الطلاق مو عيب

السلام عليكم ورحمة الله وبركاته
امس فيه واحده منزله موضوع عن المطلقات وتدعي على بنات المنتدى الي ماعجبتها ردودهم
انا راح اقول تجرتبي في الطلاق واحكمي وتعلمي منها كلنا نمر بمواقف توجع لكن ماتضيق عليك الا ويفرجها رب العالمين
قبل سنتين في شهر رجب تحديدا انخطبت وتملكت وتحدد يوم عرسي كان اول ايام العيد تقضيت للعرس من فستان وكل شي والمهر عندي وصرفته كله و
باقي اسبوعين على الزواج اتصل المعرس على ابوي وقال هونت ماابيها ابي اختها الصغيره طبعا ابوي قال له بناتي مو غنم للبيع وقفل في وجهه في الوقت
الي كنت اتجهز فيه ومشغوله في تجهيزات العرس فيه واحده الي هي حرمه اخوه نشرت عني اشاااعات كل شي يخطر في بالكم نشرته عشان تزوجه اختها وفعلا لين ماخربت الزواج حسبي الله عليها
تطلقت وانا ماتزوجت شعوور يوجع صحيح مريت في اوقات صعبه كرهت كل شي في الحياه بس مو عشانهم شفت الوجع في عيون امي وابوي احلف لكم يابنات اني ماتاثرت بخبر الانفصال
كان اكثر شي موجعني بكاء ابوي وهو يخبرني بالموضوع رحنا مكه بعد الي صار وسفرنا ابوي برى المملكه كان ذيك الفتره يحاول انه ينسيني الي صار صحيح حقدت على الي ظلموني ودعيت عليهم يمكن سنه
بس بعدها قررت اني اشغل نفسي بشي احبه كنت احب ولا زلت احب الطبخ فتحت مشروع اسر منتجه والحمدلله صار اقبال على مشروعي ومشى وبديت ادعي لنفسي وانسى الي ظلموني كنت استغل اوقات نزول المطر
والاوقات الفضيله المستحب فيها الدعاء وفي رمضان كنت في مكه قرب المغرب اسقي الناس مويه زمزم وكانو يدعون لي وكنت افرح بدعاويهم صرت ادعي ان الله يجبر بخاطري واذا تذكرت الي ظلموني ادعي عليهم استغفر الله ندمانه اشد الندم اني كنت ادعي عليهم عند باب بيت الله ذيك الايام الموجعه الي اوجعوني فيها كنت ادعي واتحسب على كل واحده قالت كلام ماهوفيني الله يسامحني على ذيك الدعاوي كلها اخر ايام رمضان العام هاذا ليلة العيد انخطبت وتمت الخطبه الحمدلله ربي عوضني خير وزواجي في اجازه الربيع باذن الله الي خطبني سمعه اهله تسبق سمعته ابوه امام مسجد وهاذا اكثر شي مطمني انهم ناس طيبين ويخافون الله ومازلت اقول حسبي الله ونعم الوكيل وكفى بالله وكيلا كلما ذكرتهم
الي حابه اوصله ان الطلاق مو عيب ونصيبك ورزقك عند الله سبحانه وتعالى وان الله ماينسى احد من عباده
يارب اني ماطولت عليكم بس حبيت اوصل لثلوج انها تريح نفسها وتهدي بالها وكل الامور راح تتيسر باذن الله
وبس اعتذر على الاطاله