الشرخ الشرجي . . هل يطول العلاج؟

السلام عليكم
لو تذكرون انا اللي كنت كاتبة هالموضوع (عمرها 8 شهور وتجيها حالة غريبة وقت الخروج )
الخلاصة
كانت تتألم كثيرا وقت قضاء حاجتها ولما أخذتها الطبيب اخبرني ان لديها شرخ شرجي داخلي وخارجي واعطاني مرهمين واحد عبارة عن مخدر والثاني بيبناثين يعالج ويعقم و دواء ملين سكيلاكس عبارة عن قطرات تأخذها قبل النوم بحيث انه يلين بطنها و تقضي حاجتها بعد 12 ساعة.. المراهم تاخذها مدة اسبوع والقطرات لمدة شهر

المهم مانفع معها العلاج لانه خروجها ما تغير مع الملين .. أول يومين كان شوي لين وبعدين صار مجموعة كور صغيرة و صلبة يعني مافي شي يخلي الجرح يرتاح ويلتئم...المهم باليوم الخامس ظهر لها دم أحمر بالحفاظة والخروج كان واضح ان الدم فريش يعني مش متجمد،، اخذناها فورا وقال اننا كان المفروض نستخدم احد المراهم داخليا (مع العلم انه ماشرح لنا اي شي لا هوولا الصيدلاني مجرد قال اعطيكم كريمات موضعيه وبس والمرهم المقصود (المخدر) اصلا مافيه نشرة ولا هم يحزنون) المهم حط اللوم علينا و أعطانا مرهم ثالث يستخدم للبواسير وللشرخ الشرجي الداخلي وشرحلنا كل شيء بالتفصيل هالمرة،، لكن مضى حتى الآن (5 أيام قبل ظهور الدم +ثم 10 أيام علاج بعد المراجعة)يعني 15 يوم ومافي تقدم غير أنها تقضي حاجتها بمدة أقل يعني كانت تطول علشان تقضي حاجتها والحين بسرعة تخلص أتوقع من القطرة اللي المفروض انها تكون ملينة بس ما أشوفها عملت مفعول واضح

المشكلة مازالت تتألم و لو انه بشكل أقل وكل مرة خروجها فيه دم لكن متجمد (يعني فقط أول مرة كان دم فرش وبعدين صار مختلط بالخروج و غامق)
وانا ابصراحة أبي اوقف عنها القطرة لان مكتوب تحذير بالورقة انه لا يستخدم اكثر من 6 ايام الا باستشارة طبيب لأنها تسبب كسل أمعاء يعني إدمان ما يقدر الشخص يقضي حاجته بدون دواء ،،
هي يوميا الصبح تقضي حاجتها بسبب الدواء لكن اليوم قبل النوم بعد ما أثقلت عليها بالفواكه (برتقال على كيوي على يوسفي ) شفتها تتعصر شوي و تبكي شوي و منزعجة جدااااااا لكن مافي شي في الحفاظة(ذكرتني لما كنت حامل عندي امساك احس تجيني عصرة بس مافي حركة بالأمعاء ) قلت يمكن تبي تقضي حاجتها بس خلاص امعائها ما تساعد بسبب الدواء والله خفت رحت صليت استخارة و قلت خلاص أبطل عنها الدواء لانه اصلا مش عاطي نتيجة كويسة و اخاف يضرها
الحين فقط ماشية على المرهم المعالج بيبناثين
طمنوني هل هالشي طبيعي؟ هل راح يضرها لو تأخر علاج الشرخ الشرجي؟ خايفة عليها خاصة لما اشوف خروجها متلون بالدم ينقبض قلبي
للعلم ماخليت شي ما سويته:

غيرتلها الحيب كانت تشرب نان و عطيتها الآن سيميلاك نيوشور ،، هاذ الحليب عطيته لها فترة قصيرة لما كان عمرها 6 شهور و بصراحةكنت ملاحظة انه لين بطنها بشكل ملحوظ اكثر من النان بس رجعت للنان وللعلم احطلها اقل من عدد المكايل المطلوب
و قفت عنها السيريال (حبوب القمح مع الحليب امثال سيريلاك و هيرو ) لان احس هي اللي سببت المشكلة لان خروجها كان عادي بس لما بديت اعطيها هالأكل بدت المشكلة صار خروجها ناشف و كبير خاصة انها الله يهديها ما تشرب سوائل أبد
وقفت الزبادي و الرز والموز
صرت أعطيها كليوم تفاحة صفراء مشوية على الريق بناء على نصيحة احدى الاخوات كعلاج بالطب البديل
صرت يوميا اعطيها برتقال و كوسا مطبوخة و يوسفي و بطيخ و كيوي على أساس ان هالاشياء جميعها ملينات
بعض الايام اشربها شاي ينسون
أحاول اشربها ماي كل شوي مع انها عنيدة و ترفض بس أحاول ولو رشفة ماي كل حين
أحاول أعطيها تمر لكن ما أقدر اعملها تمر بالماء لانها ترفض تشربه
اعطيها شوربة شوفان وشوربات أخرى و أدخل لها زيت زيتون في الطعام علشان يلين بطنها

بس مافي فايدة خروجها مازال غير لين ما يساعد صحيح هو صار حجمه أصغر من السابق ربما ألين قليلا لكن هي عندها جرح يعني يبيلها شي لين علشان يلتئم الجرح

أحس ان الدكتور سوا اللي عليه و المشكلة كلما أقرأ عن الشرخ في المواقع الطبية يكتبون انه يستجيب تلقائيا لعلاج الإمساك ،، يعني الحل الأول هي علاج الإمساك بس ماقدرنالها لا بالدواء ولا بالغذاء

ارجوكم طمنوني كيف أعالج بنتي وهل لو طول مدة الشرخ راح يضرها؟ قلبي ينقبض كلما أشوفها تقضي حاجتها وكلما افتح حفاظتها و أشوف صرت أبكي بدالها و أتمنى أكون مكانها

لا حول ولا قوة إلا بالله استغفر الله العظيم

اعذروني طولت بالكلام بس حبيت اكتب كل التفاصيل علشان اللي عندها أي معلومة أي نصيحة أي خبرة لا تستهينون فيها تراني مستعدة أسوي أي شي ممكن يفيدها أي نصيحة أي نصيحة لا تبخلوني علي والله يجزيكم كل خير و لا تنسوها من دعواتكم ربما احداكن تكون دعوتها مستجابة