السلام عليكم ، أخواتي إلي منكم تعرف في حالاتي ياليت تفتني أو ترشدني : قصة طويلة ولكن أقلكم أهم مافي الموضوع إن زوجي تبع بنات هذا أولا وكم مرة اكتشفته يقولي ياشيخة والله بس تسلية وما توصل لحد الزنا هذا أول شيء الشيء الثاني انه يتناول الحشيش وعرفت هذا الشيء من قبل 9 سنين طبعا ويقول أنت السبب من مشاكلك، هذا الشيء الثاني ، الشيء الثالث :قبل ثلاث سنين انخطبت بنتي الكبيرة وعشان ما كلمت أخواته يوم الشوفه لان وحدة فيهم أتكلمت على بنتي في خطبة سابقة باني دخلتها على الخطيب وصدرها باين وجميع مفاتنها ظاهره عشان يوافق عليها لأنها قصيرة ومحد يخطبها ، وطبعا صارت مشاكل وكلام والكل قام يدافع عنها بما فيهم أخوها بأنها لا يمكن تتكلم على بنت أخوها والكل يقول أنت في يوم قلتي كذا وفي يوم ما عجبك لبس هاذيك وكل وحدة راحت تفتكر الكلمات والسقطات عشان يغطوا فضيحة أختهم ، وانا قلت الاعتزال عنهم أفضل وسيلة فاعتزلتهم لا أروح ولا أجي عشان لا يكثر الكلام ، قام أخوهم قلهم هي طول الليل تقولي أخواتك واهلك ( فسوها حجة ) وطلعوا أني مريضة نفسيا ، المهم جاء وقت فرح البنت ولازم يجبهم يوم الغمرة دخلوا مكشرين وتطاولوا بألسنتهم على ضيوفي وتدخلوا ليش لبست البنت وليش البنت مبوزة وليش جبت مباشرات وليش الأخت الصغيرة تشمق وليش جيرانك ( إلي ما يعرفوهم ولا عمرهم شافوهم) ما عطونا وجه (كلام وحجج ما يقولها بزرة) ، ونفس الكلام اللي ما يودي ولا يجب وقلت خلاص لا عاد تجوني ولا اروحلكم ، فثارت ثورتهم مع أخوهم بان البيت بيتهم و مو من حقك تمنعينا ، قلت إذا بغوا يجوا أنا اخرج من البيت وانت حر معاهم المهم ما أتقابل معهم ، فقالي خلاص أنت اعتذري منهم وانا مستعد أتغير بالنسبة للأمور السابقة وقلت فرصة ورحت عند أمه فوجدت البنات عندهم وتطاولوا عليا باللسان ومانتي حق معروف أخونا مسكنك في شقة كبيرة وجابلك شغالة وسواق ( مع إيقاف التنفيذ، لأنه بس يودي المدرسة والجامعة، لأن زوجي دائما مسافر) وما نبغاك واخرجي بره ولا نشوفك وراح نفضل ورآك حتى يطلقك أخونا وبالنسبة للبنات راح يجونا رغم انفك وراح نروح بيت العروسة بكرة يوم الدبش وأنت ما تروحي إحنا عماتها وأنت قردة ، بنتي صارت تبكي علشان خاطري يا عمه لازم أمي تروح علشان خاطري قالت خاطرك تحت الرجول وإحنا عماتك ياقليلة الأدب وراحوا واخذوا يتكلموا مع أهل العريس إني بطالة وما قلتلهم على شيء وان أخوهم مسكين طرطور في يدها لكنه راح يطلقها من كثر ما تعب معاها وخوذي بالك من البنت تراها زى أمها !!!..
طبعا الكلام وصلني وأخوهم ينكر الكلام ويقول أنت كذابة وتألفي الكلام علشان يصير في صالحك ..، بنتي الكبيرة حلفت ما راح تروح عندهم وفعلا لكن هما ما تركوها راحوا يبغوا يواصلوا أم زوجها كل ما عرفوا أنها في مكان يلاحقوها ويقولوا كلام عني وعن البنت يوجع القلب ... ، وبعد شهور من القطيعة اخذ االاولاد في أول يوم العيد عندهم وتركني من غيرهم ، ما عيد عليا وراح عيد على جميع العيلة 100 ريال لكل واحد فيهم يعني بمبلغ 5000ريال إحنا طبعا طوال أيام العيد في البيت ... المهم الآن قبل أسبوعين يقولي ايش رأيك نفتح صفحة بيضاء بس بشروط وايش هي الشروط قال نكلمهم من بدري إذا عندنا مناسبة وتقابليهم باحترام وما طويلي لسانك عليهم ( قالت وإذا وحدة فيهم سبت أو طولت لسانها قال لازم أنت تطنيشي وتسوي نفسك ما سمعتي ) شوفي الظلم رفضت طبعا وقلت ما أبغى هذا الحل قال خلاص بنتي ( المتزوجة) ما تولد عندي ولا تدخل بيتي طول ما أهلي ما يجو وتستقبليهم ، واهلك كمان رغم انه أهله جوا في العيد وعزمهم وآنا خرجت من البيت ... وسيبنا الموضوع معلق يوم الخميس هذا رحنا فرح وشفنا جدتهم وعماتهم وما راحوا يسلموا بناتي عليهم لأنهم هما كمان لما جوا فرح بنتي سلموا على أهل العريس وما سلموا عليا ولا على أهلي ولا على بناتي ( اللي قدام أخوهم يقولوا عنهم هاذول بناتنا، وإحنا يعلم الله قد ايش نحبهم) أخته الكبيرة قابلت بنتي الصغيرة في الحمامات وقالت لها ليه ما تجي تسلمي ياقليلية الحيا ولا هذه تربية أمك اللي ما عندها أدب قالت البنت تربية ماما ما فيها شيء ومشيت وجلست تبربر وتتلفظ بكلمات...
ولما رجعنا من الفرح أخته الكبيرة قعدت تتصل وهو في الصلاة فما رد عليها ولما جاء مغرب الجمعة ما ادري فين خرج رجع ومسكنا انتوا ليش ما سلمتوا على عماتكم وجدتكم البنت الكبيرة قالت انا ما شفتهم والصغيرة ما رضيت تحكي خافت من صراخ أبوها وقالت المفروض أبونا يوقف معانا مو ضدنا وبس ضربها بالنعل ( الشبشب) و الكفوف فدافعت عنها وأخذت اصرخ وأتكلم المهم جوا ضيوف على فجاءه وجاء اخويا وخرجه من البيت ولما رجع وسمع أنهم أهلي فتح الباب وقال ايش الغلبة هذه نبغا ننام ( طبعا سمعوا وقاموا خرجوا) وانا نمت في الصالة يومها قلت علشان اتكافا شره يوم السبت في الظهر قال للبنات عبوا ملابسكم كلها قالوا ليش قال ابغي أرميكم في الشارع محل ما اوديكم تقولوا حاضر وأنتو ساكتين انا قلتلهم أكيد راح يوديكم عند جدتكم وعماتكم عندكم مجال إنكم تركعوا تحت رجولهم ( طبعا هذا كلام أبوهم انت لازم تحترموا عماتكم وتركعوا تحت رجولهم لانهم في مقام ابوكم )،طبعا وضحت لهم الصورة من وراه لما راح المسجد..... البنت الكبيرة قالت خلاص نروح بس مع امنا قالها امك انا راح اطلقها وارميها في الشارع قالتله خلاص ارمينا معاها احنا ما نعيش من غير امنا طبعا قام يضربها ويكسر الاشياء فوق راسها وانا ادافع عنها طبعا نابني الكثير من الضرب اتصلت على الشرطة تجي الله يكافيهم محد جاء حضرت امي ومع الصراخ والكلام رجع ضربني انا وبنتي قدام امي ، امي زعلت وصرخت وقالت حرام عليك انت منتا متربي تضرب بنتي وبنت بنتي قدامي اذا ما تبغاها طلقها قال هي طالق وبس وعينك ما تشوف الا النور صار يضرب وامي تسب واناادفه عني والبنات يبكوا جات اختي واخوايا على الموقف ودخلوا طبعا في المعركة وطول لسانه على اختي وعلى زوجها (مدري ايش دخله في الموضوع مسكين)سمع وومسك الخشبة يبغايضربه لانه صراحة قال كلام جدا سفيه المهم فكهم اخويا وجاء جوز بنت اختي وجوز بنتي واخوه الكبير وصارت جلست رجال ( طبعا الاخوات قالوا احنا ما شفناه ومالنا صلاح) قال انا رحت لامي وسالتها البنات يجوا سلموا عليك قالت لا انا ما ابغاك ولا ابغا بناتك المهم دحين قال قدام الرجال انا ما ابغا منها غير تحترم اهلي وتستقبلهم ويصير الصلح ويرجعوا زي ما كانوا في الماضي انا ما عرفت ساعتها ايش اقول ...
ايش رايكم انا خايفة انه يكذب لانه قبل كده وعدني باني ارضيهم وانا اسويلك اللي تبغي طبعا اخذ غرضه بانه جوا بيتي وبيت بنتي وجوا الفرح وبعدها قالوا لا نشوفك ( البنات بس) حتى البنات متى يطلوبهم والله لما عندهم اختبارات او لما فيه مناسبة عند اهلي والله العظيم هذا الي حاصل ، طلع كلامه انه راح عند امه وهي الي كلمته كذب لأن امه كانت يوم الجمعة في بيت اخوه..وشكلها وحدة من اخواته هي الي حكته وعلشان لا يبان القصة انها تحريش نسبها لأمه وانه هو اللي سألها ........ الله يكفيهم كلهم
هو خلاص دحين طلق والله ما ادري في حسابي المرة السادسة وهو يقول علشان فيه شهود هذه المرة الأولى ، المرات الآولى كانت تهديد فقط ( كلام الطلاق واحكامه ...حنا راحين للمحكمة)
بس انا ابغى اعرف رايكم اصر على الطلاق وانفذ بجلدي ولا اصبر علشان خاطر بناتي انتوا سمعتوا كيف وضع عماتهم وجدتهم ومهما اشتكوا لأبوهم ماراح يسمع منهم لانه يكلمهم دائما ما فيها شيء لما تخدموا عماتكم هم قي مقام ابوكم وبناتهم من باب الألفه والمحبة علشان الكل يحبكم ويقولوا اني عرفت اربيكم ...
البنات متماسكين بي بس يقولي ياليت فيه حكم انك تتطلقي ياماما وبرضه حنا نفضل معاك ما نبغى نروح عندهم
لا تقولي ويش الي صبرك انا ما عندي وظيفة ( بالرغم من اني على مشارف اخذ الدكتوراه إن شاء الله ... اما هذا موضوع تاني وأسى من المجتمع والناس الله المستعان)
وابوايا متوفي وامي كانت عايشة معايا وخرجت من المشاكل وراحت عاشت عند اختي ( اللي حالت زوجها على قد الحال) المهم لقمة هنية افضل من المنية بان زوجي مقعدها عنده ويصرف عليها ( هذا كلام اخواته عند الناس) واخوايا ما عنده الجنسية يشتغل بإقامة في محل واهله في بلده يادوب عايش في غرفة ..
انا طولت بس والله من حر ما بي الله يخليكم ابغى حلول واقعية مو خيالية
sama-sami @sama_sami
عضوة نشيطة
يلزم عليك تسجيل الدخول أولًا لكتابة تعليق.
امووواج الحنان
•
حبيبيتي أصبري واحتسبي والله يقويك ويصبرك لكن ما أنصح انك تفضلي مع زوجك لو انه بهذي الطريقة اذا الله حرم الظلم على نفسه كيف يظلمك ويظلم بناته خلاص مايقدر يغير طبعه دام أنه أهله يدخلوا في حياته في كل كبيرة وصغيرة ومن سنين طويله الله لا يردها من عيشه اتطلقي ولو تعيشي في بيت انتي وامك وتلاقيلك وظيفة تصرفي على نفسك منها وصدقيني الله بييسر أمرك ويفتح عليك اذا كنتي سعودية الضمان راح يعطيك راتب شهري وممكن تقدمي على بيت عندهم والله يغنيك عن وجع الراس الواحد لو يعيش في دنيتو نكد بنكد ما كأنه عايش صحيح انه حيفضل قلبك مع بناتك بس مالك الا تدعيلهم وتدعي ان الله يحنن قلب ابوهم عليهم وأعتقد ان البنت لا بلغت سبع سنين تتخير تبغى امها ولا ابوها خلي بناتك يختاروك وبالمحكمة حيتنازل عنهم وانتي الله يعيينك على هذي الدنيا ولا تنسي الاستغفار الاستتغفار الاستغفار والله مافي زي الاستغفار والدعاء وركعتين اخر الليل حتى اذا بناتك بحكم المحكمة فضلوا مع ابوهم لا تزعلي خليك قوية واتذكري مصايب غيرك بتهون عليك مصيبتك واتذكري انه كثير مثلك مو انتي لحالك بهذي الدنيا اللي مغلو ب على امرها واللي مرت بهذه الظروف والله نشوف امهات صبروا واتحملوا وتبهذلو لكن بسبب ايمانهم بالله وقوة صبرهم قدروا يوقفوا على رجلهم ويتحدوا كل العقبات والله معاك وقلبي معاك
الله يعينك اصبري عشان خاطر بناتك اذا ابوهم كذا لكن انا لاحظت عليك بعض الاخطاء بعض الرجال تقدري تاخذيه على قد عقله وقت العصبيه وتحاولي ترضيه وقتها وتليني معه بالكلام والدلععشان تكسبيه في صفك وما يسمع من اهله لو عيشتيه زي الطفل ماراح يستغنى عنك حتى لو خاطرك منه مكسور حاولي كمان لما قلتي عزم اهله وطلعتي هذي غلط 100%لانه مهما كان هذول اهله وانتي احرجتيه قدامهم وما خليتي له قيمه كان قابلتيهم وقمتي بواجبهم الحين كذا لقوا مجال عليك ووقف بصفهم لو سويتي العكس كان قال في نفسه سوت هذا الشي عشاني وهو عارف اهله وكان صارت النقطه لصالحك بس انتي اعطيتهم فرصه يثيتوا له كلامهم عنك
ارجو انك فهمتيني
ارجو انك فهمتيني
ةعزيزتي اولا لازم تروحي للمحكمه علشان تتأكدي من وقوع الطلاق
ثانيا انتي بالمحكمه تقدري تاخذي حضانه اولادك لان زوجك صاحب علاقات وتحشيش وممكن تاخذي نفقتهم وسكنكم حتى وبما انك على وشك دكتوراه تقدري بأذن الله تحصلي وظيفه
بس انا ابيك تحاولي معه محاوله اخيره وتقوليله انا جربت اهلك واني اتعامل معاهم بس ماتفقنا فخلاص خلينا نعيش لوحدنا وبناتك راح يزورو عملتهم وجدتهم علشان صله الرحم بس اشرط على اهلك مايحكو قدام البنات بشي يضيق خلقهم لان بعد كذا راح يكبرو ويتزوجو ويصبح امرهم بيدهم وبكذا ماراح يحبو يزوروهم وبيكون قطاعه رحم وانت راح تاخذ ذنبهم لانك مانصحت اخواتك وقوليله ترا الانفس جلبت على حب من احسن اليها وخليهم يحسنو لبناتي علشان يحبوها
اما انتي فما بينك وبين اهله رحم وقوليله انا اذا مالقيت راحتي عندهم فما راح اروح لهم
بس تكلمي معه بهداوه ومن غير عصبيه وقوليله الزوج الذكي اذا شاف ان زوجته ماتفقو مع اهله يطلع نفسه من المشاكل ولايتدخل لاهنا ولاهناك وخلينا نحل وضعنا بينا وانتي بكذا راح تحافظي على بيتك وبناتك بس اذا ماستجاب فأستخيري والله يقدرلك اللي فيه الخير
ثانيا انتي بالمحكمه تقدري تاخذي حضانه اولادك لان زوجك صاحب علاقات وتحشيش وممكن تاخذي نفقتهم وسكنكم حتى وبما انك على وشك دكتوراه تقدري بأذن الله تحصلي وظيفه
بس انا ابيك تحاولي معه محاوله اخيره وتقوليله انا جربت اهلك واني اتعامل معاهم بس ماتفقنا فخلاص خلينا نعيش لوحدنا وبناتك راح يزورو عملتهم وجدتهم علشان صله الرحم بس اشرط على اهلك مايحكو قدام البنات بشي يضيق خلقهم لان بعد كذا راح يكبرو ويتزوجو ويصبح امرهم بيدهم وبكذا ماراح يحبو يزوروهم وبيكون قطاعه رحم وانت راح تاخذ ذنبهم لانك مانصحت اخواتك وقوليله ترا الانفس جلبت على حب من احسن اليها وخليهم يحسنو لبناتي علشان يحبوها
اما انتي فما بينك وبين اهله رحم وقوليله انا اذا مالقيت راحتي عندهم فما راح اروح لهم
بس تكلمي معه بهداوه ومن غير عصبيه وقوليله الزوج الذكي اذا شاف ان زوجته ماتفقو مع اهله يطلع نفسه من المشاكل ولايتدخل لاهنا ولاهناك وخلينا نحل وضعنا بينا وانتي بكذا راح تحافظي على بيتك وبناتك بس اذا ماستجاب فأستخيري والله يقدرلك اللي فيه الخير
الله يفرج همك ويسهلها عليك إستخيري أولا وثانيا روحي للمحكمه وقولي لهم اللي صار بالحرف الواحد خلي بناتك يروحوا لجدتهم وعماتهم وسوي اللي بينك وبين ربك ولاعليك منهم اللي وده يتكلم ويسب فيتكلم لين ينفجر راسه طنشششششششششششي ياحلووووووه ترى الزمن مختلف وألزم على الواحد صحته وزوجك الله المستعان الله يهديه ..........طمنينا عليك الله يعينك اللهم آمييييين.
الصفحة الأخيرة