الشك يذبحني

السلام عليكم ورحمة الله وبركاته

أخواتي الكريمات

أكتب مشكلتي و دموعي على عيني و اتمنى ان كل وحده تفيدني
انا فتاة عمري 20 سنة ... من فترة تم عقد قراني من الشخص اللي حبيته و رضيت به زوج لي و لسه باقي عالزفاف وقت مش بسيط
المهم اني في بعض الفترات كنت اتواصل مع خطيبي عن طريق الانترنت يعني بالمسنجر و كذا بسبب سفره لدورة عمل في احد الدول الاوروبية ... و علاقتنا كانت أشبه بالخيال بس بعدين صحيت على واقع مؤلم دمرني تماما
في احدى المرات حاولت افتح ايميل خطيبي و عرفت الباسوورد و لقيت رسائل غريبة من مواقع خاصة بالزواج هذي المواقع تبحث للشاب او الفتاة عن الزوج المناسب و انصدمت لانضمامه لمثل هذي المواقع و لما سألته قال لي بأن صاحبه يستعمل ايميله أيضا و الظاهر بأنه هو اللي سجل في هالمواقع و برر لي موقفه بلعت السالفه .. المهم بعد فتره لقيت رساله من وحده تعرف خطيبي و ذكرت في رسالتها بأنها سعيدة جدا لانها تعرفت عليه ساعتها دارت بي الدنيا و ما عرفت ايش اسوي ... ما ناقشته ولا ذكرت له الموضوع .. بس خذيت ايميل البنت هذي و اضفتها عندي و خبرتني كل شي ... قالت لي بانها تعرفت على خطيبي لمدة اسبوعين شافها عالبحر و رقمها و كلمته و تموا على هالحال لمدة اسبوعين و بعدين هو اختفى و ما اتصل فيها لفترة طويلة .. انا في البداية ما صدقت و حاولت اطلع له اي عذر قلت في خاطري يمكن صاحبه ولا هي غلطانة بس كل اللي قالت لي اياه عنه كان صحيح رقم تلفونه و سيارته و اسمه بالكامل و وظيفته كللل شي كان صحيح ... حتى انها تعرف بانه كان عايش لفترة من الزمن في احد الدول الاوروبية و ذكرت لي بلاوي سودة ما يصدقها اي انسان ... والله العظيم حسيت بان روحي طلعت و ما قدرت استوعب .. المهم اني كلمته و انكر مره ثانيه و قال لي بانه ما يعرفها و ما عنده اي فكره من تكون و من اللي كلمها المهم اني انقطعت عنه لفترة من الزمن و بعدين رجعت المياه الى مجاريها ... في هذيك الفتره قالت لي صاحبتي بان كل الرجال لهم ماضي و كلهم لهم نزوات و كذا ... المهم باننا تصالحنا .. قد تسأل كل وحده منكم وين المشكلة ... المشكلة اني اصبحت اشك فيه في كل شيء .. اذا ما اتصل اقول اكيد يكلم غيري ... و اذا غاب عني لفتره اشك بانه مع وحده ثانية ... و الكلام اللي يقوله لي ما عدت اصدقه ... احس بان هالكلام انقال لالف وحده غيري و نفس المشاعر حست بها الف وحده غيري ... شعوري هذا دمرني و خلاني افقد الثقة في نفسي ايضا .. احيانا اقول اكيد فيني شي خلاه يسوي كذا اكيد ان اللي تعرف عليهم فيهم شي يفوقني .. والله تعبااانة نفسيا و مش عارفة ايش اسوي .. احبه بس ما عدت اصدقه ابدا ما اقدر اثق فيه .. و صرت اتخيل حياتي المستقبلة معه ... احسها بتتدمر و كل اللي راح ابنيه بينهار حتى اهتمامي فيه ما عاد مثل الاول احس بان الشغف اللي في قلبي صابه برووود
الله يخليكم ساعدوني ايش اسوي .. لاني جدا تعبانة و بموت من القهر