..
ايه احب اراقب الناس >>> احس اني رادار
فيه احد عنده اعتراض لاسمح الله
عادي يعني وش فيها اذا راقبت اتسلى
عارفه ان الي يراقب الناس يموت هما
وعارفه ان مو من خلق المسلم مراقبة الناس والانشغال بحركاتهم وسكناتهم
انا قصدي باالمراقبه التطويريه
مراقبه ايجابيه
يعني مثلا اراقب تصرفات الناس الايجابيه او اقوالهم واحاول اطبقها على نفسي
يعني بدل مانقول من راقب الناس مات هما نقول من راقب الناس ازداد حكمه >>>> ياليتس ساكته بس
خلوني اسرد لكم بعض مراقباتي الراداريه
مرتن من المرات كنت بمجلس حريم عزيمه
وكان بجانبي امرأتين كبار وبينهم بنت .. امها وخالتها
واذا باالبنت تعاتب بصوت خفيف وباين على ملامحها اثار الغضب
وتردد اتركوا الناس في حالهم
مالكم حق تتكلمون
ياناس حرام عليكم
وفجاءه
قامت وقالت اقوم خير لي وراحت
انا هنا طق فيني عرق ... وراها زعلت وقامت >>> بغيت الحقها واسألها بس خفت تقول وش دخلك
المهم ضحكت خالتها وقالت
زعلت فلانه علينا وتهاوشنا
قالن الحريم ليه ؟؟؟
قالت نهرج في وحده وهي ماتعرفها وتقول اسكتوا ليه تلحقونها وحنا ماقلنا فيها الا الصحيح
يعني بقاموسهن اذا كان الكلام صحيح يجوز تغتاب وتتكلم في الناس
انا هنا دخلت وادي ثاني وسرحت جلست افكر
ياالله
ياحظها باالاجر هاالبنت ... يالا شجاعتها في الحق
يالله ياليتني مثلها
تمنيت اقوم واحب راسها
الكثير والغالبيه يسكت عن الذب عن اعراض المسلمين .. ولسان حاله يقول الذنب ذنبهم المهم انا مااتعرض للناس
لا ياالطيبه عليك ذنب .... ذنب السكوت وعدم انكار المنكر
سبحان الله هاالموقف مايغيب عن بالي وعطاني دافع اراجع نفسي
واحاول جاهده اذا جلست بمجلس وسمعت احد يجيب سيرة احد باالشين احاول انصحه
وبحكم ان غالبية المجالس تكتظ باالنساء كبارا وصغارا وقد يغلبنا الحياء عن النصيحه
لذلك احاول ان ابطن نصيحتي باالحياء ولطيف الكلام كقول الله يستر علينا وعليها او دعوا الخلق للخالق
واحاول ان اغير مسار الحديث بسؤال عابر او حركه ملفته
الموقف الثاني
مره من المراريت كنت جالسه انا واخوي وولد اخوي
ولد اخوي ولد اخوي الثاني مو اخوي هذا >>> خلصينا عاد يعني لازم نعرف انه مهوب ولد اخوتس هذا
المهم جالسين نسولف وجبنا طاري شخص قريب لنا
المهم اخوي قام يسب هاالشخص ويقول انه تسذا وتسذا
عاد انا قمت دافعت عنه وقلت والله ان قلبه طيب وحبوب وتسذا وانا والله صادقه بس مشكلته عصبي شوي
قام اخوي يجدع فيه شوي ويقول اخلاقه سيئه
المهم خلص من كلامه وسكتنا
فجاءه
الا اشوف اخوي سرح شوي وكأن وجه تغير
قمت انا وسويت حركه بيدي على وجه وقلت نحن هنا وين رحت ..!!
قال تبين الصدز
قلت هات
قال : الله يلعن الشيطان تراني مواعد نفسي وماخذ عليها عهد مااجيب سيرة احد ولا اتكلم في احد
استغفر الله يارب عفوك
انا هنا كعادتي
سرحت واعطيت لي وادي
قلت يالله ياحلو محاسبة النفس وتوبيخها
يعني لو انا كل ماأذنبنا تضايقنا وعاتبنا انفسنا بهاالشكل كان حنا بخير
كان تحاشينا الذنب وكرهنا الوقوع فيه
بس مشكلتنا نذنب ونستصغر الذنب ونقول الله غفور ..!!
وتناسينا ان الله شديد العقاب ايضا
عاد قلت ياخوي تراك مأجور !
قال : اتكلم في الناس وتقولين مأجور .. ترى برنتس بهاالكاسه على دمجتس
قلت هذا جزاي يومني بخفف عنك الاحساس باالذنب وبغيت ازعل واقوم
بس تعوذت من الشيطان وقلت كملي يابنت واخذي الاجر
ورجعت قلت له ايه مأجور ..!
( عندما تقوم بمعصيه ثم تندم عليها وتشعر باالضيق والرغبه باالتوبه ...اتعلم انك مأجور على هذا الندم ..فما اعظم هذا الدين ..!! )
قلت انت بخير مادمت تندم وتراجع نفسك ومصيرك مع الاستمرار تستقيم وتتحكم في قلبك ولسانك وتنال رضا الرب
واذا غلبك شيطانك وذكرت احدا بسوء استغفر ربك وقول ( استغفر الله لي ولفلان واذكر أسم الي أغتبته وكررها ثلاثا )
لعل الله ان يغفر لك ويسامحك
تسنه اخوي اتسع خويطره وتبوسم وقال .. جزاتس الله خير ياوخيتي
فعلا هنيئا لقلب يندم .. ونفسا تحاسب .. وضمير يوبخ صاحبه عند الخطأ
طوبى لمن يحاسب نفسه قبل ان يحاسب
شطحه :
( وش موقع ولد اخوتس من الاعراب ليه ذكرتيه )
لا بس كان جالس معنا ديكور هع هع
الموقف الثالث >>> شكل الاخت مطوله :tongue:
مره كنت بزواج قريب لي
وشفت خالة العريس جت وجلست وتضحك ومبسوطه
وتسولف مع ام العريس الي هي اختها وبنات اختها اخوات العريس
المهم وصلت المطربه >>> بمصطلح أخر الطقاقه :icon28:
الا أشوف خالة العريس قامت ولبست وودعت اختها عند الباب وراحت
عاد انا هنا اشتغل الرادار الي بداخلي
ياربي وين راحت .. ذالحين تو بدت الحفله ..!
المهم عرفت انها غادرت القاعه لانها ممتنعه عن حضور الطق والرقص والطرب واللهو اجتنابا للأثم
وهذا حالها في باقي الاعراس تجي تأدي الواجب وتبارك قبل ماتبدأ الحفله وتمشي
انا هنا غبطتها وفكرت في نفسي :44:
وش أستفيد اذا حضرت زواج وشفت انواع المنكر.... ومابيدي شي لاأنصح ولاأغير ولا أمنع !!
ليه مااجلس في بيتي واجتنب كل هاالمنكرات من عري وطرب وقيل وقال
وتعليقات مابعد الحفله على خلق الله هاذي لبسها شين وهاذي سمراء وهاذي قصيره وهاذي رقصها يفشل
فوق الخساير الي تدفعها الوحده من فستان وتسريحه ومكياج ووقت وجهد
فوقها تتحمل وزراً من الذنوب التي تحصل في هذه الليله التي تبدأ من ساعات الليل الاولى وتستمر حتى ساعات الصباح
لانها لاهي التي نصحت وانكرت ماتراه
ولا هي التي اعتزلتها أتقاء الاثم والشبهات
طيب اوكيه زواج قريب وقريبه ونقول مضطرين نحضره
طيب مابال من تحضر في العطله عشر طعش زواج
اثنين يقرب لها والباقين معارف من بعيد وجيران وبنت صديقة امي واخت مرت اخو زوج اختي وخالة بنت عم عم امي وياجد ابوي حك ظهري
ليه مانصير مثل هاالحرمه التي اخلصت النيه لله وقاومت نفسها الاماره باالسوء وتغلبت عليها
نعرف ان المرأه تحب التجمل واللبس والاستعراض في المناسبات
بس ليه مانقول بكره في الجنه بنلبس ونتزين وبنرقص ونغني ونسهر
هناك في الجنه لاذنب ولا حساب ..!!
ليه مانحاول نقنع أنفسنا بان الدنيا ذي زايله حرام نضيعها في اللهو والمنكر وامور لسنا مجبورين على اقترافها
بل نقترفها بطيب خاطر
ليه مانقنع انفسنا ان الاخره هي المقر الحقيقي وهي السكن الدائم
ليه مانحقر جميع ملهيات الدنيا ونصغرها في انفسنا عشان ماتجذبنا ونتعلق بها
لاحول قسم تأثرت بهاالحرمه وقررت اراجع نفسي
تخيلت الوحده وهي لابسه لبس عاري ومسرحه شعرها وحاطه البف والمكياج مغير ملامحها
وقامت ترقص تعرفن الحريم مع الدق كيف يتفاعلن ويسون حركات هستيريه
تخيلت وهي مندمجه وترقص بقوه تحوشها سكته لاقدر الله ولا خلل مفاجيء وتسقط ارضا لا حراك ولا نفس
باي حال ستقابل الله ..!!
الموقف الرابع :
كنا مجتمعين ياالبنات سهره يعني
وضحك وسوالف
المهم الا وحده من البنات تسللت واختفت عن الأنظار
عاد انا تقريبا الوحيده الي لاحظت >>> لاتسألون ليه
قلت لكم رادار بسم الله علي :tongue:
المهم قمت اشوف وين راحت الا اشوفها تتوضأ وتسنن الله يكثر من امثالها
طبعا للامانه مو اول مره اشوفها تتسلل وتختفي لبعض الوقت وترجع
بس ماكنت أراقبها الا هاالمره قلت براقبها وعرفت السبب
عاد جلست افكر فيها قلت ماشاءالله في عز الضحك والوناسه واللمه مانست تسنن
البعض تقول انا أتسنن كل ليله مافيه مشكله اتركها الليله
والبعض تقول انا مو من عادتي اتسنن خلقه عشان اتسنن في وقت مثل هاالجمعه
والبعض تاخذها السوالف ويغلببها الشيطان وتتساهل او تتكاسل وماتقوم تصلي
والبعض تتساهل وتقول سنه يثاب فاعلها ولا يعاقب تاركها عادي لو مااتسنن
انا هنا قررت اخذ هاالانسانه قدوه لي واراقبها واقتدي فعلها
لأني رايت منها فعل ثمين استوقفني ..!!
شطحه ختاميه :
هذا موقف لي مع بنت اختي الصغنطوطه النتفه
موفف يدل على ان الكلمه الطيبه والأسلوب الزين يأثر حتى على الاطفال فما بال الكبار
كنت منسدحه على سريري وجتني قالت : خاله انتي يع ووثخه >>> وسخه
قلت لها وانتي حلوه وقموره وانا احبك
طالعت فيني ورجعت كررت وهاالمره بصوت عالي وقالت انا حلوه وأنتي يع ووثخه
قلت ايوه ياحياتي انتي حلوه وقموره وانا يع ووسخه
رجعت على ورى ووقفت تحدق النظر فيني مستغربه ردت فعلي
كانت متوقعه برد وبهاوشها وبقول حتى انتي وسخه
والي يشوف نظراتها يعرف انها متفاجئه من ردي
بعدين جت يمي وضمتني وقالت :
خاله انتي حلوه .. قلت : وانتي حلوه ياعيون خالتس وضميتها ونمنا >> حشى مسلسل
( حسن الكلام وجمال العبارات تسحر الناس .. وتأسر قلوبهم ...فالأنسان لا لحمه يؤكل ولا جلده يلبس ..لكن حلاوة لسانه تجذب )
وسلامتسن
فتكن بعافيه وراحة بال
وبعض المراقبه والملاحقه لها فايده عشان كذا الوحده مننا قد ماتقدر تكون خير مثال وقدوه لانه ربما هناك من يراقبها ويقلدها سواء في الخير او الشر
جزاك الله خير خيتو على هالموضوع المفيد