الصيف قرب ...والسفر حان طاريه ....نداء لكل الحكيمات

السلام عليكم ورحمة الله وبركاته
خواتي وعزيزاتي احبكم في الله
والله اني في هم وحيره وقلت مالي غيركم بعد الله عشان اشكي له همي
مو شرط اني ابحث عن حل لكن اعتبروها فضفضه لاني تعبت من التفكير وانا ماتعودت اشتكي لاحد ولاعندي اصلا احد اشكي له ...
انا متزوجة وتقدرون تقولون اني قدام الناس والي يشوفني يقول اني سعيده ...وانا احمد الله على فضله مو ناقصني شي ماديا ....لكن العلاقه الروحيه والعاطفيه بيني وبين زوجي تقدرون تقولون انها شبه معدومه ..
زوجي انسان انطوائي ...اربع وعشرين ساعه قاعد بالملحق مقابل التلفزون ...لايروح لاحد ولايشوف احد ...بس مقابل قنوات الرياضه والكوره الي مفتون بها فتنه اسال الله ان يزيل حب الكوره من قلبه ...يعني اليوم الي يكون فيه مباراه مهمه الله لايوريكم لا نشوفه ولانسمع صوته وياويلنا نقرب ناحيته
حتى لما احاول اكسر هالعزله الي معيشنا فيها وادخل عليه بصينيه شاي او حلى وقهوه ياكل وهو ساكت ومبقق عيونه بهالتلفزون مايعطيني وجه ...صرت اخليه براحته
مشكلته مايودي ولايجيب ...
اغلب مشاويري احاول اقضيها مع قريباتي الي عندهم سواقين ...والاهو مستحيل ينزلنا للسوق او يودينا مشاويرنا الا بطلعة الروح ...
مطاعم وملاهي هذي مالنا بها خبر الا مع قريباتي نتواعد انا وياهم كل فتره ونروح ...هو ماعنده مانع اهم شي لانطلب منه شي
شغاله ماعندي ...ورافض يجيب
لها السبب قلة روحاتي وجياتي لان اطفالي صغار وصعبه اشيلهم كلهم معي واتحمل مسئوليتهم انا لحالي
شفتم هالي فوق كله قلته
والله عاااااااااااااادي عندي وعايشه حياتي ولاعمري اشتكيت وامورنا تمام ...ناكل ونشرب وننام ونعتبره غير موجود في حياتنا
عايشين طبيعي طول السنه ....حتى تجي الاجازه والصيف :icon33:
زوجي ياطويلين العمر من تزوجته كللللللللللللل صيفيه لازم يسافر لحاااااااااااااااااااااااااله ...ولما اقول لحاله مو قصدي انا وعيالي ...يسافر لحاله من غير لاصديق ولاونيس ...
انا زوجي مطمئنه له وواثقه فيه من ناحية الدين ولو سمحتم لاتجي واحده تقولي انتي غشيمه وغبيه وبكرا يجيب لك الايدز !!!!!!زوجي رغم عيوبه يعرف ربه ويعرف الحلال والحرام
سفرياته اغلبها يقضيها تمشي في الحدايق وجلسات مقاهي ....
الي قاهرني انه يرفض رفض تام اني اسافر معه ..بحجة انه يتعب طول السنه ومن حقه ياخذ راحة واستجمام من المسئوليه :44:
انا ابي افهم اي مسئوليه الي يتكلم عنها وهو رامينا طول السنه ولايدري عننا ....
حتى روحه خميس وجمعه للشرقيه مستكثرها علينا ....والي يقهرني اكثر اسلوبه
يجيني قبل السفر بيومين يقول جهزي شنطتي ترا بسافر اليوم الفلاني ..وجهزي اغراضك انتي وعيالك عشان اوديك لاهلك -اهلي في مدينه ثانيه غير الي نسكنها
يعني لو انه يوديني مطعم ويجيب هديه ويقول يا ام فلان لاتزعلين انتي عزيزه وغاليه ومن هالكلام يلحس عقلي بكلمتين وش يخسر يعني
ليش يعاملني كاني مكينه ماتحس ولاتشعر
طول السنه اكرف بالبيت ومتحمله كاااااااااااااااااااامل المسئوليه لحالي حتى مسئوليه مقاضي البيت والعيال ومدارسهم وهو يتسدح قدام هالمباريات واخرتها يقول انا تعبان بارتاح
بالله مو ظلم ؟؟؟؟؟
طبعا كل سنه ازعل واسوي هوشه واقول ان رحت لاهلي وسافرت ترا والله ما ارجع ...واخرتها اتعوذ من ابليس وارجع لبتي بدون حتى كلمة اسف منه لاني ما ابي احسس احد ان بيننا مشاكل ...يجيب لي قارورة عطر من المطار بزعم انه هديه ويراضيني فيها
والي يقهرني ان طول السنه احرم نفسي وعيالي من اشياء نبيها ونشتهيها عشان لانكلف عليه بالمصاريف واخرتها يجي هو بكل برود ويطير الفلوس على وناسته هو بس لحاله ..بالله مو انانيه ؟؟؟
حتى بيت ملك ماعندنا ...ساكنين في خرابه عمرها اكثر من 25 سنه مافكر انه يرمم البيت او يجمع فلوس ويطلعنا في بيت ثاني مع العلم ان راتبه ودخله ممتاز وغيرنا كثير اقل مننا لهم بيوت من زمااااااااان


معليش خواتي طولت عليكم بس عشان اعطيكم صوره عن وضعي
الان انا في حيره لاني عرفت انه بيسافر هالصيفيه كالمعتاد رغم وعوده لي كل مره انها اخر مره
وش اسوي ؟؟؟

هل ازعل واقوم الدنيا بس اخليها زعل جد هالمره وادخل اهلي او اهله بالموضوع لاني بصراحه طفح الكيل
هل اسكت واخلي الحياه تمشي كما هي وخلاص هذا زوجي وهذا طبعه واستسلم؟؟؟
هل انتقم منه بطرق ثانيه ؟؟فيه اكثر من طريقه انتقم منه وتبرد حرتي بس ماودي اكبر قلبه علي ؟؟؟
من قهري افكر احيانا اقطع جوازه او اخفيه بس مو هذا اسلوبي وما ابي احل المشكله بمشكله ثانيه
تكفون علموني
انا والله كل ليله انام ودمعتي على خدي من قهري لان متزوجه بالاسم و محرومه من اشياء عاطفيه كثييييييييير
ماودي اتكلم عنها

انتظركم على احر من الجمر