كثر المتاجره بالبشر وتشجيعهم
على الهروب من كفلاءهم ومن دفعوا
فيهم اموال قد يكون بعضها ديون
لحاجتهم لهم لرعاية مريض او صغار
او الاعانه على عمل
........
صديقه لي راحت بيت وحده في ام الحمام
تأجر شغالات وسواقين
تقول لقيت يمكن 25 شغاله ضحك وكركره
وأكل وتبطح
ويتناوبون الارجيله / الشيشه الله يكرمكم بينهم
والتدخين حدث ولا حرج ويعلم بعضهم بعض الشر
وقالت لها طبي وتخيري اي جنسيه
تراي نادر اخير احد .. بس حظك عاد
تبي تغريها
قالت معهم جوازات اقامات
تقول فتحت خشتها تكركر
قالت غشيمه اول مره تستأجرين ؟؟
ذولي كلهم هاربين يبون قروش اكثر ووناسه والي انتي خابره
تقول مدري وش انا خابره
بس خفت وطلعت
قلت لو يهجون ويخلون بزاريني لحالهم ؟؟!!
ذولي محترفات فساد
تقول وبرا كوم سواقين
يسولفون على سواقها يقولون له اهرب وتعال هنا يعطونك شهري 2000
هذي قصه لصديقه لي مقربه ....
...............
احدى الاخوات دقت على رجل يأجر
قال ماعندي الا وحده
تقول قلت له وين محلك اجي انا وزوجي ؟؟!!
قال انا يجيب
انا لازم معلوم بيت
ومافيه غير نفر واحد
كلو خلاص يروح بيت شغل
المهم جابها
بعد ماراحت الشغاله بأسبوع
انسرق أثاث بيتها كله
تقول حتى المطبخ الستيل فكوه
والشاشات البلازما والكنبات
يعني كنسوا البيت كنس
كيف عرفت ان الشغاله لها سبب ؟؟
تقول بيتي ماله الا طريقه سريه وحده تفتحه
مايعرفها الا شغالاتي
...................
امي دقت على وحده تأجر شغالات يوم 10 شعبان
نبي اضافيه لرمضان لحاجه ماسه
تقول قالت لها ب 4000 اندونيسيه
قالت معها اقامه ؟؟ قالت مثلك عارف
اني الي ياجرون هاربين لاجواز ولا اقامه
اخذت اختي الكبيره رقم الحرمه واتصلت على 922 بلغت عنها
قبل يومين دقيت على الرقم رد رجال قال ماعندنا احد ياجر
.....
خالتي عطوها رقم بنقالي يجيب سواقين
تقول حط السديس صدى جواله
من كبر الغش والكذب
مسوي فيها ديانه
عارفنا يالسعوديين شعب نحب الدين
قالت ابي سواق
قال لها شهري 2000 - 2500
قالت راتبي 4000قال وايش مشكله أنا ؟
انتا يبغى سواق يدفع فلوس
حكت لنا بلغنا عنه 922
وربي دقيت على رقمه بعدها بأسبوع
مسكر ....
بلغوا ولكم اجر
هذولي يتاجرون فينا حنا وفي البشر
لاتضيع بلدنا بدخلاء يتلاعبون فينا
كلنا ممكن نطيح في نفس الموقف
ونجيب شغاله او سواق ويهربون ونخسر
فحطي نفسك في موقف اختك المسلمه
واخيك المسلم
لنقوم بحمله للتبليغ عن سماسرة الخادمات والسائقين لايقافهم
نتصل على 922
الرقم هذا خاص بالابلاغ وجربنا وجدا متعاونين
وننشر عنهم بأسمائهم لردعهم
وفقني الله واياكم لنكون عاملين على الخير
لما فيه حفظ اموالنا وذممنا
ومتعاونين على الخير
اتمنى تثبيت الموضوع لنشر الخير
ولكم أجر
منقول للفائدة