نعمة الغير
نظر فلم يبرك ولم يذكر الله أبد
الكثير سمع بمرض الشحنات الكهربائية في الدماغ (الصرع ) وممكن إنه عنده شخص واحد على الأقل فيه هذا المرض
أغلبكم ممكن قرأ موضوع ولدي والشحنات وأنه جته فجأة وما كنت أعرف وش هذا المرض
رديتوا علي وماقصرتوا أبد بالردود وكنت قبل كتابتي للموضوع جدا خايفه عليه وعلى مستقبله
خصوصا أن مرض الصرع الكل يشوفه بشفقه ورحمه قد تنعكس عليه في المستقبل
دائما كنت أقول صغير ليه جاه وش السبب ومن ومن ..أشياء كثيرة كانت تمر في بالي
جلست سنة ونص وأنا أتخبط في موضوعه كل شوي مجربه له شي وكنت وقتها أفكر أترك العلاج وسبحان الله إلي كان يردني عن هذا الشي
تكلمت مع الدكتورة قالت سوي إلي تبين بس استمري على العلاج
كل زيارة أروح لها كانت تخوفني من شي
خصوصا مع العلاج ما كنت أشوف اي نتيجة أبد وبطبيعة الإنسان التعجل كل شي يبيه بسرعه
تحملوني شوي لأن الموضوع جدا مهم
أولا كثيرين نصحوني أرقيه وكنت أوديه سنه كامله للمشايخ يرقونه
ثاني شي نصحوني بالصبخات وأستمريت شهر وأنا أصبخ
ثالث شي نصحوني بالحجامة حجمته ممكن 6 مرات وكل مره كنت ألاحظ فيه تحسن
رابع شي نصحوني أسوي له العلاج الصيني ( المساج)
كلمت المعالج عبدالعزيز المعيوف والله يجزاه خير جاء وسوا له مره وحده وانا كنت معه عشان أعرف كيف أخر شي قال لي عالجي باطنيته وبيطيب
الصراحة ما فكرت بكلامه قلت هي تجربه نفعت زين مازين ما نفعت ما راح أخسر شي ان شاء الله
خامس شي قالت لي وحده ركزي على أكله كنت مفكره أسوي له الحميه الكيتونية وصرت أقرأ كثير عنها بس لازم أخصائية تغذية تشوف أكله
توكلت على الله وحطيت في بالي لازم أوقف معه أنا أمه الكل بيرحمه بس محد راح يعاني مثل ما أنا أعاني
حرمت نفسي أشياء كثيرة وأهمها الجمعات والروحات والجيات عشان محد يتكلم عليه وطبعا هذا أكبر غلط سويته المفروض أعزز ثقته بنفسه
بدلت الشبسات كلها بالمكسرات والفواكة المجففة وطبعا تعرفون الأطفال إذا ما نفذتي إلي يبون كيف يكون وضعهم
يوم واحد بس مسموح له يأكل شبس لما أكون في جمعة خوالي يأكل مع الأطفال الثانين
قللت من الأندومي ماكنت متوقعه انه بلا وأنه فعلا مرض
قللت مسكته للأيباد موب طول الوقت معه لا لهنا وبس ما أبي يتحول الشحنات لصرع دائم
قريت مره عن القرع والبطاطس أنه علاج وصرت أسويه لنا كلنا طبعا الخضار لازم وكنت أشكل فيه عشان يأكل
قللت من الأرز فترة وبدلته بمكرونه لأنها من القمح
طبعا كل هذا سويته مع الإستمرار بالعلاج
والحمدلله يار ب ولدي في تحسن بفضل من الله ثم دعوات المسلمين له
حبيت أكتب لكم تجربتي
المغزى من هذا كل مرض له علاج جهله من جهله وعلمه من علمه
أقروا كثير عن هذا المرض أهتموا بالأكل
كثروا لهم فيتامين وخصوصا الأوميغا3
كثروا شرب الماء ولا تنسون (وجعلنا من الماء كل شي حي)
الورقيات الخضراء مثل البقدونس الخس الجرجير
خلوهم يأكلون تونه بالزيت حقه لا تكبونه
أقروا عن الحمية الكيتونية جدا حلوه وكثير أطباء مدحوها خصوصا إذا ما له علاج أبد
بالنسبة للعلاج ولدي يستخدم ديباكين والكيبيرا
والله يشفي مرضانا ومرضاكم
هذا الي يحضرني حاليا وأي استفسار بالخدمة