القصة وما فيها
انه دائم نشتهي الاكل الصيني ، وصعب كل مرة ندور مطاعم ، وصار بيني وبينه تحدي
الى ان قالت لجنة التحكيم " عائلتي " اني قدرت عليه .
نبدء الان بالطبق الاول وهو : الارز بالخضار المقلية بالبيض " مثل ما يسمونه " .
المقادير :
" كل المقادير حسب الحاجة لكن الافضل ان تكون الخضار شي بسيط "
- زبدة .
- بصل اخضر " وهو سر الطبخة " ، زهرة ، جزر شرائح ، فلفل بارد شرائح ، ملفوف يقطع كبير ، ممكن بزلاء معلبة لكن انا ما سويت ، فطر ، ذرة صغيرة مقطع حسب الرغبة .
- بيض مقلي عادي بزيت وملح ويقطع اصابع .
- رز " بنجابي المهيدب " مسلوق بماء وملح وزيت واذا حبيتي شوي زبدة وقليل ملح اندنوسي " جيني موتوا " .
الطريقة :
نقطع البصل الاخضر بطول الاصبع ونستخدم في البداية فقط النصف العلوي يعني اللي يكون لونه ابيض اما الاخضر اللي تحت نتركه اخر شي .
نذوب الزبدة على المقلى ونضع البصل الخضر " النصف العلوي " لمدة ثواني وبعدين نخرجه على ورق الزيت ، وكذلك الفلفل البارد نضعه بس ثواني وبعدين نخرجه .
ونضع بعدها الزهره نقلبها الا ان نحس انه صارت نص استواء ونخرجها على الورق ،
وهكذا كل باقي المقادير كل واحد نقلقله في الزبدة ونخرجه .
" ترى هذه الصورة خضارها كثير لاني سويت لي ثلاث اطباق والرز ما يحتاج الا شي بسيط " .
وبعد كذا نجيب طبق التقديم نحط الخضار المقلية مع البيض والبصل الاخضر اللي ما طبخ يعني الجزء اللي تحت ولو تحطي فلفل بارد شوي ما طبخ بعد ازين و الرز ونحركها بهدوء وبعدين اقلبها على الطبق ، انا احب تكون صينية صغيرة ،
وبالهناء والعافية .
الرجاء عزيزاتي عدم الرد لاكمال الموضوع .....
المقادير :
- مكرونة صينية أي نوع " تكون طويلة وعريضة ومكتوب على غلافها مكرونة بالبيض " .
- صلصة الصويا الحلوة ، انا استخدم النوع الخفيف والغليظ احس انه يظبط اكثر .
- نفس انواع الخضار المطبوخه بالزبدة بس من غير البيض .
الطريقة :
نسلق المكرونة بماء وملح وزيت وقليل زبدة ،
نحط في المقلى شوي زبدة ونضيف صلصة الصويا النوعين وملعقتين كتشب " اذا كان موجود " وملعقة معجون طماطم وملح اندنوسي وقليل من الملح العادي والفلفل الاسود والكمون وتكثري سكر وتخليها ثواني على النار .
بعدين نضع الخضار المقلية اللي عندنا والبصل الاخضر الجزء اللي تحت والفلفل البارد من غير طبخ والمكرونة .
وبالهناء والشفاء .
الطبق الثالث التبنياكي :
المقادير :
- نفس الخضار المقلقلة بالزبدة .
- طريقة صلصة الصويا مثل اللي في المكرونة .
ملعقة نشاء الذرة مذابه في ماء بارد .
- سمك او ربيان مقلقل على زبدة انا سويت سمك .
الطريقة :
دائم السمك او الربيان يكون فيه ماء ، نحاول نتخلص من الماء بوضعه على مقلى على نار عالية واذا طلع ماء كثير نكب الماء ونحركه بسرعة الا ان نتخلص من الماء بس لا يطبخ كثير وبعد كذا نشوحه على الزبدة وبعدين نحط عليه الخضار اللي جهزناها ، ونضيف النشاء على صلصلة الصويا اللي عملناها مثل صلصة المكرونة .
وبالعافية .
انا عملت سلطة بسيطة اشوفها في مطاعمهم وهي عبارة عن اصابع جزر وخيار مع ملح وليمون وخل ابيض وكثري سكر وماء .
وهذه سفرتنا المتواضعة :
وان شاء الله اكون عرفت اوصف الطريقة ترى انا اول مرة اشارك واعذروني على الاطالة والتصوير اللي ما اتوقعت يطلع كذا ، كان عندي في الجوال 100 % .
وفي حفظ الله ورعايته .